《2022香港小姐競選》上周舉行第一輪面試，今日（7日）假將軍澳電視城複試繼續見人，除咗有上次見過大家嘅82位佳麗，今次亦見到多位新女上場，只有40餘人進行複試，質素明顯提升，令人為之一振，多位養眼佳麗悉數登場。
上次已經見過人嘅連詩雅師妹邢慧敏（Sharon）、林俊賢女兒林卓錡（前名林鈺洧）、獲郭秀雲做提名人嘅22歲學霸Khaki（梁家琪）、「翻版胡琳」Robin、KOL Cherry、Janice等，今次通通有得留低，但大熱之一「碩士超蓮」Bianca暫時未見影。
當中已出道嘅林卓錡，雖然包到冚現身，不過都遮唔住強勁好身材，佢就話爸爸好支持佢參選，佢自己亦唔係咁緊張。Khaki則一身富貴打扮現身。
而第一次見人嘅有22歲Naomi，斯斯文文大眼睛，氣質清純；海外佳麗梁超怡，就喺美國返港，啱啱完成隔離，讀商科嘅佢依家喺社交網公司做工程師招聘員；索女Gabrielle就以黑白連身裙示人，佢影相時有隻蝴蝶飛到其身上，但佢都好淡定等影完相，表現從容。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
