[FACE 348] 反超前 賽前 5小時先肯去 頹峯反贏許廷鏗 許廷鏗,MF,

坐在頭排的林峯，明顯心不在焉，一到廣告時間就拎部電話出嚟玩，係咪掛住同千語 BB send訊息呀？

真面目

反超前　賽前 5小時先肯去　頹峯反贏許廷鏗

週日（ 19日）舉行嘅《 2013年度勁歌金曲頒獎典禮》，無綫首度標榜公平公正全民投票，容祖兒和林峯做曬大贏家。整個頒獎禮最出位一定係林峯，頭髮淩亂篷鬆、大眼袋，完全 chok唔起，仲唱歌甩嘴又唔記得歌詞要重唱，全晚頹爆。

據知，今年男歌手薄弱，冇咗 Eason同柏豪嘅「有篩選公投」，「最受歡迎男歌星」一直由許廷鏗的票數領先，《勁歌》監製麥鎮東出手遊說本來唔到嘅林峯，賽前 5小時，峯少先肯答應出席，最慘係班峯迷拉票團，臨尾先出力穀票，唔怪得宣布獎項時， Do姐話有人「咬住追」啦！

殘到呢

勁歌頒獎禮當晚，林峯頭髮篷鬆淩亂，眼袋大到嚇親人，頹樣同以往「 chok」樣好大分別啫！

勁歌頒獎禮今年改玩新賽制，全民投票選出所有獎項，投票人數話有過百萬人次，容祖兒硬食 6.5個獎做大贏家、林峯得 3個獎， 20首金曲唔少「自己人」得 2首，多餘！

天後容祖兒一如既往，仲 9度奪得「最受歡迎女歌星」，全晚以 6.5獎成為女歌手大贏家，林峯以 36412票揮低勁敵許廷鏗冧莊，全晚以 3獎成為男歌手大贏家。

林峯同許廷鏗排排坐，笑得好勉強，鬼咩！年紀相差 9年，輸咗好瘀㗎！

許廷鏗今年首奪《叱吒》男歌手銅獎，但在《勁歌》就失落「最受歡迎男歌星」。

4次 sorry

雖然講明全民投票，但「提名權」由無綫話事， 27個獎四大唱片公司當然冇份，都係來來去去幾個人上台。當晚西裝骨骨嘅林峯竟全程不在狀態，頒第 18首金曲獎時，林峯冇換衫，著住西裝照樣跳唱〈 Nice〉，同以往執到正唔同曬，攞第 15首金曲獎〈同林〉時，首先甩 beat，唱到第二句已經唔記得歌詞，仲好意思要求重唱一次，林峯惟有以笑遮醜地說：「 Sorry，可以嚟多次，唔該，唔好意思， sorry， sorry，唔好意思， thank you，唔記得歌詞添，呵呵， sorry。」林峯連講 4次 sorry都夠失禮啦！

狂玩電話

林峯玩電話仲落力過唱歌，仲要坐第一排，好揚啫！

Do姐爆料？

鄭裕玲頒發「最受歡迎男歌星」前，已經洩口風指有人「咬住追」，最終林峯以 36412票冧莊。

原本許廷鏗一馬當先，點知林峯突然反超前奪得「最受歡迎男歌星」。

粉絲穀票

知情人士說︰「阿峯一直都唔肯去《勁歌》，不過麥鎮東（《勁歌》監製）見到「最受歡迎男歌星」個走勢就腳都震， Alfred嘅票數領先好多。雖然，畀 Alfred都合情合理，因為佢今年成績真係幾好，但阿東怕以後會冇歌手肯再上《勁歌》，所以開騷前幾日猛叫林峯撐場，直到開騷前 5粒鐘，林峯先應承會到。」得幾粒鐘，一班峯迷加上英皇大軍，點穀都要穀到盡。

其實當晚 Do姐頒發「最受歡迎男歌星」時，都唔小心洩口風話「第二位都咬住追」，明顯講許廷鏗同林峯票數好接近，最後林峯反超前以 36412票成功冧莊。本週一（ 20日），本刊記者致電「星夢」行政總裁何哲圖 Herman，問到許廷鏗慘輸，他說：「其實得獎票數已經登曬出嚟，我尊重公投嘅決定，都滿意個結果。（有傳監製急召林峯撐場？）總之我尊重公投嘅結果！（唔信許廷鏗票數贏林峯？）我信自己嘅歌手，亦都信人哋嘅歌手。」好啦好啦！明白你左右做人難嘅！

林峯成為男歌手大贏家，仲冧莊「最受歡迎男歌星」，對住班粉絲拉票團，頹峯即刻生猛曬，飲得杯落。

有傳何哲圖和樂易玲不和，頒獎禮當晚，兩人一起同坐，林峯曾經係樂大媽愛將，今次峯少肯撐場，唔多唔少都係畀面派對，好來好去。

和頭酒

無綫和星煥合組「星夢娛樂有限公司」，何哲圖（ Herman）入主成為行政總裁，拍住綜藝科總監老婆餘詠珊，有傳兩公婆在無綫獨大，而激嬲「太陽娛樂」揸弗人黃柏高 Paco，當晚亦睇唔到 Paco在場。

當晚「太陽娛樂」一姐薛凱琪缺席，不過，無綫專登安排新加盟的許志安擔任表演嘉賓，而兩位新人 J. Arie和沈震軒亦得到新人獎，都算係和頭酒。

沈震軒係無綫藝員，又係 Paco旗下歌手，當晚亦有獎攞。

Paco旗下女新人歌手 J. Arie奪得「最受歡迎新人獎」。

頒獎禮當晚，轉投 Paco旗下的許志安雖然冇入選歌曲，但離奇做唯一表演嘉賓演唱了〈作詞人〉及〈一步一生〉。

鍾意就快D Share啦！

下一篇 》