掃呢頁CODE去手機

2014年11月19日 星期三

[FACE - 391] 有料到  50萬斟拍露點三級片 吳日言:原來我值呢個價 吳日言,BKD_S,MF,




週日( 16日),吳日言與記者做訪問,見她精神狀態不錯,期間仲傾到手舞足蹈。

真面目

有料到  50萬斟拍露點三級片 吳日言:原來我值呢個價

成功需苦幹,但在娛樂圈,即使肯苦幹,都不一定成大器。

04年以歌手身份出道,入行剛好 10年的吳日言,近日為有線做娛樂節目直播主持, 10年間跟兩間唱片公司解過約,冇錢開飯侷行三點式泳衣騷,患過情緒病,想過自殺消失喺呢個世界上;幸經好友森美、小儀多番開解最後心結打開,如今已成為寵物衫公司其中一名股東。週日( 16日)心情靚爆的吳日言向本刊自爆, 09年與舊公司解約後曾被邀拍露點三級片,片商開價 50萬,最後當然拍唔成!如今回想,她說:「我個價係值 50萬」。

31歲的吳日言, 04年加入 Silly Thing,成為麥浚龍師妹,可是 05年出完第三張唱片後便解約收場。後來曾加入 Neway Star, 12年亦遭公司主動解約。歌星夢撈唔起,但原來曾有電影公司主動聯絡,出 50萬酬勞邀拍三級電影,吳日言當時諗都無諗即一口拒絕。

曾經窮到連基本生活使費都冇剩,守身如玉的吳日言連泳衣騷都要接,馬死落地行囉。《蘋果日報》圖片

當年雷凱欣因《肉》劇一炮而紅,但人氣亦迅速下滑,吳日言唔算走寶。

《 3D肉蒲團》 09年開始籌備, 11年上映,與吳日言所講 09年收到邀請非常接近。

露點唔肯制

「 08、 09年,前經理人同我講,有間電影公司想搵我拍三級片,要露點嘅!電影公司開咗個價錢係 50萬。好彩嗰時唔等錢使,唔係真係會行差踏錯!咁我就知我個價原來係值 50萬!」

吳日言口中的三級片,據知是由蕭若元、蕭定一監製的《 3D玉蒲團之極樂寶鑑》,吳日言是其中一個被邀拍的女藝人,雖然票房高達 4千萬,但主角雷凱欣、藍燕等人已消失於娛圈,下場似乎比吳日言更慘。

拍拖多年的圈外男友其實長期不在港,單親長大的吳日言亦冇結婚打算,但唔排除有日會未婚生仔。《蘋果日報》圖片

04年出過第一集唱片,紅色冬菇頭係當時標記。

好多謝森美

出道 10年,吳日言跌過痛過,最谷底的時候患過情緒病,無意間多得森美及早發現。「有次同森美傾偈,自己突然間爆喊,係佢提醒我再咁落去會有情緒病。」當時已無工作在身,戶口餘額又所剩無多,「開飯都成問題,仲點睇醫生吖?如果嗰段期間係無朋友搵我出去,我諗我可能消失咗喺呢個世界上。」多得森美和小儀開解陪伴,加上開始搞寵物衫和電話 app生意,吳日言專心工作,慢慢打消輕生念頭。

如今吳日言對娛樂圈已睇化,「入行 10年我好多嘢都睇化,即使無幕前演出都好啦,我覺得我自己係一個有用嘅人就已經好足夠。」

週日( 16日)吳日言親身帶齊自家公司狗仔衫到寵物店 set架擺貨,開業半年有多,期待快啲冬天有多啲生意。

11月開始喺有線做《今日觀點》直播主持,講吓娛樂圈最新消息,再加埋自己意見同觀眾分享。網上圖片

與森美份屬好友關係,冇工開的日子,森美間中都會叫埋吳日言一齊開咪做嘉賓。網上圖片

2大生意

吳日言雖然鍾意唱歌,不過唔 work就係唔 work, 2年前吳日言與友人合作搞 Qr Hunter App,「每個星期日, 4-7都要落旺角做 road show,派禮物宣傳吓個 app,其實反應幾好,至少我哋個 app仲喺度,好多對手已經消失咗!」

出過寵物書,讀過寵物美容,年初與開廠友人提議搞寵物衫生意 Dogaholic,友人投資 8位數字,吳日言負責將衫仔擺落全港寵物店寄賣。「已經打出咗香港,𠵱家日本、台灣、國內同比利時都有得賣,嚟緊連續兩個週末仲有特賣,唔買都嚟睇吓!」認真 hard sell。

賣寵物衫

搞宣傳 app

有線擸人

自從余詠珊過檔大台後,連帶佢嘅愛將都走埋,有線人才真係所淨無幾。

有見及此,有線近月擸得就擸,除咗吳日言會主持節目,前港姐楊思琦、佘詩曼老死周家怡,仲有美棋 BB都會喺有線出現,邊個話同大台爭收視,淨係得 HKTV㗎!

《快樂地球》黃美棋

美棋 BB早排飛到意大利,用輕鬆跳脫手法主持,將雜誌式的生活、飲食及旅遊資訊影像化,總之帶你跳出香港。

《往事。並不如煙》楊思琦

楊思琦離大台後首個主持節目,親自請名人受訪,與嘉賓探討男女關係。

《大凶捕》周家怡

單元故仔,周家怡、廖啟智、陳彥行等都有份參演,將十個詭異故事改編而成的靈異節目。



鍾意就快D Share啦!