現年65歲的昔日亞視一哥陳庭威，出身於TVB藝員訓練班，曾與梁朝偉在經典劇《新紮師兄續集》中合作。其後他轉投亞洲電視（ATV），憑着《豪門》、《勝者為王》和《我來自潮州》等多部經典劇集，令事業登上高峰，加上其外形高大靚仔、斯文帥氣，成功虜獲大批觀眾。不過陳庭威在2004年拍完《8號巴士站站情》後，就離開亞視轉戰內地市場，並成立個人娛樂公司，主要是接騷、登台、商演等活動。近年，陳庭威積極經營社交平台，日前他上載新短片，感觸大爆當年拍戲吃盡苦頭的辛酸歷程。
片中陳庭威戴上招牌茶色眼鏡、身穿淺藍色恤衫打呔，成個人神采飛揚，狀態大勇。當被問及在劇集《勝者為王》內的玩牌技巧是否特效時，他即時澄清：「其實當年切牌、洗牌、飛牌嘅動作，全部都係我自己做！當年真係冇特效，全部都要靠自己反覆練習先做到出嚟。所以拍一部好戲，一定要落足功夫。」
對於過往被封為「亞視一哥」，陳庭威則謙稱：「好多人叫我『亞視一哥』，唔係光環嚟㗎，只係大家畀面我啫。」他憶述90年代亞視的黃金年代，形容當時整個團隊都是「搏命」拍戲：「當時喺亞視黃金年代，我哋都不斷咁拍，一部接一部。真係台前幕後大家都搏晒命，先至拍到咁多經典港劇。真係好懷念當時每個人都肯奮鬥、咁團結，拍出咁多經典嘅戲。」
被問到拍《再見黃埔灘》時有那麼多危險動作，有沒有使用替身？陳庭威透露危險動作幾乎親力親為：「冇㗎，吊下威也囉，尤其是嗰個飛刀，都係武指設計好動作畀我做。以前拍港劇經常外景捱夜，有時大熱天時仲要着好厚嘅戲服。」他感嘆當年既無替身亦無後期特效：「以前邊有咁多替身同後期特效製作？演員吃苦係本分，每一部經典都係親力親為，真係咁熬出嚟嘅！所以真係好感謝台前幕後工作人員，同埋多謝每一位睇我戲嘅鐵粉，多謝晒！」影片曝光後，網民紛紛大讚凍齡：「好似無老過咁，好後生個樣。帥」、「這叫做敬業」、「沒咋老，還是那麼帥」。
1984年畢業於TVB藝員訓練班的陳庭威，與郭富城、曾華倩、邵美琪為同學，在TVB發展時曾因對異性過分熱情被封為「人狼威」，情史也非常豐富，曾與陳雅倫拍拖4年，最終分手收場。之後因拍《新紮師兄續集》時與曾華倩燃起愛火，二人過檔亞視，齊齊拍完《勝者為王》後，曾華倩稱難忍對方大男子主義，單方面宣布分手，陳庭威事後亦承認不夠細心，令感情無疾而終。
本文作轉載及備份之用 來源 source: http://hk.on.cc
|
鍾意就快D Share啦！
|
|
|