熱爆娛樂: 密密登台養家　黃日華隨街晒　一吋厚金牛 [壹週刊

2015年12月10日星期四

密密登台養家　黃日華隨街晒　一吋厚金牛 [壹週刊 - 1344] __,黃日華,M1,

金牛成吋厚，仲要當街點數。跟手黃日華便將金牛放入腰包，真夠豪。

娛樂偵訊

密密登台養家　黃日華隨街晒　一吋厚金牛

今年初黃日華老婆梁潔華，大病初癒戰勝急性血癌，總算鬆一口氣。不過女兒黃芷晴約滿港視後發展一般，忙完老婆，又要為女兒工作操心。養家重擔，黃日華繼續一力承擔，搏命北上搵銀。

日前發現陪老婆到筲箕灣食魚蛋粉的他，手拿足足有一吋厚的金牛當街數算，之後放入腰包。返得大陸多，連數銀紙都飄出一陣土豪味。

老婆精神好

以往黃日華看淡名利，返內地登台純粹為賺輕鬆錢，平日有時間踢吓波、去九龍城歎茶買餸、打理家中園藝，享受慢活人生。但直至太太梁潔華去年確診患急性血癌，需要接受五次化療，病癒後又要保養身體，加上囡囡芷晴自約滿港視後工作量不多，養家重任重落在黃日華一人身上。

據知黃日華在強國甚吃得開，一個活動或登台騷價八至十萬人仔。但自老婆患病後，想搵多個錢傍身的黃日華，惟有頻頻返內地登台。

眼見老婆逐漸康復，精神一日比一日好，鬆一口氣的黃日華，日前兩公婆到筲箕灣食魚蛋粉歎絲襪奶茶。不需要戴冷帽加口罩包到冚的梁潔華，經過大半年保養，精神不俗，輕輕鬆鬆同老公四圍去拍拖。

歎完下午茶，黃日華小心扶老婆上車，他則在車外吹吹風，等助手代他到銀行提取現金。黃日華當日大無懼在大街大巷接過足足成吋厚的金牛，還當街點算，跟手把金牛塞入腰包，整個動作好有土豪 feel。

提巨款前，黃日華偕病癒老婆到筲箕灣嘆絲襪奶茶，其間密密傾，患難見真情，感情勝從前。

當日所見梁潔華精神不俗，昔日要戴口罩遮病樣，如今終於脫罩，作為枕邊人的黃日華最欣慰。

老婆先上車休息，然後等助手替他到銀行提取大疊金牛。

為女兒操心

見身體情況穩定，梁潔華今年五月亦重返保險公司管理層工作崗位，早前她偕老公接受電台訪問亦承認復工：「現在好了一半左右，身體 OK，開始復工，但不能返足五日，只能每週上班兩天。老公和女兒好錫我，常常抽時間陪我。」身旁的黃日華亦盡顯柔情表示：「我寧願自己辛苦，都想她身體好一點。」

重拾事業，但梁潔華最憂慮的其實是愛女黃芷晴的前途。今年初約滿港視後，黃芷晴至今一直自由身。據悉早前曾有三間公司睇中她，當中包括黃玉郎、林文龍有份投資的環球傳奇，緊張女兒事業的梁潔華，更陪囡囡出去傾約，可惜林文龍有份揸 fit的環球傳奇，最後過唔到梁潔華一關，無緣簽到黃芷晴。

「阿嫂同芷晴嘅關係一直好 close，每次阿女拍拖，都一定帶返屋企俾媽咪過目，工作更加唔在講，基本上芷晴接咩 job都會同媽咪傾咗先，媽咪 say yes先得。因為芷晴仲細，阿嫂驚佢俾人呃，所以睇得好緊，所有公司都要阿嫂親自揀，佢話如果求其簽，一陣過幾年冇咩發展又話解約，盞浪費大家時間。林文龍間公司唔係唔好，不過阿嫂話成立咗冇幾耐，太新，想睇定啲先。」知情人說。