藝人陳家樂同連詩雅（Shiga）地下情玩足2年，早係圈中公開嘅「秘密」，2人愛得甜蜜，即使去年曾傳港姐黃嘉雯介入，但都無損感情，最近仲拍住上情侶檔拍劇，感情升溫，終迎來好消息！有指佢哋不但一早融入家中，見晒雙方家長同朋友，近日更有傳陳家樂求婚成功，準備同Shiga拉埋天窗！
有指日前陳家樂約埋成班朋友同Shiga出海釣墨魚，可惜當日天氣不似預期一直落雨，不過見男友一早Book好晒船，身為廿四孝女友嘅Shiga唔想浪費對方一番心機，都繼續照行程出發，好彩釣墨魚之旅如期進行，事關原來好戲在後頭，當Shiga去完洗手間返上船艙一刻，陳家樂就攞住戒指求婚，場面浪漫，Shiga亦被其誠意打動，答應求婚，相信對即將於月底（29日）34歲生日嘅Shiga嚟講，升呢「準陳太」就係最好嘅生日禮物！
東網致電陳家樂，他並冇否認求婚成功一事，只表示交由公司回應，而其經理人霍汶希（Mani）則指稍後會一併回應。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
