由於幫忙包糯米糍的女工上午七時就上班，所以 Yorky每天都要凌晨五時多就回店準備：「天未光就要返嚟，蒸定啲皮俾佢哋包，因為蒸一次最少都要半個鐘。午市賣得差唔多又要蒸，平均一日都要蒸六、七轉。」
壹盤生意
外母女婿拆夥 糯米糍風波
有智慧不如趁勢，講到今期流行，非杧果糯米糍莫屬，近日長洲糯米糍在各區「遍地開花」，不少人跟風開店，上演龍爭虎鬥。
三十歲的王若鴻（ Yorky），兩年前任職旅行社，在第二個小孩出世時，有感發展遇樽頸，決定辭職自己開店，問親戚朋友左賒右借籌到三十多萬。經賣了十多年水果的外母搭路，以兩個兒子為名，開了「黃孖記果子」，賣貴價水果，但經驗不足，個個月幾乎「白做」。
今年芒果熱席捲全港， Yorky決定轉型，在長沙灣賣水果糯米糍，暫時賺兩萬多元，可惜與外母關係「由濃轉淡」。難道可共患難真的不能共富貴？
Yorky從入行賣生果到轉賣糯米糍，外母可算是半個伯樂，開業初期她都有到店內幫手，但不久就退出：「間鋪最難捱嗰時，外母話想出去做番老本行賣生果，我由佢啦。後來我知道佢自己偷偷哋賣糯米糍，整到好似我哋鋪咁，又問老婆知唔知啲皮點整。最後外母間鋪續唔到牌，佢又想返嚟我度做，我都請夠人，就話唔好啦。」其實當初 Yorky由外母介紹到果欄入貨，亦不見得有着數：「都冇乜優惠，叫做知吓價錢咁。我見荔枝角多 office，啲 OL又捨得買靚嘢，所以決定喺度開。」為免太太唔開心，對家事他不敢講多半句。
黃孖記現由 Yorky單刀上陣，其出名之處，是每盒糯米糍都用上半個杧果，而外皮則由北海道 3.7牛奶及快達牌椰子汁製成，售價二十多元與街外相若，幾乎不計成本！經傳媒報導，生意上揚，最誇張試過鋪外人龍達七十人！現場所見，午餐時間維持十數名客人購買，以 OL為主，近八成都是女性客人，而且很多都買過百元，令道路水洩不通。附近讀書的映彤，就經同班同學介紹購買：「我哋班每日起碼有五、六個人買嚟食，自己試過士多啤梨味，唔會好粉。我今次買杧果，廿幾蚊都幾大件。」現時店鋪營運尚算流暢，但由於 Yorky創業經驗尚淺，開店時貨量、客人流量等都不太懂處理，令他受到多方批評，他又如何拆解？
挑戰一：順得哥情失嫂意
由於「杧果熱」在暑假開始蔓延，不少客人跨區來購買。由於 Yorky當時未想到要請人，但以一人之力難以應付大量客人，最後要出到限時、限量及派籌。不久就被客人投訴：「我限一人最多買六盒，俾客人話我賣到好寸，又話我懶巴閉要派籌，其實我都唔想！」他透露當初只可包三百盒糯米糍：「我啲貨同工場貨唔同，即包即賣。自己朝早四點幾包到夜晚六點幾七點，但都係做唔切！」 Yorky指雖然收到不少網上投訴，但當中亦有善意批評，他樂於接受：「好似話鋪頭無寫營業時間，而嗰日賣晒貨亦要即時網上 update。」現時他請了七位女工幫手包糯米糍，壓力才得以紓緩。
挑戰二：杧果質素難控制
杧果為糯米糍的靈魂，而 Yorky亦因外母介紹的欄商來貨不佳及數量不準，經朋友介紹轉到另一批發商，與外母關係亦因此存有暗湧：「我覺得大家都係講個信字。依家呢間合作得幾好，起碼要多啲貨佢都會俾到。」他現在每星期兩次到果欄提貨，每次提三至四十箱。但由於天氣、船期等變數，他曾試過拿了整箱貨都是壞的：「批發商都無辦法，佢叫我唔好要，我話要得嘅就要啦。最後佢幫我揀啲無變壞嘅，如果係其他果欄真係會費事睬你！」
Yorky又試過因來貨並未熟透，需要暫停營業一天。而街外不少糯米糍店兼賣麥提莎、花生等口味，但 Yorky堅持不賣：「太單調啦，買呢啲唔使同我間鋪買啦。我始終係做生果起家，鋪頭名又有果子兩個字。杧果唔靚，咪賣其他生果囉！」採訪當天，店鋪就兼賣士多啤梨、金奇異果等口味，但仍以杧果最受歡迎，佔九成生意。
挑戰三：同行隔籬鋪眼紅
店鋪位於青山道，在聯邦廣場附近，開業半年，「死鋪」真身逐漸現形。先有鋪位所屬大廈長期搭棚，令門面非常擠塞，招牌亦被遮擋，裝修期間又長期滴水。加上鋪外馬路近日進行路面工程，有噪音之餘又沙塵滾滾，客人購買時亦十分狼狽。
Yorky指位置都不是最大問題，人為因素最為嚴重：「試過有個我認得嘅同行喺鋪門口企喺度，一有人買完，佢就過去講：『有咩咁好食呀。』」最慘痛莫過於與隔籬鋪位爭執：「轉賣糯米糍關係就差咗好多，因為佢哋成日話啲客阻住做生意，叫我指示啲客排第二邊。但係唔通排出馬路咩，佢就叫我用繩綁住啲客！」自此之後， Yorky與隔籬鋪幾乎無兩句：「聽員工講話佢哋要夾埋投訴我，但其實都無乜嘢可以投訴到。近日就有衞生幫查牌，但係我行得正企得正唔驚！」
他現在一星期要到果欄兩次，三點便起床到油麻地，到五點返回店內準備，到了九點開業就要幫忙包糯米糍，途中還要將貨分到美孚分店售賣及處理網上訂單，到了晚上九時多又要清潔，回到家已十一時多，每天只睡三、四小時。但他並不以為苦：「我依家仲爭緊人錢，但係債主知我孭起頭家，都唔會催我還。而家都三十歲，唔搏幾時搏！」
外母回應
記者向青山道的街坊打聽， Yorky外母，人稱事頭婆，早年曾賣生果但關門大吉，近期再次在荔枝角開店。記者專程到附近打聽，果然見事頭婆開鋪，還親力親為。她坦承自己曾幫女婿，但最後選擇離開：「我喺呢度擺檔十幾年，到上年老公去咗，自己先無心機做，咪去咗女婿嗰邊囉。嗰度太辛苦喇，成日要企，頂唔順！」但她否認與女婿關係變差，只稱自己喜歡自由自在；對於是否曾經開過糯米糍店，她亦加以否認。這次真是清官難審家庭事。
開業資料（ 01/2015）
前期兩店投資 $70,000
租金# $45,000
裝修、出牌 $100,000
電器 $50,000
食材 $10,000
雜費 $30,000
總投資 $305,000
#二按一上
營業資料（ 10/2015）
營業額 $300,000
鋪面及貨倉租金# $43,000
人工* $90,000
食材 $130,000
水電等雜費 $10,000
盈利 $27,000
*老闆、老闆親戚及七位兼職
＃兩間分店及貨倉
撰文：梁延宇
攝影：鄭樹清
攝錄：陳浩樂
ed_bn@nextdigital.com.hk
|
鍾意就快D Share啦！
|
|
|
