掃呢頁CODE去手機

2015年11月5日 星期四

長約綁住 孤兒仔黃智雯逆來順受 [壹週刊 - 1339] 黃智雯,M1,



同謝瑞麟珠寶高層詹文天拍拖兩年,兩人外出都甚少拖手,十分低調。

探熱針

長約綁住 孤兒仔黃智雯逆來順受

屬於前無綫製作部戲劇總監梁家樹( Tommy)馬房的黃智雯,自從去年對方離巢後,逐漸由重戲的女二淪為花瓶,變成陪襯黃翠如、陳凱琳的大茄,無奈合約有排都未滿,惟有逆來順受!

同李思捷拍完《爸 B有話兒》後,黃智雯得閒到做跟得女友,男友詹文天有嘢做,她就孖住奀星趙希洛、鄭瑩瑩放狗 high tea, hea幾個鐘等男友收工,灰爆!

忍氣吞聲

娛樂圈,七分人事三分運氣,原屬梁家樹一黨的黃智雯,曾經機會不絕,一二年更憑住《缺宅男女》中關二嫂一角,彈上女二位置;同年更在無綫《萬千星輝頒獎禮》獲得「飛躍進步女藝員」獎,之後一年拍四劇,套套重戲有發揮,以此走勢黃智雯今日理應穩站女一。

可惜事與願違,梁家樹去年離開無綫後,失去大靠山的黃智雯短短年半間,事業逆轉!即使在《師奶 Madam》保住女二位置,但角色發揮欠奉,淪為黃翠如陪襯;之後拍《張保仔》更慘烈,做大茄!縱使在《拆局專家》擔正,但角色卻是個冇發揮的花瓶。

機會過去,但同公司簽落長命契冇得走,想在事業有番作為的黃智雯,只好忍氣吞聲,搏一線生機。

「以前 Tommy同珍姐(曾勵珍)爭崩頭,兩邊唔妥到出面, Tommy走咗曾姐睇晒,樹倒猢猻散,佢啲人邊會有運行! Mandy(黃智雯)都知自己係孤兒仔,但佢更加清楚珍姐鍾意人聽話,少聲氣多做事,所以之前就算要返大陸拍《張保仔》做大茄,佢都無出過半句聲;公司逃亡潮,如果佢爭氣,可能有機會上番去。」一名無綫人員說。

梁家樹在位年代,黃智雯每年都有機會拍重頭劇,包括 11年與鄭嘉穎合作《怒火街頭》。

在家品店各自活動,詹文天睇傢俬,黃智雯睇化妝袋。

無以為繼

緊守崗位一年,公司再度安排黃智雯擔正,和李思捷合作新劇《爸 B有話兒》,即使新劇角色純粹陪襯,但都叫做坐正,好過冇。但拍完《爸 B》後,又無以為繼,黃智雯可以專心拍拖,時時刻刻陪住在謝瑞麟珠寶做高層的男友詹文天。

日前,黃智雯同男友去數碼港睇戲,散場後,再去 Indigo行家品店,詹文天主攻傢俬、燈飾,黃智雯則對擺設飾品較有興趣,見她攞住個花花化妝袋睇完又睇,但最後都忍手。

黃智雯去洗手間,男友篤住手機等。

《張保仔》陳凱琳、洪永城孭重飛,黃智雯奉命做大茄。

是日男友唔得閒,黃智雯吹雞,搵趙希洛(白衫)、鄭瑩瑩(紅衫),三人四狗去淺水灣 hea時間。

放狗 hea過

男友唔得閒的話,黃智雯就搵 friend陪攝時間。早個禮拜,她便約了兩個老死趙希洛和已離開無綫的鄭瑩瑩,同到淺水灣廣場放狗 high tea,三個人各自嗌了杯白酒,由晚上七時一直 hea到接近十時,其間,同鄭瑩瑩一齊去洗手間,熱褲打扮的黃智雯,惹來途人留意,「原來佢真人唔高又大隻,得個頭。」

熱褲上陣的黃智雯,十分吸睛。

《缺宅男女》中的潑辣關二嫂,令黃智雯人氣勁升。

黃智雯在以男角為主的《飛虎》中,有多場動作戲,極有發揮。

再坐正做女一,同李思捷、陳智燊合作新劇《爸 B有話兒》。

失靠山

一朝天子一朝臣!不論 10年涉貪案出事的陳志雲,抑或去年梁家樹榮休離巢,轄下愛將失去靠山,例必被投閒置散,長期坐冷板櫈。

王祖藍

被視為前戲劇組高層梁家樹愛將的王祖藍,於《老表,你好嘢!》、《食為奴》等劇擔正男一,去年梁家樹榮休,自此王祖藍冇劇拍,約滿後,他立即轉投邵氏,自組製作班底。

廖碧兒

「迷雲黨」之一的廖碧兒,曾是無綫一線花旦,陳志雲出事後,廖碧兒因為腰傷向公司請假,竟被質疑詐病講大話,其後,她主動向無綫提出凍薪續約,大台亦毫無反應零興趣。

陳敏之

曾受無綫力捧, 11年更憑《怒火街頭》獲「最佳女配角」,陳志雲離巢後,陳敏之工作量大減,常被安排做三四線角色,於《怒火街頭 2》亦只是客串。

撰文、攝影、攝錄:娛樂組

鍾意就快D Share啦!