熱爆娛樂: AOA透視扭扭樂 [壹週刊

2015年10月15日星期四

AOA透視扭扭樂 [壹週刊 - 1336] AOA,M1,

韓國女團 AOA舉行香港歌迷見面會，玩足兩個鐘， fans都話唔夠喉，希望下次嚟開一個真正嘅演唱會。

外太空

AOA透視扭扭樂

韓國女團一向競爭大淘汰快，喺呢個適者生存嘅娛樂圈中站穩陣腳一啲都唔容易。韓國女子組合 AOA，挾住 CNBLUE師妹嘅名義出道，當時已經備受矚目，出道 3年，終於舉行第一個亞洲巡迴見面會，嚟到香港一站，大玩遊戲加勁歌熱舞，仲以透視裝上陣， fans唯一唔滿意，可能係覺得佢哋圓潤咗少少！

自拍　抱抱　出盡絕招

AOA今次嘅歌迷見面會《 Heart Attack in Hong Kong》，主要分為兩部分，先坐定定傾偈同 fans玩遊戲，之後 mini showcase唱出大熱作品。 AOA七位成員雪炫、惠晶、智珉、草娥、珉娥、徐酉奈、澯美以運動型衞衣配上迷你裙出場，青春學生造型非常討好。七個女仔先用廣東話同 fans打招呼，今次係佢哋第三次到訪香港，仲話好想周圍去玩做吓遊客。

之後就係 fans互動時間， fans喺入場之前寫咗一啲 message俾 AOA，成員輪流抽出，咁難得嘅機會 fans梗係唔放過，有幸上到台嘅 fans都爭住同成員合照，仲有男 fans成功得到女神嘅抱抱！其實平時要埋韓國女團身，簡直係難過登天，隨時俾身邊嘅保安一手推倒，不過上到台， AOA嘅成員 nice到幫 fans揸機自拍仲避開反光位，台下超過八成都係男 fans，恨到流晒口水！

話係大細超都無計，女團中總要一個主將特別搶眼， AOA入面有「國民初戀二號」雪炫，現場睇過真係高幾班。

可以同草蛾頭貼頭自拍，呢位男 fans開心到衝上台，台下嘅 fans只可以發出悲鳴。

隊友答緊問題時，其他人唔會呆坐，不停向觀眾席做出心心手勢， fans隨即大叫！

小肚腩現形

賣大包益 fans之後，再有一個問題環節，所有問題都係同香港有關。一眾來自韓星嘅少女，又點會識答，於是就出盡方法引誘歌迷俾貼士，幾個女仔突然大跳扭腰舞、揈水髮，吸引司儀注意，成班女仔自己喺台上玩到放晒， fans喺台下睇到只能夠會心微笑！

睇 AOA玩足個半鐘，終於等到最期待嘅唱歌部分， AOA換上性感嘅透視短裙褲裝，唱出多首大熱作品《 Miniskirt》、《 Short Hair》、《 Like a Cat》，配合佢哋一貫性感嘅扭扭舞，現場 fans叫到拆天！不過成也透視，敗也透視，腰間嘅雪紡固然係性感，不過幾位女孩子唔知係咪周圍巡迴，食多咗嘢，有個小肚腩仔凸咗出嚟，幾位成員都要不斷拉吓件衫驚走光！嚟緊年尾頒獎禮殺到，好多曝光機會，真係要努力啲節食減肥喇！