2013年12月11日 星期三

[FACE 342] 分手 14個月 食埋層樓 胡杏兒分黃宗澤身家 胡杏兒,黃宗澤,MF,




去年 7月分手,對於復合,胡囧含糊話:「唔講啦,點講都死!」復合唔講,不過樓可以照攞!《蘋果日報》圖片

封面

分手 14個月 食埋層樓 胡杏兒分黃宗澤身家

自去年 7月黃宗澤同胡杏兒分手後,杏兒隨即搬離火炭愛巢,更屢傳被內地男星追求,以為兩人從此冇轇轕,但原來分手後 Bosco仍然對前度好照顧。

胡囧吸金能力算強,但今年 9月黃宗澤辭任其全資公司「恒旭」董事,由舊愛胡杏兒接任,疑將「恒旭」持有市值超過 450萬嘅沙田樓轉畀胡杏兒,分手 14個月,一層樓都食埋,如果咁樣分前度身家,杏兒都算狠。

好在 Bosco如今炒樓拍戲做生意瓣瓣掂, 450粒?散紙啫!

其他影片

32歲黃宗澤自上年 7月同拍拖 7年嘅胡杏兒分手後,一直未有新歡,雖然期間傳過同大陸咪精柳岩和岑麗香等緋聞女,最近更有指其生意拍檔為「新波嫂」,不過全屬煲水, Bosco始終對胡杏兒照顧有加。

9月疑似送畀杏兒嘅銀禧花園,為黃宗澤 11年以 311萬買入,現市值約 455萬,帳面賺 144萬。

黃宗澤透過恒旭發展有限公司持有銀禧花園,雖然董事轉咗做胡杏兒,但據律師梁永鏗表示:「呢個只係轉換董事,一定要睇股份有冇 100%轉讓,如果有,先可確定呢個物業係轉咗畀人。」

轉名擸 450萬樓

二人分手後,有傳 Bosco經常 WhatsApp杏兒噓寒問暖,但杏兒多次同場時表面當對方透明。杏兒早前又喺《衝 II》慶功上自爆:「同過圈外人拍拖兩個月,但已經和平分手。」杏兒接連搵新仔,但一樣識得同前度「計數」,就在兩人分手 14個月後,今年 9月,杏兒再「分」得一層樓。

今年 9月,一直由 Bosco個人全資擁有的公司恒旭,突然將胡杏兒加入成公司董事之餘, Bosco更辭去董事職位, Bosco之前透過恒旭擁有市值超過 450萬的沙田銀禧花園單位。分手 14個月,胡囧原來同 Bosco仲有錢銀轇轕,但 400幾萬 Bosco其實豪得起,事關 Bosco現仍手持兩個銀禧物業,加埋大部分資產喺阿媽手。「其實杏兒同 Bosco拍咗成 7年拖,仲諗過結婚添,佢兩個財政一向冇分彼此,未反面分手前,兩個仲一齊去匯豐開咗個百萬聯名戶口添!啲數其實點計得咁清! Bosco亦都唔係傻仔,分咁啲當斷尾可能仲好,唔使下下再計番以前啲錢銀嘢啫!」杏兒身邊人透露。

黃宗澤除咗拍劇,買樓投資外,最近仲喺九龍城開埋蠔吧做老闆。早前更親身視察鋪位,不過 Bosco為大股東,但就由媽咪李佩芬出面。

11年胡杏兒攞視後,更公開同黃宗澤情侶關係。二人表現恩愛,可惜公開後不夠半年就分手。《蘋果日報》圖片

分完身家爆鼻

杏兒「分身家」, Bosco則忙為《點金勝手》趕工,據知早前 Bosco喺屋企滑倒爆鼻入廠,加上 Bosco經常因飲醉酒導致開早失場,搞到《點》劇全劇遲收兩星期。

