[FACE - 391] 好事近 求婚成功 '15娶鍾舒漫 吳浩康：結咗先話你知 吳浩康,鍾舒漫,MF,

吳浩康自與鍾舒漫拍拖後就收心養性，背後有個教徒女友撐住，吳浩康喺工作上明顯較以前積極進取。

真面目

好事近　求婚成功　'15娶鍾舒漫　吳浩康：結咗先話你知

娛圈喜事一浪接一浪，繼月初黃婉曼同會計師兼馬主男友拉埋天窗後，下一 pair新人就到鍾舒漫同吳浩康！

雖然兩人拍拖只得年半時間，但據知吳浩康兩星期前求婚成功，下年就會舉行婚禮添！終身大事，原來連公司英皇都未知，吳浩康同鍾舒漫達成共識，將婚事保密。快做老襯嘅吳浩康懶神秘咁話：「結咗先話你知！婚後我會盡量生，生到幾多就幾多！」

其他影片：>>成功求婚娶鍾舒漫　吳浩康：盡快生 B！

出道 12年嘅吳浩康，喺娛圈發展一直麻麻，不過異性緣極佳，身邊女伴 keep住換，先後同胡定欣同大馬拿督千金莊思敏撻着，直到同現任女友鍾舒漫拍拖，先有結婚打算。

鍾舒漫同吳浩康拍拖只有年半，原本不務正業，形象插水的吳浩康，受到基督徒鍾舒漫感化後，工作同態度慢慢變得積極，仲搣甩好多不良嗜好。據知，吳浩康一早已認定鍾舒漫係另一半，兩家人又相處融洽，加上圈中同年紀嘅相繼拉埋天窗，吳浩康兩星期前扚起心肝求婚，鍾舒漫亦一口應承。

鍾舒漫：期待有自己嘅家庭。

吳浩康：視 Sherman係結婚對象。

莊思敏：會祝福佢哋！

「 Sherman係結婚對象！」

本週一（ 17日），本刊致電吳浩康，問到結婚一事，他說：「真同假都唔會答，等結咗先話畀大家聽，我視 Sherman係結婚對象。（生 B？）我好鍾意小朋友，生到幾多個就唔知，盡多啦，都希望小朋友有兄弟姊妹。」而鍾舒漫都明顯夾晒口供，她說：「大家都有傾過呢個話題，不過𠵱家就冇呢件事，有就一定會同大家講。」而兩位舊愛，胡定欣就咁啱得咁橋宣布分手、另一舊愛莊思敏就反應冷淡，她說︰「我哋好耐冇聯絡，會祝福佢哋！」

鍾舒漫與同門師兄張致恆拍過拖，兩個就算孖住出席活動搵錢都冇尷尬，話晒 Sherman就快做「吳太」。

早前鍾舒漫同妹妹鍾舒祺推出自家製新歌〈 SS14〉 MV，亦同公司有計劃出碟，唔知係咪因為咁，唔敢同公司講結婚問題呢？網上圖片

吳浩康同鍾舒漫都認定對方係另一半，公開戀情後，經常在網上大晒恩愛，煙韌到爆！網上圖片

為咗結婚，吳浩康都好努力賺錢儲老婆本，最近拍唔少電影，新戲《大茶飯》都有佢㗎。

胡定欣甩拖　吳浩康撐舊愛

吳浩康最終同鍾舒漫開花結果，至於舊愛胡定欣就臨門撻 Q，同男友沈柏淳（ Patt）由「婚」變「分」，而 Deep都好維護舊愛說：「其實冇聽到佢分手嘅消息，我會私底下 message慰問佢，佢真係一個好女仔！」

圖片

吳浩康同胡定欣 04年撻着， 06年分手，當時胡定欣對事業霉到谷底嘅吳浩康不離不棄，對於舊愛胡定欣甩拖，吳浩康表示唔知道，但就話佢係一個好女仔。

舊愛胡定欣同馬明分手後就搵到另一筍盤，任職廣告兼開製作公司嘅闊少男友沈柏淳（ Patt），兩人拍拖一年就去到同居關係，仲有傳明年拉埋天窗，只可惜胡定欣週六（ 15日）出席活動時自爆已同男友分手。

羊年婚訊

今年馬年旺嫁娶，下年羊年仲有唔少圈中人拉埋天窗，其中以周董婚事最矚目，呢個消息相信令唔少粉絲葡萄添！

周杰倫曾表示會喺 36歲前結婚，早前仲同女友昆凌高調出遊大晒幸福，有傳婚期定於明年 1月 18日，亦是周杰倫的 36歲生日。網上圖片

王祖藍和李亞男拍拖 5年，王祖藍仲豪花 1,340萬買入大埔獨立屋，有傳王祖藍去年聖誕求婚成功，現今只待愛巢裝修好就迎娶李亞男過門。網上圖片

梁政珏同從事飲食生意男友何思源拍拖 1年，自爆對方先後兩次求婚，自己已經視佢為結婚對象，計劃明年拉埋天窗。網上圖片

鍾意就快D Share啦！

下一篇 》