掃呢頁CODE去手機

2013年12月13日 星期五

[忽然1周 959] 入行 22年等攞視帝  Cool魔半裸操肌




跑山備戰

頒獎禮賽前大熱的 Chilam,連日跑山操肌備戰。上周六( 7日)他由淺水灣寓所跑落山,跑到㷫烚烚時更剝去上衣,雖然有些少腩仔肉,但狀態十足。

打頭陣

入行 22年等攞視帝  Cool魔半裸操肌

台慶頒獎禮下周一(16日)舉行,以現時走勢來說, Cool魔張智霖以一面倒姿態力壓 TVB一眾親生仔,成視帝大熱。視帝夢入大直路之餘, Chilam隨時連「最受歡迎電視男角色」都擸埋。

為了在頒獎禮當晚,以最佳狀態出戰, Chilam連日來 keep fit操肌,每朝更由淺水灣寓所跑到人跡罕至的深水灣堤壩練氣。上周六(七日),他跑得興起,索性脫去上衣凸出豬腩仔和雞扒胸。

操 fit body之餘,一向貪靚的他,近日更搵老婆靚靚做形象指導,頒獎禮當晚將會戴上價值二千萬的 Franck Muller腕錶,務求由內至外都達至完美,成為全場亮點。

其他影片

入行 22年,歌、影、視瓣瓣掂過,但成績一般的張智霖,今年終憑《衝上雲霄 II》 Cool魔一角,創事業高峰,劇集播完行到邊都有大班女 fans簇擁,登台、廣告升價十倍。從未在任何頒獎禮攞過大獎的 Chilam,在今年無綫台慶頒獎禮上,頓成視帝頂頭大熱。無論在討論區,高登等民選視帝,他也是一枝獨秀,拋離其他強勁對手如馬明、陳豪及黎耀祥幾個馬位。

跑步露股肌

將圓視帝夢,其經理人公司老闆蕭定一,近日特意放他一星期假作賽前準備。難得有得唞, Chilam過去一星期大部分時間都留在家中,與老婆靚靚及囝囝魔童聚天倫,同時亦每日抽幾小時到錄音室錄歌。

攞視帝要做足準備,據知 Chilam為了操靚副偈,連日早上都會在屋苑內 Club House做 gym及跑步。上周六( 7日),熱愛大自然的他由淺水灣屋企跑到深水灣,其間跑到身水身汗,更豪邁地脫去上衣,對住個海一邊聽音樂,一邊拉筋練氣。

現場所見,近幾個月密密𢱑銀無時間 keep fit的 Chilam,半裸上身白白豬,與兩年前演唱會練落的六嚿腹肌明顯比下去,除胸前現出兩塊雞扒胸外,腹部亦有小腩仔。而當他用力按壓欄杆,兩邊股肌凸露之時,更差點露股罅。

雞扒胸

本身膚色白淨的 Chilam,當日剝去上衣時,上身現出兩塊雞扒胸。

露股肌

其後,他雙手捉實欄杆練臂力,為了練出老鼠仔,即使短褲鬆脫露出股肌他亦懶得理。

對海冥想

做了接近一個鐘頭運動, Chilam忽然舉起雙手,對著面前大海冥想,似乎是想緩和爭獎緊張心情。

老死裝束

當日他所穿的跑山戰衣,除了 New Balance波鞋外,據知部分是老死沈嘉偉的 I.T服裝。

前年六神合體

《蘋果日報》圖片

兩年前, Chilam開處男個唱,當時露出殺死人六嚿腹肌。下年七月再開騷的他,為了再呈現胸前一排朱古力,難怪近日要狂操做運動。

參加馬拉松

早前在內地連續跑騷的 Chilam,狂食火鍋,令磅數急升。為健康和身形著想,近日的起心肝減磅。

對於連日來操肌迎接頒獎禮,日前記者致電 Chilam,他坦言攞獎屬其次,最重要 keep靚 body,為下年開個唱和跑馬拉松做準備。

記:記者 張:張智霖

記:你呢排日日去跑山,係咪要為攞視帝做足準備?

張(哈哈笑了兩聲):唔係特別備戰,係因為我參加咗馬拉松同埋下年七月再開騷,所以要開始跑步同做 gym。

記:想操 fit啲去攞獎?

張(繼續笑笑口):哎呀!梗係唔係為攞獎啦,攞獎又唔使剝衫,又唔使唱歌跳舞。

記:好多網友撐你喎?

張:多謝觀眾支持,不過我就平常心睇呢件事啦!其實投邊個都好,最緊要大家記得投票!

記:如果攞咗視帝,會點慶祝?

張:哈哈,到時真係攞咗先算啦!

