掃呢頁CODE去手機

2015年11月5日 星期四

漏水冇生意 莊思敏時裝店收檔 [壹週刊 - 1339] 莊思敏,M1,



娛樂偵訊

漏水冇生意 莊思敏時裝店收檔

鍾意做事頭婆的莊思敏,年初摺埋經理人公司後,跟孖妹莊思明、莊思華及幾個朋友夾份投資在中環的時裝店 TINSELTOWN,開業三年有多,今個月亦要閂門。原來早前大廈爆渠漏水,店內的高級晚裝幾乎全部浸濕,追討賠償業主又闊佬懶理,冇生意加上租約期滿,幾經考慮,莊思敏決定收檔唔玩。

執貨清場

時裝店位處的大廈一個月內兩度爆渠漏水,大部分貨品被浸壞,莊家姊妹就算影低證據,但業主依然得個拖字,唔肯向租客作出賠償。

「鋪頭有買保險,不過漏水之後,一直聯絡唔到業主傾賠償,而家過咗半個月,對方都冇覆過佢哋。」知情者說。

上週五(十月三十日)黄昏,莊思明見冇客,索性執貨開始清場,將貨放入紙皮箱搬埋一邊,跟住抹埋櫃,收拾了一個鐘,再將幾袋物品搬上車離開。

莊思明執貨清場

莊思明在店內執頭執尾,準備離場。

時裝店有機會重開,莊思明將放在店內作裝飾用的盒抹乾淨,然後拎走。

開業一年,時裝店搞 catwalk show,兩姊妹也有份行 show宣傳。

上月中,莊思明將店內嚴重浸水照上載微博,炮轟業主未有即時善後。

搵地方再開

「原本佢哋幾姊妹同班股東商量過,打算續租做落去,因為呢幾年儲咗班熟客,點知業主一直唔肯同佢哋傾,而家仲搞成咁,對方直頭唔見咗人。其實 claim埋保險業主又肯賠嘅話,都應該唔使蝕。

「執咗間鋪,大家都覺得可惜,因為放咗好多心機落去,不過佢哋都有共識,如果搵到啱心水嘅地點,好大機會再開番,所以會將啲未賣出嘅貨,租個倉存起佢先。」知情者說。

時裝店開張,莊思敏連同莊思明等一班股東,著低胸貼身裙出席剪綵儀式。

莊思敏早前入股點心店,跟人氣卡通「蛋黃哥」搞 crossover,推特色點心。

莊思敏今年不停接戲,上月初接拍《神行太保 2016》,跟古天樂合作飾演情侶,不過她投訴冇拖手戲份。

去年跟朱慧敏及 Eddie等入股華星客棧,莊思敏努力推廣,更試過在餐廳幫手賣包。

損手

年初續約蕭定一袋走 1,500萬,莊思敏連接多部電影,以為有運行,點知其他投資瓣瓣蝕住離場!

化妝學校

13年跟好友化妝師合資開化妝學校,雖然一直有錢賺,但去年卻發現有人穿櫃桶底,結果搞到要報警。

模特兒、經理人公司

14年碌盡人情卡,個人名義投資過百萬搞模特兒及經理人公司,因信錯朋友,由賺變蝕,執笠前三個月更是零收入,壯士斷臂,莊思敏斬纜止蝕。

撰文、攝影、攝錄:娛樂組

鍾意就快D Share啦!