葉玉卿狠心賣銀行做全職阿四
昔日性感女神葉玉卿婚後助老公胡兆明擴展生意版圖，攻入銀行界，但眼見三位子女日漸長大，卿卿與老公決定狠心放下經營10年的銀行生意，盡情享受與家人相處的時光！昔日鏡頭前的大美人卿卿成為家人的攝影師，親手紀錄子女的成長點滴，視子女為最大成就！
息影多年的性感女神葉玉卿早年下嫁美籍商人老公胡兆明（Jeffrey）後，先後誕下大女胡芷欣（Victoria）、兒子胡可聰（Jeffrey Junior，JJ）和細仔胡以聰（Jefferson），專心相夫教子。天生旺夫命的她助老公從超市打入銀行界，Jeffrey於2006年在紐約開設國際銀行，身家隨之暴漲。
近年美國營商環境一直轉變，華人在當地經營銀行遇上諸多阻滯，卿卿與老公亦落足心力守生意。拚搏多年後子女轉眼間已長大，卿卿眼見17歲大女Victoria即將考大學，15歲的JJ及細仔Jefferson亦即將升讀不同學校而各奔前程，相處時光更見珍貴，知足的她決定在銀行生意步入10周年的日子狠心售出銀行業務，換來更多時間與子女相處，老公亦可專心打理超市及地產生意，卿卿說：「我同老公都步入中年，唔會再話要做乜大事業，銀行賣咗就做少樣，超市上晒軌道，唔使放太多時間。」
舉家度假做龍友
卿卿與Jeffrey近年將生活重心放到家庭上，經常舉家旅遊，早前便趁美國國慶日假期，到夏威夷度假！昔日鏡頭前的性感女神成為家人的御用攝影師，與Victoria感情深厚的她為女兒拍下不少水着靚相，自己則較少上鏡，她笑說：「自己都冇影到相，做咗佢嘅攝影師，做媽咪比做乜都難，莫講話做演員！以前做演員有人服侍，依家要服侍佢哋幾個，仲要睇佢哋面色同脾氣！」盡得卿卿遺傳的Victoria樣靚身材正，至於年僅14歲的Jefferson亦逐漸趕上腳步，卿卿自豪地說：「佢都唔矮，好多外國同學都矮過佢！」眼見子女日漸長大，卿卿坦言相處方式大有不同：「要尊重佢哋，聽佢哋意見，慘過服侍女朋友！佢哋依家到咗Teenage，講乜就做乜，冇得再質疑佢哋，只可以提議，喺屋企都要好民主，冇得逼o架！」
仔女係最大成就
假期轉眼間結束，回到偌大的紐約寓所中，為子女勞碌了好幾天的卿卿才能稍作放鬆，但回味這段親子時光亦樂在其中：「返到屋企有工人照顧，先輪到我放假！雖然度假屋細過屋企，但相處嘅時間反而多咗。」放下生意重擔的卿卿坦言視三個子女為最大成就：「只要佢哋平安開心，讀完書，做個好人，我就覺得任務完成！每年都有時間一家人一齊就好開心！」
文：影視組
|
鍾意就快D Share啦！
|
|
|
