雖然 bra top唔算暴露，但足以展現黃智雯 34C魔鬼身材。網上圖片
封面
陳凱琳騎住 唔靠大台自 sell 黃智雯 bra辣舞求生
31歲黃智雯出名有演技， 12年憑「關二嫂」一角嬴埋「飛躍進步女藝員」，之後更劇接劇冇停手。週日（ 17日）播出的《飛虎 II》同巨胸謙鬥晒胸， 34C黃智雯唔只演得，仲好有睇頭！
可惜大台上位靠關係，原屬梁家樹黨的黃智雯，雖則在梁家樹走之前，她已率先「過底」到珍姐旗下，但「過底」後拍的《師奶 Madam》，有個余詠珊愛將黃翠如做女一，新戲《張保仔》更慘被遲 7年出道的新人陳凱琳騎住，由以往女二降呢變女四。明明有料到都要做阿四，好在演藝學院畢業的黃智雯周身刀，近日同師兄師姐自拍的跳舞片勁多正評，加上識得着 bra top騷靚 body，隨時大把廣告送上門呀！
07年出道的黃智雯，由「鵪鶉妹」、「關二嫂」到《飛虎》系列的「蘇文強」，幾乎全部角色都硬淨強悍，估唔到原來亦相當跳得，有演技之餘仲有舞技。
Bra Top上陣
在演藝學院主修舞蹈的黃智雯，精通中國舞及現代舞，現時亦有在容祖兒御用排舞師 High King旗下的跳舞學校繼續進修，放長假又會到紐約等地學跳舞，絕對係圈中的隱形舞后。
最近黃智雯在微博放了兩條自拍片，比以往的美拍跳舞短片更吸引。其中一條只得 15秒的片段中，黃智雯着上性感 bra top，同演藝一班師姐師妹大跳 K-pop辣舞，激罕 34C靚 body任睇；另一條向偶像 MJ致敬的 4分幾鐘長片，則勁騷舞功，跳得比專業 dancer更有美感，而且跟螢幕上的男仔頭形象非常大出入，原來女飛虎都有女性化一面。
嘉欣 BB一齊跳
黃智雯圈中人緣非常好，除了同屆港姐王君馨外，與胡杏兒、胡定欣、姚子羚及胡蓓蔚等組成「胡說八道會」，成班姐仔唔使開工，即約埋行山 high tea，今年初又一齊飛首爾旅行， friend到爆！
除了一班好姊妹，連鍾嘉欣都有興趣跟黃智雯拍跳舞片，仲分分鐘自己落手落腳編埋舞，女神變舞后。繼 MJ同 bra辣舞，黃智雯大有機會同圈中舞林高手齊齊跳，特別係有跳舞底的胡定欣同王君馨，齊齊拍片自娛兼谷人氣！
MJ致敬舞
海報影都冇
《飛虎Ⅱ》飛 bra
上週日（ 16日）播出的《飛虎Ⅱ》，黃智雯要剝衫露事業線，仲要同巨胸謙又擒又咀，搏到盡！
新劇變女四
黃智雯 07年選港姐殺入最後 5強，輸俾張嘉兒、王君馨同周美欣，但發展比冠亞季軍更好，出道 7年拍過 30套劇， 09年已在《巴不得爸爸》做女配角， 12年更憑《缺宅男女》「關二嫂」一角嬴「飛躍進步女藝員」，其後又在《 On Call 36小時》做女二，戲份僅次於楊怡。
形勢大好，點知梁家樹今年突然劈炮，令屬於梁黨的黃智雯慘變孤兒仔，投靠珍姐後又冇大發圍，先在《師奶 Madam》被余詠珊愛將黃翠如騎劫女一地位，現時拍攝中的《張保仔》，黃智雯又被新人、 13年港姐冠軍陳凱琳爭嬴做主角，由女二降呢做女四，排名比邵美琪、姚子羚更低，連海報都唔見樣！同期拍檔羅仲謙、梁烈維就升晒呢做男一，週一（ 17日）本刊致電黃智雯是否寧靠自己莫靠大台捧，但她禮貌地拒絕受訪，「唔好意思，我唔回應」
大台多舞女
大台演員成日被批評得個樣冇內涵，其實入面臥虎藏龍，大把女藝人係舞林高手，唔拍劇轉行跳舞都一定掂呀！
|
鍾意就快D Share啦！
|
|
|
