合作 3年，余毓興最終帶着 7位數字的訂金走佬，而栢芝亦速跟 AEG斬纜，與多年經理人 Emily（右）拍住上，在港開設自己的「張栢芝工作室」。《蘋果日報》圖片
真面目
失蹤人口 經理人走佬走數 栢芝失百萬訂金
話題女王張栢芝自與霆鋒離婚後，雖然之前都儲落唔少，但係湊住一對乖仔，點都要開工搵錢。 11年與國內經理人余毓興合作，加盟余旗下的 AEG娛樂公司，栢芝更一口氣拍下 5部電影。
以為一帆風順，勢估唔到有傳公司老闆余毓興早前以栢芝名義接電影，將訂金袋袋平安後潛水，難為栢芝得知此事時，有人已夾帶私逃！而栢芝亦極速同余毓興斷絕關係， 2個月前，栢芝決定自己開設張栢芝工作室，今次自己話晒事，費事再遭人冒名掠水！
張栢芝 11年與霆鋒離婚，同年亦與國內經理人余毓興一拍即合，同年 3月簽約成為 AEG（新亞洲）娛樂公司旗下藝人。
但余毓興在今年 4月出席蕭淑慎的加盟儀式後即告人間蒸發，本刊收到可靠消息，指余毓興以栢芝名義代傾 2部電影，對方即付 7位數字訂金，後來電影方多次聯絡余毓興不果即揭發此事，在去年 6月， AEG已遭內地電影公司上海華宇電影有限公司人稟申請清盤。
疑遭借名呃錢的栢芝當然知情，但向來甚有義氣的她冇向人透露半句，至今年 7月自己開設張栢芝工作室，栢芝都只說「想自己話事，做吓老闆」，從冇講過余毓興半句壞話。
至於曾同屬 AEG旗下的周秀娜，本刊向她經理人 Roy了解有傳余毓興走佬一事， Roy說：「聽過呢件事一段時間，不過周秀娜屬 AEG嘅子公司，收足錢就費事多管閒事啦。」
勁拍爛片仆直
離婚後的栢芝連拍 5套電影，雖然栢芝每部電影都算重卡士，任賢齊、湯唯、權相佑、張東健和章子怡都合作過，但製作未如理想，香港票房搵套達 50萬都冇，自 12年的《危險關係》後，搵上門俾栢芝的電影劇本已經買少見少。
|
鍾意就快D Share啦！
|
|
|
