熱爆娛樂: 童顏文根英　挑戰查案 [壹週刊

2015年10月15日星期四

童顏文根英　挑戰查案 [壹週刊 - 1336] 文根英,M1,

文根英 13歲入行，真係可以話係由細睇到佢大，新劇《村莊： Achiara的秘密》挑戰自己，仲剪咗把長髮，乜唔係因為失戀咩？

電視精

童顏文根英　挑戰查案

韓國人好鍾意將受歡迎嘅嘢前面加「國民」兩個字，例如國民 MC、國民男團、國民初戀等等。而家講起國民妹妹，大家都會諗起 IU，不過其實第一代嘅國民妹妹，係當年喺《藍色生死戀》做童年版宋慧喬嘅文根英。話咁快，文根英都已經 28歲，不過因為一副童顏，好似成日都係做學生妹，發揮有限。要打破框框，文根英今季接拍韓劇《村莊： Achiara的秘密》，飾演捲入殺人案嘅老師，試圖轉型！

接檔《龍八夷》受壓

平時韓劇最鍾意以上流社會或者娛樂圈做背景，今次《村莊： Achiara的秘密》就好唔同，故事發生於一個小村莊 Achiara，意思係一個小蓮花池，一向風平浪靜十分和平，文根英飾演嘅女主角係英文老師，偶然來到 Achiara任教，點知喺佢到達村莊第一日，就發現一具埋葬已久嘅屍體。村落頓時失去安寧，村民都將矛頭指向街外人文根英。喺村莊做警察嘅陸星材決定幫助文根英洗脫嫌疑，於是開始一齊尋找真相，不過深入調查後，發現平時表面平靜嘅村莊，原來有好多不為人知嘅秘密，掀起一場風波。《村莊： Achiara的秘密》緊接於《龍八夷》之後播出，《龍八夷》嘅平均收視超過 18%，成績咁好難免為新劇帶來壓力。播出第一、二集口碑唔錯，每一集嘅推理部分唔會太多太悶，反而着重人物描寫，不過講查案始終吸引唔到師奶，收視率一下子跌咗十幾點，之後真係要好好努力搶客！

以前文根英嘅角色，好多都係少女、學生，今次要收起笑容，反而要做好多陰沉嘅表情，形象 180度轉變。

故事由發現一副骸骨開始，可以先劇透少少，其實死者係美術學院老師，仲係村莊入面最高權力者嘅情婦，事件嘅發展就要睇落去先知。

文根英今次飾演英文老師，仲要喺小村落任教，有劇迷就覺得太樸素，收視率好難有突破。

與陸星材譜姊弟戀

女主角文根英上一套電視劇係兩年前嘅《火之女神》，當時佢仲同劇中男主角金汎擦出愛火花，公開承認拍拖，可惜上年已經分手，之後一直醫情傷無工作。今次係文根英相隔兩年再演電視劇，為咗突破自己，更加不惜將留咗五年嘅長髮剪短，形象轉變希望可以帶來新鮮感。佢話自己一向都好鍾意懸疑推理嘅戲種，所以睇完劇本已經決定要接拍。女主角嘅性格看似柔弱文靜，其實果斷勇敢，文根英完全演出神髓，選角非常恰當。一向配搭一線男星嘅文根英，今次嘅對手係細佢八年嘅陸星材。呢位來自男子組合 BTOB嘅新人，因為演出校園劇《學校 2015》而走紅，短短幾個月就坐上第一男主角嘅寶座，證明唔係得個樣。今次做一個有正義感嘅警察，平實嘅性格先至最難演，不過前輩文根英大讚佢係可造之材，唔知同呢個小弟弟會唔會擦出愛火花呢？