2015年10月15日 星期四

《阿郎》重生 李健達減五十磅再唱 [壹週刊 - 1336] 李健達,M1,



娛樂偵訊

《阿郎》重生 李健達減五十磅再唱

倒帶 26年,李健達當年主唱兼填詞電影《阿郎的故事》片尾曲《也許不易》彈出,唱片一出已賣白金數量,之後的《天若有情》和寫給徐小鳳的《變色感情》亦大爆,卻因唔聽話,被公司掟入雪櫃,自此近乎銷聲匿跡。去年仍是個二百磅肥佬的他,健康出現問題,聞到棺材香,決定減肥做運動,早前更因為幫失婚江欣燕搞新歌而傳出緋聞,李健達復出之路,愈行愈近。

教嘉樂毛姐唱歌

這些年,匿在幕後搞音樂做製作的李健達,一三年出唱片《久音真經》,今年又計劃開演唱會,決定走上舞台,因為一班挑戰他「教咗咁多,點解老師唔出碟」的學生推動,其中有藝人錢嘉樂、毛舜筠以及緋聞女友江欣燕。

「毛姐唱歌係得嘅,因為係最佳女演員,佢驚俾人話又拍戲又唱歌好模糊,但佢有興趣同鬥志,呢點最重要。(錢)嘉樂係我遇過嘅其中一個奇跡,佢係武師又係演員,仲要係獎門人嘅護法,好多身份,佢最初搵我,我都話要觀察吓,但點知佢咁犀利,可以由零去到咁快,鬥志好高,只係用咗兩個月時間,就可以喺演唱會自彈自唱。至於江欣燕不嬲都係雙棲,所以冇問題。」李健達說。

對於緋聞女友,李健達說江欣燕比他出道早,應該是師姐,去年有機會合作,二人有講不完話題。

「我幫佢一手包辦《 M Club》首插曲,今次合作,我發覺佢好似梅姐(梅豔芳),所以特別好傾,我哋又可以講番以前梅姐、哥哥(張國榮)嘅事。唔知會唔會拍拖,我比較 old school,都係要由朋友開始做起。」

毛舜筠跟錢嘉樂都是李健達的學生,嘉樂在兩個月內學識自彈自唱。

曾經跟郭富城傳過緋聞的程芷渝,也是李健達的學生之一。

李健達跟好友鄭敬基(右一),有計劃開演唱會。

李健達(左一)跟鄧萃雯、劉錦玲等一班教友,多年前齊上嘟姐的遊戲節目《一筆 Out消》。

二百磅企唔穩

去年跟江欣燕傳緋聞時,李健達仍是個徘徊在二百磅的肥佬,朋友形容佢「幾得意」,但因為過胖,身體機能出現問題,有次由北京工作返香港,忽然整個人平衡唔到,幾乎跌低。

「二百磅嘅人跌一跌好危險,醫生 check咗話我耳水不平衡,但食完藥都冇改善,之後就驗到有糖尿病、高血壓。當時要食好多藥,但食咗一個月都冇起色;我開始做運動,同時睇好多書,尤其有關草本藥,醫生又推介我做一種高速運動,加埋改變飲食習慣,兩個月內減到一百七十三磅。我走啱方向,又肯落功夫,好快就行得番,唔再一行就見暈。」現時一百五十磅。

大學讀心理學,李健達明白病痛跟心理是互相影響,健康差,情緒自然不好。

「我當時未到黐線,但肯定唔算正常,因為平衡唔到,成日都好驚,應該有抑鬱。」李健達說。

1989年,周潤發主演的《阿郎的故事》大賣,李健達主唱的片尾曲《也許不易》也唱到街知巷聞。

2014年  200磅

李健達於 1989年加入樂壇,《也許不易》外,《天若有情》都是出自他手筆,年少氣盛,後來因「不聽話」被公司雪藏,便退居幕後。

李健達出道時,已故樂壇天后梅艷芳已經大紅,愛提攜後輩的梅姐對他十分友善。

撰文、攝影、攝錄:娛樂組

鍾意就快D Share啦!
Related Posts Plugin for WordPress, Blogger...