掃呢頁CODE去手機

2014年11月19日 星期三

[FACE - 391] 挑戰蕃茄飯呀! MF,




全知言

挑戰蕃茄飯呀!

今期至 hit嘅「蕃茄飯」,有得食有得玩,你試過未?就連「小杜大廚」杜汶澤都落手落腳煮埋一份,賣相一流,網民都勁 like!今期全知言都緊貼話題,訪問一班藝人喺屋企肚餓時,究竟會 D.I.Y咩食物?唔好以為女藝人怕肥, D.I.Y嘅食物一定淡而無味,詩雅就話會喺「蕃茄飯」加重料,炮製出獨一無二嘅改良版添喎!

有營改良版 詩雅

最近都有整好 hit嘅蕃茄飯,食材唔會跟足網上食譜,自己會加啲有益嘅食材。飯會用紅米,纖維高啲,想瘦身、腸胃唔好嘅人就最啱,一殼普通米加半殼紅米,紅米硬身啲,可能要浸五至十分鐘,之後落少少鹽、橄欖油;另外仲會落埋粟米,因為甜甜哋食都會開心啲。所有材料放晒落去,蕃茄就要揀啲熟啲嘅,頂同底部都要開一個窿,成個蕃茄倒轉擺係米上面,之後就可以蒸,不過我想特別同營養啲,最後仲會落多隻蛋撈勻食。

秘製牛肉飯 雨僑

我會煮好似喺日本食到嘅牛肉飯。首先將洋蔥切成一絲絲,牛肉就用味噌醃一醃,跟住就會先炒洋蔥,炒軟之後再兜埋牛肉一齊炒。呢個飯都有個汁,都係用味噌、日本鼓油,再加少少生粉,等個汁可以稠啲,最後將呢個汁同牛肉一齊炒,鋪落飯上面就完成。

女神搓麵粉 謝安琪

如果唔係太肚餓,我就會整一個自製意粉。自製意粉真係要搓個麵團,用一部整意粉嘅機去碌扁,再𠝹成唔同嘅粗幼度,可以整好多唔同嘅粉。至於調味汁簡單就得,好似近排好 hit嘅蕃茄飯,蕃茄焗熟之後將佢整碎,加少少橄欖油同鹽,鍾意可以加埋蒜蓉。自己就比較鐘意白汁,會用全脂鮮奶,再加芝士落手整。

肥爆芝士麵

我會煮一個韓式嘅辛辣麵,仲會加埋生雞蛋同芝士。首先煮好辛辣麵,將調味料放入碗。我習慣先倒啲麵落碗,之後先加湯,湯啱啱蓋過麵就可以,再將生雞蛋撈勻,個麵就會變得好滑,同平時食開嘅辛辣麵好唔同,最後擺埋塊芝士喺上面完成。

Liddy嘅韓式芝士麵又有蛋又有芝士,未食都覺得吸引。

芝士年糕辣麵 趙頌茹

我比較鐘意食年糕,屋企一定會有芝士,加上又鍾意食辣,所以我會整傳統芝士年糕辣麵。因為上海年糕喺街市就會搵到,我就會用薄薄嘅上海年糕落水滾一滾,之後就加公仔麵一齊煮,最後落埋芝士就可以食得。

街坊要快靚正

藝人對食方面就梗係會要求高啲,反而一班升斗市民就簡單得多,最緊要快、靚、正!

Carmen:

如果我喺屋企肚餓嗰陣,都係煮個公仔麵,最多加蟹柳同雞蛋。

Johnny:

啱啱見到個蕃茄飯都幾特別,遲啲都會試吓。我得閒會煮意粉,會用啲罐裝嘅調味汁加埋落去煮。

Candy:

肚餓嗰陣,我自己就鍾意整三文治,加隻煎蛋就算,只要有雞蛋同麵包就夠。



鍾意就快D Share啦!