2015年10月15日 星期四

百萬人情賀盛品儒蔡一鳳 吳佩慈男友好重手 [壹週刊 - 1336] 盛品儒,蔡一鳳,吳佩慈,M1,



娛樂偵訊

百萬人情賀盛品儒蔡一鳳 吳佩慈男友好重手

亞視前高層盛品儒上週四(十月八日)跟有米妻蔡一鳳,在四季酒店筵開四十多席補擺婚宴,到賀嘉賓大部分是前亞視藝人以及盛家的政界朋友,其中包括前民政事務局局長何志平及太太胡慧中。原來當日蔡一鳳的新老闆紀曉波亦有出席,低調現身的他,更豪氣送上一對十卡重、價值過百萬的鑽石耳環做賀禮。做人情都咁重手,同紀曉波生完一個又一個的台星吳佩慈,銀行保險箱應該滿瀉。

嫁妝唔敢放香港

婚宴後第二日,蔡一鳳孖住老公盛品儒出席馬場活動,據知當日二人其實要將父母送的十多套嫁妝首飾,以及大堆金器賀禮,護送返澳門屋企,活動後,二人便坐直升機飛返澳門。

「有諗過放喺香港先,但真係唔放心!我同 James(盛品儒)成日都出門做嘢,喺屋企時間唔多,媽咪都贊成拎返澳門安全啲,因為佢已經幫我開定咗幾個保險箱。其實婚宴嗰晚都戴唔晒啲首飾,不過呢啲全部都係媽咪心意,我媽咪一直都有收藏珠寶嘅習慣,嗰晚我戴咗套綠寶,係好多年前媽咪喺拍賣會咇返嚟,當時都好似要成五百幾萬,而家值幾多錢就唔知。」蔡一鳳說。

收到老闆十卡鑽石耳環,蔡一鳳即時放手指做對比影相。

當晚配襯白色晚裝的鑽飾,蔡一鳳說是用媽咪多年前開始儲起的鑽石而造,頸鏈加耳環再加手鈪,大概 150卡。

蔡一鳳新老闆紀曉波 (《蘋果日報》圖片)

收大禮要遲啲生

媽咪送珠寶,爹哋更直接!二人結婚前,已經開了張一千零八萬的好意頭支票給兩公婆。收下不計其數的首飾金器,不過,就以老闆紀曉波所送的過百萬鑽石耳環,令蔡一鳳最驚喜。

「我嗰日都唔知佢送份禮咁大,因為好忙冇時間拆禮物,直至第二日先知。老闆不嬲都對員工好好,佢知道我鍾意珠寶,所以揀咗呢對耳環俾我;收到咁大份禮,之後我要俾心機做嘢!老闆嗰晚有嚟飲,佢仲同我老公講,話要做好業績先諗生 BB。」

羅霖是亞視之友,當日跟鄭明明齊到賀。

當日有十一部花車,其中一部是噴了 Tiffany Blue的 Bentley跑車,價值逾三百萬。

徐淑敏當日做姊妹,著住婚禮主題藍色晚裝坐足全程,十分俾面。

二人出席完馬場活動,盛品儒手攞住大袋首飾搭直升機飛澳門。

胡慧中當日孖住老公何志平到賀,在酒會現場則各自跟朋友打招呼。

又打工又做老闆

年多前投資開珠寶店的蔡一鳳,一直身兼澳洲墨爾本皇冠酒店澳門區的賭場副總裁,數月前,被紀曉波高薪挖角,轉到博華太平洋做 Chief Marketing Officer(首席巿場官),由於公司在塞班島正發展大型項目,包括度假村、酒店、賭場等,婚前一星期,蔡一鳳也要周圍飛去外地開會,所以生 B大計,她已同老公講掂數,延期!

「公司個 project投資咗七十五億美金,計劃估計要三至四年完成,日日都使緊錢,所以好大壓力。我老闆自己喺塞班島買咗好多地,應該有兩成都係佢名下,我哋而家開始做好多設計工作同招聘人手,生 BB真係要再等吓。」蔡一鳳說。

這套過百萬的足金手鈪,由蔡母所贈,由於設計頗複雜,蔡一鳳也要搞一輪才戴上。

由於當日以母親贈送的金鈪襯裙褂,她惟有將親戚送的龍鳳鈪拍照。

這套紅寶首飾過百卡,分量十足,蔡說:「我戴住耳環敬茶,因為太重,條鏈冇戴喇。」

購於多年前的瑪瑙,蔡說:「粒粒都一樣大,而家好難搵到。」

這套藍寶首飾購於多年前,蔡說:「朋友叫媽咪讓俾佢,媽咪都唔肯。」

切蛋糕時戴的一套綠寶首飾,是蔡母多年前在拍賣會投得,當時已經要五百多萬。

錢多女多

過百萬首飾當人情的紀曉波,是澳門天行國際行政總裁,永利集團股東之一,他亦有投資房地產及礦業等,據估計身家有幾百億。

大把錢,自然係娛圈女星的金礦筍盤,有傳跟郭富城甩拖後,熊黛林也曾跟這位賭場大亨發展過,當時,紀曉波已有正印女友吳佩慈。 13年吳佩慈承認未婚懷孕,並稱男友親到台灣見家長,又送她十卡定情鑽戒;雖從未公開男友身份,但紀曉波是經手人,則是圈中公開秘密。

吳佩慈唔介意做未婚媽媽,佗女期間,紀曉波又與國產女星李冰冰傳出緋聞,不過吳佩慈早前公開一家三口溫馨相,可見地位鞏固。

塞班島度假村

撰文、攝影、攝錄:娛樂組

鍾意就快D Share啦!
Related Posts Plugin for WordPress, Blogger...