[忽然1周 - 1014] 譚校長慶完又慶 40年 成龍苦笑撐場 譚校長,成龍,譚詠麟,MW,

媽咪姐

譚校長慶完又慶 40年　成龍苦笑撐場

話咁快，就同好多事發生嘅 2014 say咗 bye喇！媽咪姐喺度祝各位俊男美女新一年 day day都 happy！乜都假，最緊要身體健康、平平安安呀！最好似譚校長咁，得閒踢吓波鬆筋骨，再得閒啲就搞吓紀念演唱會 happy吓！好似今次佢慶祝入行 40年，先喺上年 11月喺大台做咗個騷，話都無咁快，周二（ 12月 30日）晚又喺九展擺咗 38圍慶多次！跟住呢，今年 2月佢會去紅館開 12場入行 40周年演唱會，再慶呀！

咁喜慶嘢，梗係唔怕做完再做嘅，志在大家開心啫。好似譚校長老死志偉就搞笑話：「佢應該送嘢俾我哋支持咗佢咁多年係咪先？（想收咩？）梗係錢搵咁多又唔知點使。譚詠麟開演唱會我一張飛都冇，我問佢有冇飛？佢話你喺我褲袋搶錢好喇！真係無良心呀。」

其實 64歲嘅校長可以唱足 40年，又有咁多好朋友，又真係好值得高興嘅。呢晚連心煩到爆嘅成龍都俾面嚟賀佢！不過祖名仲喺大陸被扣押，唔知會判幾耐，做老竇嘅，真係唔多笑得出，都仲未計最近有人貼街招唱衰呢！所以成龍成晚都只係坐喺台下搵班老友傾吓偈訴苦，無好似以前咁衝上台搶咪唱歌。

嗯，新年新希望，各位都加油

呢排忙緊新片《絕地逃亡》嘅成龍，難得俾面到賀。不過，笑容牽強，全晚酒都唔飲多啖。隔籬嘅志偉，就例醉。

呢晚雲集晒當年最大唱片公司寶麗金嘅台前幕後。有晒 face嘅譚校長，攬實 warm up完、終於舉起招牌 V字手嘅成龍。係啦，放鬆啲！

當年寶記多美女，關淑怡、鄺美雲同王馨平鬥擺 S形甫士，功架喺番度。

睇吓呢張相，個個塊面紅過關公， high晒！

不過最 high都係彭健新！呢晚譚校長攞咗十幾萬出嚟抽獎玩遊戲。阿健仔就喺包剪揼大賽中贏咗。嘩，過肥年！

今年至 hit嘅度身訂造可樂，校長都有！

會場布置都幾有心思，呢塊校長回到少年時嘅布景板，正喎。

譚校長好孝順，呢晚叫埋媽媽陳珍妮嚟 happy吓。譚媽媽見慣大場面，見到記者瞇瞇笑。

鍾意就快D Share啦！

下一篇 》