千萬行頭

下周一( 16日) TVB舉行頒獎禮。往年慣例, TVB都會向較熱門的獎項提名人提供贊助商以贊助服飾。但據知近日已有不少大牌子如 LV、 Ferragamo等,主動聯絡 Chilam,表明願意贊助他當晚的服飾。為免花多眼亂,據知, Chilam日前已婉拒無綫好意。除了戰衣外,他當晚更會佩戴價值千萬腕錶,閃爆全場。

二選一

白面陀飛輪約$1,200萬

三選一

黑面陀飛輪三問錶約$2,580萬

Salvatore Ferragamo長皮褸約$105,000

LV絨褸約$98,000

Dior西裝約$96,000

戒醬油餐單

Cool魔,多謝曬!(設計對白)

據知, Chilam近日除了做 gym操肌外,肥膩食物亦戒得就戒,更謝絕火鍋之友郭富城和沈嘉偉邀請,寧願在家中食清淡餸菜。「 Chilam近半年成日要飛內地出騷做活動,本身鍾意食火鍋嘅佢,試過一日兩餐都打邊爐,所以返嚟香港增磅唔少。為咗 keep fit,佢已經有一排冇打邊爐,不過為咗有肌肉,最近就狂食白烚雞肉,仲要戒曬所有油鹽糖同豉油,每餐都係食半碗飯,佢都堅持咗成個月啦,都算忍得口!」 Chilam密友透露。

錄新碟

Chilam除了積極備戰頒獎禮,近日亦頻頻到錄音室錄歌,盡量在農曆新年前出碟。據知新碟除了繼續食《衝 II》效應,還會翻唱經典舊歌。

轉會狂賺

《蘋果日報》圖片

Cool魔一角為 Chilam帶來人氣外,亦帶來豐厚利潤。九月初,他以 5,000萬天價簽約成為蕭定一旗下藝人,其後他自稱有意在世界各地置業。

生金蛋 Cool魔

今年九月以五千萬身價轉會到蕭定一旗下的「中國 3D數碼娛樂」公司,連帶簽約「星娛樂」出唱片,明年公司開拍自家電影,又要拍《衝上》電影版,更要到內地拍劇,歌影視三飛,單是這半年, Chilam已經賺過四千萬。

高登大熱

近日,高登仔開出視帝視後賠率, Chilam暫時以 1賠 3大熱姿態力壓馬明,至於視後方面,則以鍾嘉欣的 1賠 2撼贏一眾花旦。

靚靚幫老公裝身

準視帝一切準備就緒,出席頒獎禮當晚的衣著行頭,當然也成為焦點。視老公如命根的袁靚靚,有不少出席盛大頒獎禮經驗,加上 Chilam對她言聽計從,打造靚仔 look的重任,就自然落在靚靚身上。

「 Chilam依家咁紅,好多贊助商爭住贊助佢出席頒獎禮嘅服裝,所以如果佢當晚著咗無綫提供嘅衫會好難交代。聽講佢已經婉拒咗無綫幫佢搵贊助嘅好意。而衫方面,其實 LV、 Dior同 Salvatore Ferragamo都同 Chilam長期合作,靚靚同佢依家都十五十六,唔知揀邊個牌子服裝。至於鑽飾方面, Chilam唔鍾意戴鑽石,佢話鑽石都係啱女士多啲,所以頒獎禮當晚,佢唔會戴鑽石耳環或者襟針,而選擇戴隻靚錶。佢本身係 Franck Muller嘅亞太區代言人,兩公婆嚟緊就會一齊揀錶。」知情人士說。

老婆陪出戰

由於要積極備戰頒獎禮, Chilam經理人公司特別放他一星期假,得閒在家的 Chilam,除了每朝跑步 keep fit外,近日和老婆靚靚四出搜羅靚衫,靚靚亦在微博講笑話自己呢排要執正啲,襯番老公瀟灑形象。

俾仔玩

難得放假, Chilam亦趁機和囝囝魔童聚天倫,周二( 10日)他便上載一張囝囝坐頭玩到癲的相。

熱衷搭巴士

雖然 Chilam對外表執著,而且本身擁有多架戰車,但記者連日發現,他平日喜愛以巴士代步,貪其寬敞方便。

輸馬笑笑口

周日( 8日), Chilam和老死郭富城的馬匹「愛將」出戰,最後「愛將」跑第二。雖然冇得拉頭馬,但心情靚爆的 Chilam,拎住粉絲送給他的漫畫(細圖),與表姐上山詩鈉離開時,仍笑口噬噬。

內地劇升價十倍

Chilam明年工作其實已排得密麻麻,除了七月個唱外,一月將會出專輯。近日他亦忙於錄音工作,亦因 Cool魔在內地爆紅,據知他會在明年三月到內地拍攝一套三十集古裝劇,酬勞更由以往四至五萬一集,急升至近五十萬一集天價,比當旺時期的鄭嘉穎還要高出五萬。國內新劇雖然仍未落實女主角人選,但據知 Chilam有機夥拍大熱劇《步步驚心》女主角劉詩詩和《甄嬛傳》的孫儷,以及台灣代表陳喬恩、林依晨。看來「 Cool魔」一角,真係帶挈他由香港紅到返內地。

其他影片


鍾意就快D Share啦!