2015年12月3日 星期四

6度申請紅館檔期 世榮硬開 Beyond騷 黃家強:無承諾可言! [壹週刊 - 1343] __,世榮,家強,Beyond,黃家強,葉世榮,M1,

探熱針6度申請紅館檔期 世榮硬開Beyond騷 黃家強:無承諾可言!曾經表示要追求自己夢想,不會重組Beyond的葉世榮,今年五月忽然轉軚,透露計劃舉行「紀念家駒音樂會」,揚言要拉攏水火不容的阿Paul、家強同台演出,即使家強一早表態唔會做,葉世榮仍先後六次遞表申請紅館檔期。近日宣傳新歌的他,表示阿Paul已經答應上台,更深信以宣揚家駒愛心精神為核心,家強一定會現身。世榮想得美好,被擺上枱的黃家強 ...


探熱針

6度申請紅館檔期 世榮硬開 Beyond騷 黃家強:無承諾可言!

曾經表示要追求自己夢想,不會重組 Beyond的葉世榮,今年五月忽然轉軚,透露計劃舉行「紀念家駒音樂會」,揚言要拉攏水火不容的阿 Paul、家強同台演出,即使家強一早表態唔會做,葉世榮仍先後六次遞表申請紅館檔期。近日宣傳新歌的他,表示阿 Paul已經答應上台,更深信以宣揚家駒愛心精神為核心,家強一定會現身。

世榮想得美好,被擺上枱的黃家強卻愈說愈勞氣:「呢隊組合已經無承諾可言……如果紀念家駒,唔一定要三人同台,我係咪咁重要先!」

女細老婆嫩

自九三年黃家駒離世, Beyond成員黃貫中、黃家強便屢傳不和,十年來不停隔空開火,而一直置身事外的葉世榮,就算兩年多前,曾公開講過不會參與重組 Beyond,但今年五月突然轉軚,向外表示會搞紀念家駒音樂會,並會做醜人、拉攏早已反面的阿 Paul家強上台。

雖然黃家強一早表態企硬唔玩,但葉世榮依然唔死心!過去半年,先後以個人名義,六度入紙申請紅館檔期開 Beyond騷。

「幾年前,世榮以『 Beyond葉世榮』名義,喺內地都可以不停巡唱,就算價錢唔高,但山大斬埋有柴,嗰時佢根本唔恨再拍住阿 Paul家強做 Beyond,但呢兩三年, Beyond不和新聞,鬧到全國都知,世榮已經唔可以再用 Beyond個名搏大霧,用自己名又無號召力,工作愈嚟愈少,老婆仲細自己廿二年,個女先得三歲!真係女細老婆嫩,為咗搵錢,咪惟有搞 Beyond重組囉!」葉世榮友人說。

早前阿 Paul推出新歌《永遠的兄弟》,葉世榮即透過微博讚好。

葉世榮坦言,有去阿 Paul band房搵對方傾合作。

黃家強在《男人幫》演唱會上,開腔表示合作得好開心,當晚家強母親亦有到場撐愛兒演出。

搵定贊助商

即使檔期未批,成員黃家強未答應,葉世榮已急不及待出面敲門搵贊助。

「上次去 band房搵家強傾,家強已經表明唔會再同阿 Paul同台,佢覺得大家去到呢個地步,無可能再一齊,唔想咁虛偽!但世榮仲不斷向外放消息,會繼續搞呢個紀念音樂會,甚至開始搵音樂會贊助,仲同啲客講話阿 Paul、家強已經答應演出,後來消息傳咗去家強耳邊,佢好唔開心!」知情者說。

剛完成「男人幫」香港三場演唱會的黃家強,被問到由葉世榮做搞手的紀念家駒音樂會進度,他說:「仲未再傾,佢(世榮)有送花籃祝賀我開騷,我哋係好朋友,生日會互相問候!但 Beyond要唔要再繼續,唔係我一個人決定,現階段俾唔到答案,唔好講話重組,要離又分開,講啲大家承諾唔到嘅嘢,問心,雖然呢個組合無乜承諾可言,但去到呢個地步,好難勉強!」

近日四出為新歌宣傳的世榮,表示有信心說服家強演出紀念家駒騷。

葉世榮與年輕 22年的嫩妻張偉鈴婚後育有一女,生活擔子不輕的他,向身邊 band友狂呻,好想搵多啲錢。

態度強硬

身為黃家駒細佬,黃家強強調任何人都可以搞紀念家駒的活動,他亦會支持:「我抱住嘅態度係,只要紀念家駒,我都會支持,亦冇考究有幾多做慈善,我唔太過 care。」

至於會否參與葉世榮的紀念家駒騷,黃家強有所保留:「而家男人幫啱啱起步,(工作)排得幾密,要睇番時間配唔配合到!」

當提到世榮表示阿 Paul已經應承上台,葉世榮又不停入紙申請紅館檔期,會否覺得被擺上枱?黃家強開始有火:「如果係紀念家駒,唔需要一定三個人同台,而家唔係黃家強去紀念家駒囉!我參唔參與唔係咁大不了,你為家駒做嘢,唔係黃家強,我係咪咁重要先!」

當年由黃家駒帶領的 Beyond樂隊,四兄弟非常齊心,可惜家駒一走, Beyond變成一盤散沙。

未有自己演唱會,近日阿 Paul只為茜拉香港演唱會任嘉賓。

雖然事業停滯不前,但朱茵卻力撐老公阿 Paul,二人不時網上傳情。

一反常態

自 05年 Beyond解體後,黃貫中( Paul)與黃家強亦正式反面,經常隔空罵戰,而一向沉默的葉世榮,近日竟一反常態,堅決要重組 Beyond。

【被出局】

09年, Paul與家強飛起世榮,於紅館「復合」開騷,舉行三場「 Rock n Roll Live」演唱會。世榮得知後亦表示冇所謂,自己於內地巡唱,已經冇晒檔期。

【保持沉默】

同年 12年 7月,黃貫中舉行兩場「 Paul Wong Rock Star」個唱,被指入座率僅得七成,其後更引發與家強的罵戰,而世榮則繼續沉默,未有回應。

【追尋夢想】

13年,葉世榮到九展開騷,宣傳期間表明不會參與重組 Beyond,對他來說 Beyond 05年已解散,自己年紀亦唔細,時間買少見少,要用餘生追尋自己夢想。

忽然主動

今年 5月,葉世榮先斬後奏,公開宣布會舉行紀念家駒音樂會,更巧妙以「重聚」代替「重組」這敏感字眼,並分別到訪 Paul和家強的 band房敍舊,拉攏二人同台開騷。

撰文、攝影、攝錄:娛樂組

鍾意就快D Share啦!
Related Posts Plugin for WordPress, Blogger...