熱爆娛樂: 蘇麗珊推 job　未紅先驕 [壹週刊

2015年12月10日星期四

蘇麗珊推 job　未紅先驕 [壹週刊 - 1344] __,M1,

現年 23歲的蘇麗珊，憑《哪一天我們會飛》入圍角逐金馬獎最佳新人獎。

娛樂偵訊

蘇麗珊推 job　未紅先驕

由楊千嬅、林海峰主演、黃修平執導的電影《哪一天我們會飛》，上映後口碑票房雙贏，亦帶紅了一班年輕演員，當中飾演年輕版楊千嬅的蘇麗珊（ Ceci），除獲提名台灣金馬獎最佳新演員，更被捧為新一代女神。

一夜飛上枝頭，但蘇麗珊未有好好珍惜眼前機會，居然學人推 job扮大牌，廣告導演嬲到在社交網站鬧爆蘇麗珊。

唔係第一次

憑電影《哪一天我們會飛》走紅的蘇麗珊，近日被指未紅先驕無理推 job，事緣上月初歌手兼廣告導演文恩澄，在 facebook公開指某位剛做女主角的新演員，原本應承接拍電子產品公司贊助的微電影，但女主角在拍攝前一個星期，以覺得自己位置不應該拍電子產品為由突然推 job，搞到製作單位要臨急搵人填補主角空缺。雖然文恩澄無開名，但明眼人都知主角正是蘇麗珊。

「做 model嗰陣已經識佢，初時未熟覺得佢個樣純純哋又聽話，不過識耐咗，就 feel到佢成日睇唔起人，直到佢拍咗呢套電影之後就更加目中無人，搵親佢都唔覆，你話 Ceci（蘇麗珊）推 job我覺得一啲都唔出奇，佢已經唔係第一次，試過應承做雜誌訪問都反口，其實如果啲 job佢報晒價又應承咗， confirm晒個客先嚟放飛機，只會玩死自己！」蘇麗珊身邊好友透露。

製作團隊最後找來比蘇麗珊更有知名度的黃美棋頂上救亡。

歌手兼導演的文恩澄得知蘇麗珊突然推 job，激到在 facebook鬧爆對方。

黃美棋執二攤

蘇麗珊推 job，製作團隊只得一個星期時間搵女主角，身為導演的文恩澄嬲爆在 facebook狂呻：「我俾個死𡃁妹玩死！」並暗示因蘇麗珊推 job導致製作預算嚴重超支，幸好最後搵到比蘇麗珊更有知名度的黃美棋頂上救亡。

本刊就此向導演文恩澄求證，她說：「係有件咁嘅事，不過係邊個唔想開名喇，只係可以講當初客戶想用呢位 artist，我哋搵佢嗰邊報晒價，度晒期，咩產品我哋都同佢哋溝通好，簽 confirmation前都有再同 artist嗰邊 double confirm多次，佢哋口頭答應晒，點知開拍前一星期落筆簽約突然 say no，理由係話嗰位 artist覺得佢自己嘅位置唔應該拍電子產品，搞到我哋團隊同個客都好嬲。其實如果佢一早拒絕，大家唔會有 hard feeling！」

另一邊廂，本刊亦透過電話聯絡上蘇麗珊本人，起初扮傻的她，在再三追問下才表示：「記憶中經理人公司好似係有問過我類似嘅嘢，可能係啲期夾唔到……（聽講推 job原因，係你覺得自己嘅位置唔應該拍電子產品？）唔會……我同公司講係 OK㗎……其實我唔知有電子產品搵過我！」前言不對後語的蘇麗珊，究竟有無做過，心知肚明。