孭住囡囡的東東，不時會望吓個女、錫吓佢，慈父相出晒嚟，看來十分享受湊女樂。
娛樂喧
幫襯街邊檔 陳曉東強國「奶爸」湊女
去年升呢做人夫兼人爸的陳曉東，自 7月愛女朵朵（陳芷霖）出世後，東東萬事都以愛女行先。一向貪靚的他，無懼破壞型男形象，經常孭住個女走天涯，更自嘲「奶爸」。
奶爸東東話餵奶、換片冇難度，連湊女出埠都搞得掂。不過東東似乎習慣了強國生活，堂堂大明星竟然幫襯街邊檔果汁。護士出身的陳太，曾揚言會餵人奶，希望街邊飲嘢冇影響奶水質素啦。
一直恨做爸爸的東東，去年初奉女成婚， 7月太太王妤嫻誕下女兒朵朵（陳芷霖）。由於東東愛女情切，所以未夠 3個月的朵朵，已跟隨爸爸四圍飛，走遍中港台。最近東東更一家到泰國旅行，在嚴寒的冬天，與朵朵享受父女暢泳。
硬食二手煙
東東少見朵朵一日都會心掛掛，所以他計劃女兒將來在哪兒讀書就會將事業基地轉到該處。他表示：「囡囡搵到學校後，我會將事業基地都搬到同一地點，唔想因為工作太長時間同佢分隔兩地。」果然萬事以囡囡為先！
早前本刊記者在北京外交公寓樓下的商場，見到東東一家三口準備搵餐廳吃飯。東東孭住朵朵拖住老婆到商場二樓的 AVOLA意大利餐廳。吃了近一小時後，東東獨自走到商場外嘆支飯後煙，嘆完煙仔後他就返餐廳會合老婆。雖然東東係廿四孝爸爸，不過抽完煙成身煙味的他即刻抱囡囡，朵朵變相要硬食他的二手煙，似乎唔太健康。
東東除咗錫朵朵外，亦好錫老婆。他們離開餐廳後，孭住囡囡的東東仍拖實老婆。他們沿路行返寓所時，唔係拖手就繑手，兩人談天說地好不開心，完全感受到他們一家三口的幸福。
幫襯街邊檔
當兩人經過流動小販檔時，王妤嫻想買果汁，東東即開一樽來試，一口氣喝了大半樽，便遞給太太飲。果汁都要兩份飲，兩夫婦真箇分甘同味。已將事業基地轉到內地近十年的東東，抵抗能力高咗，竟無懼地溝油、黑心肉新聞，幫襯街邊檔，仲夠膽買多兩樽返屋企。見小販隨手拎起生果，生果同把刀洗都冇洗，真是戥他們牙煙！
型男湊仔公
湊仔唔係女人專利，娛樂圈好多型男湊仔公，新鮮出爐嘅視帝郭晉安、張晉同張丹峰等，個個都係廿四孝老竇，湊仔零難度。
|
鍾意就快D Share啦！
|
|
|
