掃呢頁CODE去手機

2015年10月15日 星期四

陳國邦:無工開咪揸 Uber 羅敏莊:我賺錢 [壹週刊 - 1336] 羅敏莊,陳國邦,M1,



探熱針

陳國邦:無工開咪揸 Uber 羅敏莊:我賺錢

入行二十六年的陳國邦,最近發公開信撇無綫。離開工作近十五年的 comfort zone,但他其實並無後着。心口寫住個勇字,除了老婆羅敏莊願意賣唱頂住頭家外,陳國邦聲稱若然無工開最多揸 Uber,好過原地踏步,變成發黑發臭的死水。

老婆撐起頭家

已經四十七歲,陳國邦人到中年決定出走,最大後盾,是他的頭號粉絲羅敏莊,見另一半工作得不開心,實在不願看到他為了份餓唔親又食唔飽的人工,磨滅對演戲和做人的意志。

「當日同老婆講,佢已經好支持我。不過當時佢都話用呢個方式(寫公開信),返唔到轉頭喎!我話我就係唔想俾自己返轉頭,再徘徊喺唔開心狀態。若果留喺 TVB,我一定繼續有工開,因為好多人欣賞我。」陳國邦說。

對於另一半放手一試外闖,羅敏莊舉腳贊成。

「其實我老公成日都同我講,辛苦你嘞!咁多年都靠你撐起頭家。我會同佢講:『唔辛苦,做騷賺錢係我興趣,我興趣係賺錢,佢興趣係做戲。一個家庭唔係一個人去負擔,邊個有能力咪邊個擔多啲,頭家係大家共同建立。』」羅敏莊說。

風大雨大,未來更是未知之數!

「出咗去好定唔好,邊個會知?若然出到去真係冇嘢做,我有諗過去揸 Uber,如果已經合法的話。冇後着就跳出 comfort zone,我就係要睇吓條命會係點!(對未知有冇恐懼?)恐懼夾雜興奮,呢個係我做戲需要嘅生命,太過安逸未必有呢個動力。」陳國邦說。

對老公百分百支持的羅敏莊說:「我老公係人做佢唔做,殺出條血路,佢永遠唔鍾意按本子辦事。」

三歲女兒陳禛,令為父的陳國邦學會為將來多作點打算。

恨升職好正常

三年前在台慶劇《大太監》,當配角的陳國邦飾演「彭三順」一角,矚目程度泊住主角黎耀祥。角逐最佳男配角,縱使敗給另一大熱古明華,但他抱住從此得重用的希望。

「當時得到同事、觀眾咁多認同,的確會諗:『今次升職嘞啩!點知又再一次升唔到。』其實《大太監》之前,已經成日經歷以為升職最後又升唔到,我覺得咁嘅心態好折磨自己,驚咁樣遲早會磨滅我嘅意志。喺公開信中,我話用咗十五年時間,希望以我嘅能力換取被賞識做主角機會。我想用每個打工仔心態比喻,難道你做一份工,唔想升職咩!點解換轉喺娛樂圈,想由配角做到去主角,就叫貪慕虛榮。」

眼見近年一個個後輩包括張繼聰,甚至冇乜表現、連名都唔係人人講得出的何廣沛、黃子恆都迎頭趕上成為男一男二,也難怪陳國邦難堪。

「我離開唔係單單因為冇主角做,喺呢度十五年,工作表現大家都睇到,老闆成日讚我,但比我遲入職嘅都升咗。我唔會怪人哋,呢個係佢哋嘅際遇。有酸溜溜,因為呢個係陳國邦嘅責任,我有咁嘅情緒係我嘅問題,我解決唔到呢個情緒,咁咪揀離開。」

珍姐雖以不可惜回應阿邦離巢,但阿邦講到感激對方背後稱讚他時,一度眼泛淚光。

做另一個黎耀祥

原來,陳國邦有想過可以做第二個黎耀祥。

「梗係想!祥仔第一次攞視帝之後,俾我一個好大盼望。一路以來,好多人會將我哋兩個比較,我相信祥仔唔介意,我哋個子唔高,樣貌唔出眾,憑嘅係對演戲熱誠,係同類人,我當然希望都得到咁嘅機會。封信出咗後,我睇到祥仔公開回應講:『希望阿邦將來有我嘅際遇。』」陳國邦說。

公司不器重,但上有政策,下有對策,欣賞陳國邦的監製,多的是。

「今年雖然拍得一部《公公出宮》,但唔係公司唔俾劇我拍,我仲有另一部係監製張乾文搵我,拍住郭晉安同楊怡,我嘅戲份重到係第二男主角,影埋海報我係喺中間位。點知《公公出宮》要延遲開,仲要返內地取景,兩劇重疊咗時間,我分唔到身。命運就係咁,若果唔走,或者下年我真係做咗主角呢!」

敲響一潭死水的警鐘,阿邦話源於有次跟一位資深演員做對手,對戲時對方拋下一句:「算啦,跟住做就得」的求其作風,提醒阿邦意志不能磨滅。

公開告別信前,跟《大太監》戰友黎耀祥、曹永廉及黃浩然聚會。「當時好想逐一攬住佢哋道別,但冇咁做,因為怕被勸服留低。」

從不老作

因為呢本書內頁一句,令阿邦產生共鳴而買下研究。

今時今日,演員認真對待自己的崗位,不可多得!陳國邦入行快二十年,至今每接到角色,無論戲份多少輕重,都熟讀劇本,更要經常補充不同知識裝備自己,贏得外界欣賞與認同,絕非僥幸。

狂刨歷史

認為演好古裝戲,需要對歷史有一定認識的陳國邦,家中陳設了一幅中國朝代歷史圖,早前他在台灣做舞台劇,亦在當地買了一本講古代服飾的書籍,不停學習。

熟讀建築

在《建築有情天》飾演建築師,為演得入型入格,陳國邦下苦功鑽研建築書籍,熟讀畫則和建築用語。

高院偷師

在《潮爆大狀》做律師,多次親自到高院聽審,務求演法庭戲時,貼近現實中的大狀。

院舍觀察

為了《流金歲月》中輕度智障人士角色,陳國邦曾留守院舍觀察個多星期,絕非老作。

低潮期自薦

06年,鍾景輝有份演出改編自小說的舞台劇《相約星期二》,故事講學生畢業多年,重逢患重病的老教授,連續十四個星期二都到教授家中,學習人生智慧。

當時正值人生低潮的陳國邦,於是託恩師鍾景輝向中英劇團推薦他做男角,他說:「嗰次係我人生第一次自薦,但心態唔係好健康,我諗陳國邦雖然唔係好出名,假假哋都係演員,加上我同 King Sir真係師徒關係,應該十拿九穩,點知導演古天農話已定好演員,下次先搵我。慶幸當時冇俾我做,否則我嘅自大會延續, 11年,舞台劇重演,古生終於搵我。」

《相約星期二》至今已十九度重演,更在海外多次巡迴,累積百多場,成為劇壇佳話。

離巢發光

廖啟智同周家怡在無綫的日子,一直是不受重用的配角。二人離巢後同時成為港視劇的男女主角,演技贏絕口碑。前者將回巢做男一,女的在電影初擔大旗。

撰文、攝影、攝錄:娛樂組

鍾意就快D Share啦!