爆壹爆
中環美女啜煙絕招
爆哥識唔少喺中環做嘢嘅靚女，唔講唔知好多都係煙鏟一族。每逢鋪頭有空檔，佢哋都會走出後巷「打邊爐」，整番飛煙提提神。不過，佢哋話每次食完煙後，隻手都會好大朕煙味，之後同客人接觸俾人聞到，好影響形象，老闆又會詐型，搞到一班吸煙女好煩惱。食又俾人鬧，唔食又吊癮，慘慘豬囉。
最近爆哥落中環，發現一個奇景，見到好多「打邊爐」嘅女仔，都用髮夾夾住支煙。爆哥多口問句點解要咁樣食煙，佢哋話咁做，隻手就唔會直接掂到支煙，可以減少隻手朕煙味，仲話呢個方法係一個髮廊妹興起，於是好多女仔就有樣學樣。
呢個髮廊妹叫阿 Cream，當日咁啱又喺度。佢同爆哥吹水，話以前食完煙返鋪頭幫客人洗頭，客人會話佢隻手好臭，雖然老闆冇詐型，但自己都唔好意思，但唔食又心思思。為咗減少隻手朕臭煙味，佢初初試過戴手套食煙，「好異相，好似個洗碗阿姐，路人行過都眼望望。而且戴手套好易跌煙，好鬼麻煩。」之後試用髮夾，又幾好喎，隻手冇咁大朕煙味，而且又方便有型，「雖然有效，但隻手都仲有少少煙味，返到鋪頭都要洗手。」其實食得咁高難度，不如戒咗佢啦，或者食其他嘢啦喂。
桑拿王 旺角擺花牌陣
上星期，旺角砵蘭街近豉油街位置，有一間茶餐廳新開張，搞到場面好鬼墟冚，仲成為網民熱話添。茶記開張啫，有幾巴閉呀？就係巴之閉，因為有成二百幾個花牌，擺滿晒成條砵蘭街，場面不知幾壯觀，仲勁過新界圍村打醮。
而送花牌嘅人，好多都係附近夜場老細，當中仲有唔少江湖猛人，好似勝和上海仔，都有送花牌賀一賀，於是好多人估計，呢間茶記老闆，來頭一定唔嘢小，一定係有分量嘅江湖中人。有朋友同爆哥講，呢間茶記其中一個老細，就係旺角有桑拿大王花朵嘅蕭榮，因為覺得飲食有得做，所以就掟錢開茶記。另外，蕭榮除咗搞骨場，仲係新興大業主，上年佔旺時，佢就鬧班學生阻住佢做生意，仲同班學生爆粗互掟水樽添，喺網上曾經係當紅人物。
中環靚女被抽水實錄
去開中環，有唔少靚女同爆哥呻，話每朝返工放工坐地鐵時都好慘，因為人多擠逼，就算自己點樣小心，都會俾啲立心不良嘅鹹濕佬抽水搏懵，搞到佢哋好無奈，希望香港可以學日本地鐵咁，設有女性專用車廂，等班鹹濕佬冇得落手。其中一個喺中環做嘢嘅 Cherry，由於樣貌省鏡，每次坐地鐵，幾乎都有男人想「抄佢牌」（索取電話），就算佢請人食檸檬，對方都仍然會死纏爛打，調位坐對方都會死跟。試過一次，有個麻甩佬足足由尖沙咀跟佢到九龍塘，簡直膽大包天，嚇到佢花容失色，惟有打電話向朋友求救。
Cherry仲同爆哥講，有一次喺地鐵仲俾個鹹濕佬摸屁股。佢話初頭都忍住，只係雙眼怒睥對方，但個鹹濕佬竟然變本加厲，摸完再摸，好似奉旨咁， Cherry終忍無可忍，大聲鬧個鹹濕佬摸夠未，但個鹹濕佬好鎮定，死撐話只係人多唔小心碰到佢，其他乘客都只係睇熱鬧，冇人出聲幫忙， Cherry只能眼白白放過對方，事件都令佢情緒困擾一段時間哦。
爆哥乜料
金融界撈家，穿梭黑白政商界，朋友遍布旺角至中環，每星期都八到
唔同料，同《壹》仔讀者過吓癮！
|
鍾意就快D Share啦！
|
|
|
