用皇室做主題的生日宴，諸葛囝囝唔單止小皇爺打扮，仲有「太監」在台上宣讀聖旨。
探熱針
宮女太監侍候 諸葛仔生日會變皇宴
諸葛紫岐月前同老公薛嘉麟傳婚變，更因此突然暴瘦得番 80磅。好在最後有諸葛媽出手調停，兩公婆終於和好如初。
媽媽真偉大，幫完個女同女婿保住頭家，日前再為孫仔薛華韜在北京打造百萬皇族生日宴，場內數十宮女、太監輪流侍候，兩歲人仔生日，一個字：誇！
太監陪壽星進場
諸葛紫岐同老公薛嘉麟的婚姻，由把炮外母出手斡旋後雨過天青，上週六（十一月二十八日）兩公婆甜蜜到北京為兩歲囝囝薛華韜舉行超豪生日派對。被父母兩家視為金笸籮，華韜受寵度爆燈，被打扮成小皇爺，還有阿媽諸葛紫岐至愛的「麵包超人」向他下跪請安，將生日派對場地變成中西合璧的兒童樂園，其實唔只咁簡單。
有賓客將當日派對相片放上朋友圈，發現在內地做官的諸葛媽，出錢出力豪花百萬幫孫仔大搞皇宮式的浮華生日宴，當日筵開十八席，場內五十多位女侍應化身「宮女」，更攞住燈籠一字排開在門外候駕，迎接由「太監」陪伴進場的小皇爺華韜。
晚宴宣讀聖旨
下午切完卡通生日蛋糕，晚宴時間才是戲肉，金笸籮由爸爸薛嘉麟抱住上台，之後「太監」叔叔打開聖旨，用高八度聲線宣讀小皇爺今天生日，以滿漢全席款待各界親朋。兩歲華韜對外婆呢份心意「成頭問號」，相反近年在外母搭路、北上開拓商機的薛嘉麟，對可以贏盡面子的強國式排場非常受落！難怪薛家兩老亦專程北上出席孫仔壽宴。即使事後被網民揶揄生日派對變土豪派對，諸葛紫岐仍感激母親說：「最緊要開心。」
電視台班底
頒完「聖旨」，一眾「侍衞」隨即抬出圍上紅巾、寓意美好的燒羊，於場內繞場一周，然後讓台上的小皇爺華韜，與父母齊齊向燒羊切一刀，切羊當切蛋糕，華韜終於生猛番晒。之後諸葛兩公婆向賓客舉杯祝酒，鮑參翅肚滿漢全席壽宴正式開始，台上還有「宮女」載歌載舞娛賓。
據悉早在半年前諸葛媽蘇英已開始為孫仔打造今次皇宴，還請來內地電視台的製作班底做搞手，規模拍得住《春晚》。「 Marie媽咪喺內地有頭有面，前年幫個孫搞咗六十圍百日宴，上年一歲生日，都開咗十八圍，不過今年仲誇張，平日佢老人家已經當個女係公主，依家對個孫，更加錫到燶。個 party除咗食滿漢全席，每位賓客用嘅餐巾，都繡上佢哋個名，又預備活佛開光嘅『轉運竹』做禮物，仲有大抽獎，二百幾份禮物全部名牌嘢，最 cheap嗰份都千千聲。」一名賓客說。
要幾豪有幾豪
時下許多家長為小朋友搞生日會費盡心思，務求令子女有個難忘回憶。城中唔少名人富豪，為寶貝仔女炮製浮誇壽宴，銀紙事小，最緊要夠豪夠誇多「非士」。
【洗米華】
洗米華與太太陳慧玲（ Heidi）慶祝女兒周梓潼（ Virginia）生日及幼女周羡潼（ Damiana）百日宴，在澳門酒店戶外泳池區域舉行百日宴兼生日派對。場地以粉紅色做主題，有一家五口的卡通造型布景板、巨型旋轉木馬擺設、粉紅色城堡造型的主舞台，又有熊仔樽糖果、長頸鹿風扇等送給來賓，由下午玩到自助豪華晚宴，使費百萬。
【甘比】
月前，甘比和劉鑾雄在金鐘亞洲協會為愛女劉秀樺（ Josephine）舉行七歲生日派對，招呼賓客食自助餐，場內除有動物氫氣球，仲有巨型吹氣大白鯊滑梯、波波池、攤位遊戲等，十足嘉年華會般應有盡有，所有小朋友都收到大禮物，以奢華證寵倖地位。
【李嘉欣】
李嘉欣和許晉亨去年為三歲兒子許建彤（ Jayden）舉辦生日會，由於小 JM是個愛車族，所以李嘉欣將場地布置成賽車場，並訂製法拉利蛋糕俾囝囝，場內還有波波池、吹氣滑梯、熊仔漢堡包及車仔熱狗款待來賓。
撰文、攝影、攝錄：娛樂組
|
鍾意就快D Share啦！
|
|
|
