掃呢頁CODE去手機

2014年10月10日 星期五

[忽然1周 1002] 黃子華 大智慧呀! 子華,黃子華,MW,




媽咪姐

黃子華 大智慧呀!

唔知由幾時開始,黃子華已經變成一個宗教(!),一個幾年返一次「崇拜」嘅宗教。尤其近年香港人同內地人搶奶粉爭學位,仲要反國教、撐港視,反東北亂發展,真係身心俱疲!入場聽男神子華講棟篤笑,幫我哋寸吓「正苦」,條氣先可以稍稍順番啲,繼續撐落去。







所以呢次黃子華搞《唔黐線唔正常》棟篤笑,唔使宣傳都全城搶飛,絕對係正常過正常。媽咪姐同一班靚太 friend唔執輸呀,第一場就衝住去睇,講真,全晚最投入嘅,一定係講「佔中」嗰段。你明㗎,當 689同一班官員及警方嘅言論行為荒謬到一個程度嘅時候,查實我哋廣大嘅市民真係睇到好憤怒又想笑囉,以為大家唔係住喺同一個地球,自己睇緊「科幻片」呀大佬!係咯,我哋同子華都係問同一個問題:「雨傘都係武器?」

不過男神就係男神,佢「解答」咗呢個問題之餘,仲講埋愛情、婚姻同家庭,句句中 point㗎!佢仲話:「未來嘅考驗,就係我哋嘅智慧。智仁勇,仁勇我哋都兼備,未來嘅考驗係智慧, ok?」你問點先有智慧?呢啲媽咪姐教唔到你噃。或者,試吓上街同班學生傾吓偈至少,你會重新明白乜嘢叫擇善固執、堅持到底。

全世界見到嘅都係呢個畫面: 87枚催淚彈,手無寸鐵嘅幾萬名學生。真的假不了。《蘋果日報》圖片

除咗講,男神仲拎起支結他唱吓歌。彈得唔錯㗎!仲無走音㖭。

近排大家都話,黃子華喺回歸前搞嘅《秋前算賬》棟篤笑有預知能力。媽咪姐絕對贊同!當年佢寸爆街上啲慶回歸標語:「全港市民熱烈慶祝回歸, 10隻字有 8隻都係錯㗎,得回歸兩隻字係啱㗎啫!」好嘞,我哋又望吓今年 9月 28號嘅中新社報道:「香港萬人集會慶國慶 支持依法落實普選」 17隻字有 11隻字都係錯嘅!得香港萬人集會 6隻字係啱嘅, amazing!

提葉劉女夜蒲帶乜嘢

雨遮都係武器,我唔知葉劉有冇女?有女嘅,如果佢個女夜晚出去蒲,蒲幾耐? 3日度唔得,好危險。怕咩啫?我有把遮。你仲驚?唔使驚,我仲攞咗紮保鮮紙㖭!咁樣叫做有備而來。佢仲有句叫啲學生乜嘢……不是省油的燈,呢啲又係武俠小說先出現,你哋都係古墓派,你哋返番去個古墓度即係點樣呀,我發現啲學生不是省油的燈,我不禁倒抽一口涼氣,然後發出 689拳,都被雨遮一一擋下!

紅 A vs蝗蟲

咩呀!依家我家族好失禮你呀?你話間屋唔夠人氣,我就叫晒親戚落嚟坐。話人哋係昆蟲喎!咁唔係昆蟲點會咁鬼多㗎啫,仲喺條冷巷度屙屎。啊啊啊!你叫啲鬼佬返嚟,飲到嘔到上天花板,嗰啲你又唔出聲。啲鬼佬點同,我叫佢坐邊就坐邊。依家為咗你啲親戚,全間屋啲傢俬變晒做酸枝,我坐唔起啲咁貴重嘅酸枝呀!我淨係想坐紅 A啫,唔係有錢就大晒!

揭都敏俊冇得輸之謎

今年我哋知道咩真身有資格同女性相處,我哋今年知係都 min俊 C,有冇人話唔知,唔係維他命 C,係來自嗰粒星星,一個四百歲嘅外星人,有四百歲智慧,最緊要係有四百歲財富。佢間屋靚到呀,佢一定供起咗,係咪先?供咗四百年,未供完應該都係五毫子一個月,我都供得起。你有四百歲,折墮到得番𠺘口盅,都係古玩呀。

揪出無敵第三者

兩人相愛都唔想有第三者,大家好愛好愛,但係點解你想生仔呢?黐線?仔點解唔係第三者?佢唔係人呀?呢個第三者霸你哋好多時間,仲多過你有多個第三者。你真係有個第三者一個禮拜偷食三次好未?你知道偷食斷斷不能變成正餐,如果唔係,餐餐食兩餐,呢個第三者日日食六餐,當佢食嘅時候,你分分鐘冇得食。一男一女梗要生仔,點解呢?當一男一女好快 feel到呢個世界得你得我,呢個遊戲係玩唔到好耐。跟住佢高歌「每一個晚上,我都跟你吔飯,長期叉燒番茄湯,含住菜睇到,你狼吞噴飯,好在有生啤…… GOO GOO GOO GOO GOO」

婚姻最猛

2009年喺中國有一百二十萬人結婚,二百萬人離婚,你諗下你去一間戲院,你睇到裏面走出嚟嘅人,多過入去嘅人一倍,有冇咁猛呀?係咪要打番場齋做場法事,以後結婚唔使結婚音樂,唔係啦,新人交換戒指……在旁不停唸咒,新人接吻,桃木劍……不停耍,你哋唔使理我哋繼續接吻,好猛。最猛係好多離過婚嘅父母,都好想自己仔女結婚,咩意思?隻嘢上你身後,我瀨咗嘢,到你啦。

男神「被集郵」

「神級」子華開騷,圈中人唔去支持同取經又點得呢?睇吓幾多星嚟集郵

「歡喜哥」許紹雄約埋「 Katie姐」江美儀去睇騷。問過卓 sir未㗎?

(左起)蘇永康、吳鎮宇、谷德昭、黃子華、張達明、李璨琛、鄭中基,識搞笑嘅都差唔多嚟齊,開騷嘅話,大球場都塞爆呀!

Chilam同早前開腔力撐學生嘅袁詠儀都有嚟,唔知佢哋最鍾意邊 part呢?

古巨基結婚之後,大方咗好多,為睇黃子華帶埋老婆 Lorraine到場,睇吓佢哋幾開心。



鍾意就快D Share啦!