探熱針
Moka介入 郭富城狠飛方皓玟
城城近年獨愛北妹，被譏為「國貨城」，但原來前年尾他跟創作女歌手方皓玟撻着，最後因為 Moka介入，方皓玟被 out出局。近日城城高調護 Moka，令方皓玟勁冇癮，更話：「啲人分手後可以做朋友，我唔會，唔想見。」
憑歌寄意
城城懶理戀 Moka變負評王，相反舊愛方皓玟見到他們放閃後大受刺激。事實上，去年被飛後，方皓玟借歌曲《分手總約在雨天》宣洩失戀心情，並親自填詞：「我已經不可以跟你做朋友，連人生都迷失，努力愛一個人都不夠……」
傷透心，全因她冧足城城多年，早於一一年已在自己包辦曲詞的作品《 LADY COPY》，填上「郭富城有架拉利感覺好花，高姿態顯身價」歌詞，自此城城開始留意她，直到跟熊黛林分手，二人才正式開始拍拖。城城亦不避嫌，在 ig追蹤方皓玟，見對方出碟，更留言打氣，而方皓玟亦在 ig隔空傳情話「想你」，相當 sweet！
「城城同 Charmaine（方皓玟）拍拖時，介紹咗佢俾沈嘉偉識，到而家 i.t都有贊助衫俾佢。當時為咗就城城，佢由新界搬去港島，打扮亦愈來愈性感，盡量投其所好。初時被飛佢都覺得好突然，後來先知因為 Moka介入。」知情人說。
唔想提城城
本刊向方皓玟求證舊戀情時，她並沒否認。但提到城城公開跟 Moka的關係，她語氣極不耐煩。
壹：壹週刊
方：方皓玟
壹：城城公開戀情，有冇恭喜佢？
方：點解問埋啲咁嘅嘢，我唔想答。
壹：聽聞你哋曾經喺埋一齊？
方：咁樣都講得出，我唔答呢啲嘢。
壹：係咪關係過去咗唔想再講？
方：唔係，不嬲都唔講人哋嘢，冇必要討論人哋嘅嘢。
壹：同城城仲有冇聯絡？
方：（猶豫）……真係唔討論，唔該你！
壹：係咪 Moka介入，令你同城城分開？
方：（不耐煩） OK啦，唔好問唔好問喂呀，唔好問啦，我真係冇興趣。
壹：但係牽涉到你同城城關係？
方：冇呀，唔好問啦，年尾嘞，不如問出碟嘅嘢。
多仔埋身
方皓玟性格爽朗，加上是圈中少有的音樂才女，向來多仔埋身。她曾自爆有過八段情，一直有拍拖，但就算俾人影到都唔會認。
撰文、攝影、攝錄：娛樂組
|
鍾意就快D Share啦！
|
|
|
