陳詩琪 Yvette 20歲 理大紡織及時裝設計系 Yr.2
U花 U草
新嘢唔啱口味 理大潮女迷古着煲舊片
好多女生都貪新厭舊，新鞋、新衫、新袋，最好可以日日去濕平，一定爽死。
現就讀理大紡織及時裝設計系高級文憑 Yr.2的陳詩琪（ Yvette），都係典型購物精，不過新嘢唔係佢杯茶， Yvette對古着情有獨鍾，一有時間就仆去古着鋪頭潮聖兼掃貨。「古着獨一無二，包唔會同同學撞衫，價錢仲平好多添。」
成日聽人話古着唔知咩人着過，小心隨時帶埋啲「污糟嘢」返屋企， Yvette就一定揀唔會太舊的古着，「古着分四等級，一、二級只係前用家，着咗幾次，好似新貨，另外三、四級就係啲好有歷史，特別有啲軍服，係二戰時期，我個朋友就試過買過這類衫，後來先發現衫入面有血跡，所以我一定唔會買太舊嘅古着。」
Yvette除了愛古着，亦好迷懷舊西片，由上世紀 20、 30年代，到 60、 70年代都會狂煲，「我最鍾意係《亂世佳人》嘅 Vivien Leigh同《埃及妖后》嘅 Elizabeth Taylor，淨係呢兩齣戲，至少睇過七、八次！以前啲情節好慢，一 shot落，演員要一 take過演，好考演技，加上當時冇特技，全部係實景，千軍萬馬都係真演員，觀眾睇得投入好多。」
|
鍾意就快D Share啦！
|
|
|