上週六( 7日) Bosco清晨 5時已為《點》開工,問到送樓畀杏兒一事,他笑笑口表示:「我唔講呢啲嘢……蠔吧我係夾大份㗎,我用阿媽名啫!(係咪成日飲酒,搞到甩場,三位女主角嬲你喎!)梗係冇啦!之前我去廁所屙夜尿跣腳爆鼻,唞咗幾日啫,但絕對冇因飲酒唔開工。(係咪有新女友?)嗰個只係生意拍檔咋,唔好亂寫呀!」

Bosco除早前拍《點金勝手》時喺屋企唔小心整爆鼻,搞到停咗 4日工,亦有傳他因經常飲醉酒甩場,令《點》劇遲收工兩星期。上週六( 7日)為《點》劇趕工時, Bosco說:「我咁耐有冇傳過呢啲嘢先?冇吖嘛!」

英雄救美

當日拍攝黃宗澤同訓練班學員鄧佩儀落水戲。黃宗澤仲要抱佢上岸,七情上面,事後黃宗澤仲笑人:「阿女你都幾重喎!」

淋水扮浸

當日 Bosco要落水,但最後錫身,事後搵人淋水扮跳咗。反而訓練班同學鄧佩儀就真係跳喇,成身鹹水都冇有怕。

分手後二人甚為避忌,就算同場都企到幾丈遠,上月 19日台慶亦同場,不過就全程冇交流。《蘋果日報》圖片

有指拍《點》劇期間, Bosco成日飲酒唔返。每逢早班外景實 no show,除咗搞到三位女角嬲咗佢,仲令到成套劇都遲收工。

徐子珊:係遲咗,佢爆咗個鼻吖嘛,唞咗幾日啫!(真實對白)

唔睬:陳敏之

最嬲:胡定欣

蠔吧月尾正式開

無綫小生之中, Bosco最懂得投資。雖然 9月送咗層 400幾萬樓畀舊愛胡杏兒,但他現手持兩個銀禧花園,而其他投資就經阿媽李佩芬,而最近阿媽又投資工廠大廈,嚟緊同朋友合資嘅蠔吧又開張,加埋大馬怡保嘅夜場生意。上年佢亦自爆擁有超過 10個物業,絕對係無綫筍盤,論財力仲筍過陳豪、馬明。

阿媽有計

Bosco同媽咪李佩芬感情深厚,幾乎所有投資都由阿媽經手,將於月尾開業的蠔吧,除了兩名股東外,另由黃母李佩芬透過公司佔大股。而黃媽媽亦投資有道,今年成立香港尚傑娛樂有限公司,先後在 8月及 10月買了兩層沙田工廈,加埋市值近 600萬。

黃宗澤與朋友合資嘅蠔吧 Oystertime,現正進行最後裝修。週一( 9日)仍未開業,據知會在聖誕前開業,而內裏裝修豪華,走中高檔路線。

11年本刊拍得杏兒捉 Bosco去將軍澳滙豐銀行,迫佢開百萬聯名戶口,全權控制 Bosco財政,迫佢結婚。

冧盡中港台

胡杏兒一向緋聞少,但自從同港仔 Bosco分手後,異性緣開始暢旺,特別同劇中拍檔易傳緋聞。先後同台灣影星黃少祺及國內演員於波,但杏兒今年 10月喺《衝 II》慶功宴上,表示曾經同圈外人拍拖,但兩個月又分手, 34歲杏兒睇嚟大把人問津。

同 Bosco甩拖後,杏兒密密掘金,最近忙拍新劇《醋娘子》,更自爆聖誕、新年、農曆年多騷接,連瞓都冇時間,冇機會拍拖喎。

內地打星追

拍大陸劇《辣媽俏爸》,由於劇中有大量動作戲,出身中南海保鏕嘅於波經常教杏兒打功夫,之後更被指力追杏兒。《蘋果日報》圖片

台視一哥溝

杏兒同有「台視一哥」之稱嘅黃少祺合作拍大陸劇《金玉滿堂之身世之謎》,劇中有唔少咀戲,因而傳出杏兒因黃少祺而飛黃宗澤,但黃之後否認,更表示同杏兒只是朋友。



鍾意就快D Share啦!
Related Posts Plugin for WordPress, Blogger...