掃呢頁CODE去手機

2015年11月5日 星期四

女神的奇蹟 專訪有村架純 [壹週刊 - 1339] 女神,有村架純,村架純,M1,



日本新一代女神有村架純前年憑住《海女》成為一線女星,今次訪港宣傳新戲《奇蹟補習社》,仲走訪戲院謝票,觀眾梗係男性居多。

外太空

女神的奇蹟 專訪有村架純

近年女神一詞崛起,想成為女神,唔係個個可以。來自日本嘅新一代清純女神有村架純, 2013年演出大熱日劇《海女》,氣質猶如翻版小泉今日子,成功上位。新戲《奇蹟補習社》拋棄清純形象, MK look扮飛女,因為補習老師嘅教導,努力讀書考入大學,勵志故事於日本獲得近 30億日圓(約 2億港元)票房,打低唔少大製作!

女神被神化,不過其實佢幾經辛苦先可以入行,「要成功,除咗努力別無他法,就像女主角一樣。」女神的路還有很長,走得下去的才可以延續奇蹟!

成功需苦幹

有村架純近年喺日本幾乎每一季都有日劇上檔,今次專程抽時間嚟香港宣傳《奇蹟補習社》,始終第一次擔正做女主角,係事業上嘅轉捩點。電影改編自真人真事,講述一個淨係識得玩嘅 MK妹沙也加,成績一向全班包尾,後來遇上補習社老師循循善誘,最後考上老牌名校慶應大學。戲中主角對學習毫無概念,有村架純就話自己都唔係叻學生,數學特別差,最叻係體育同科學。讀書唔成,唔一定無出息,佢睇電視,覺得自己都可以演得到,於是立志做演員,當時只係高中生。漁翁撒網去選秀,終被藝能公司睇中,不過叫佢一年內要減肥同戒鄉音,先正式同佢簽約,之後嘅故事同電影一樣勵志:「我跟沙也加都相信有志者事竟成。像當時我選秀,全部石沉大海,我在想究竟要如何才會被選上,如何為自己增值等等,這些時間真難捱。不過只要抱緊信念,向夢想進發,身邊人也會支持你,成為更大的力量。」

喺《海女》入面飾演年輕版小泉今日子,梳埋松田聖子頭,真係好似。

飾演補習老師嘅係《電車男》伊藤淳史,憑熱誠同經驗成為補習天王,不過年薪無過千萬。

慶應大學係日本首屈一指嘅名校,非常難考入,現實中嘅女主角入讀綜合政策學系,依家畢咗業做緊婚禮統籌。

扮 MK妹唔識潮語

有村架純演開純愛電影,今次一改形象,一頭金髮加 MK妹打扮,佢自己見到都嚇一跳:「我從未試過這樣的打扮,第一次見到時自己都想笑,不過拍攝下來就漸漸習慣了。」外形固然大膽,另一大挑戰係飛女式口吻:「我在拍攝之前上網看了短片,研究飛女的說話方式,她們獨有的潮語,我完全一竅不通。像她們很喜歡說『超』,『超好吃』、『超可愛』等等,或者一些比較男性化的口吻,記對白時真的花了很多時間。」做粗魯角色都係唔啱女神 BB,但係成日演青春愛情片都唔係辦法,有村架純有自己一套想法:「我希望可以演患有絕症的角色,或是喜劇中天真無邪的女孩子。如果可以也想挑戰一些比較深沉或嚴肅的電影,但恐怖片就要再考慮了!」

電影中女主角媽媽無條件支持女兒,有村架純現實都有一個無私奉獻嘅媽媽,演起來特別投入。

金髮、短裙、小背心,典型 MK look,日本叫做涉谷系打扮。偏見覺得,人靚著乜都靚。

撰文:關錦雯

攝影:陳偉傑

攝錄:蕭志南

Hair& Make Up: Kan Satoh

Stylist: Machiko Hirano

場地提供: The Mira Hong Kong

鍾意就快D Share啦!