Mo媽同行
晚上六時許，陳豪梳靚個頭，西裝骨骨到達位於重慶市中心的樓盤展銷會，由工作人員帶領進場。陳豪進場前眉頭緊皺，唔通掛住剛滿月的 Aiden？
滾熱辣
480萬重慶做騷 陳豪囝囝滿月酒延期
上月 4日陳茵媺為陳豪誕下重 6磅 11安士的 Aiden，全城恭賀。眨眼囝囝已經滿月，不過陳豪並未為 Aiden擺滿月酒，滿月當日還飛到重慶做騷。
本刊記者獨家直擊，上周六（ 4日）早上六時半，陳豪從大埔寓所出發到深圳機場，再轉乘深圳航空到重慶做樓盤騷。雖然頻撲又辛苦，但發展商出到天價 380萬人仔（折約港幣 480萬）力邀陳豪做代言，展銷會當晚他幫手 sell客非常落力。
36小時賺幾百萬人仔，時薪超過十萬，就算撞正 Aiden滿月都局住延期啦，搵奶粉錢緊要嘛！
陳豪自去年 6月與陳茵媺結婚後，兩公婆出騷價齊齊飆升。上月榮升爸爸的陳豪密密做，大小活動未停過，無綫吸金王當之無愧。最近大陸樓盤「禦龍天峰」出天價邀陳豪北上重慶出席活動兼代言，據知酬金竟達 380萬人仔，不過活動當日剛剛撞正陳豪仔 Aiden滿月，惟有延期擺酒。
知情人士透露：「阿 Mo本來計劃 Aiden足月當日擺酒，不過幾個禮拜前有單大陸樓盤 job出 380萬人仔搵佢做騷。佢哋鍾意阿 Mo初為人父形象好，所以開出天價，冇理由唔接囉！同場嘅鄧萃雯都唔過 60萬。阿 Mo同老婆 Aimee商量後，決定將滿月酒延期，改為擺百日宴，仲同老人家講依家興擺百日宴，到時 Aiden三個月大夠實淨，親友輪住抱都唔怕整親。」
經深圳過關
酬金咁可觀，即使辛苦啲都值嘅。由於香港機場早上沒有直航機到重慶，陳豪又不想提早一天到當地。在陪老婆囝囝多一日的大前提下，他選擇做騷當日天未光起身，坐七人車經深圳灣過關到深圳機場，搭飛機到重慶。
上周六（ 4日）早上八時半，陳豪與母親及男助手一行三人到達深圳機場。記者上前與他們打招呼，面帶倦容的陳豪表示要到重慶工作。由於無綫對本刊的「禁制令」還未解封，他不太方便回應記者問題，即使問他有否掛住家中妻兒，他都只笑住說：「唔話你知！」剛續約無綫的他果然尊重公司。
唔夠瞓的陳豪登機後即戴上口罩休息。因為未食早餐，瞓一陣又起身食個牛肉麵，之後繼續再瞓，全程冇同身邊男助手交談過。
Aiden好腳頭
Aiden出世後，陳豪好爸爸形象入曬屋，除了餅店代言之外，鬚刨、男士護膚產品、服裝品牌，甚至家庭品牌、婚紗公司、 BB商品都高價搵他代言。最近 TVB亦以千萬挽留陳豪續約，加埋大小活動登台，單計呢一個月，陳豪月入過二千萬， Aiden果然好腳頭。
唱國語歌冧客
陳豪一上機就戴上口罩大覺瞓，但國內航空公司的頭等艙座位質素麻麻，他顯然瞓得不太舒服，不停鬱來鬱去。經過兩個多小時的機程，終於抵達重慶機場，陳豪由四名西裝保鑣接機護送返酒店休息。
晚上六時許，充電後的陳豪精神不錯，西裝筆挺打埋煲呔到達樓盤騷場地。他當晚唱了〈愛我別走〉及〈祝福〉兩首國語歌，又與鄧萃雯在台上介紹樓盤，令在場的 VIP買家心情勁 high。不過陳豪的普通話太爛，經常弄出笑話引到全場大笑。
以往陳豪出埠工作， Mo媽都未有同行，今次 Mo媽全程跟實。據知是因該發展商給陳豪「優惠價」購買單位，陳豪想送層樓給母親收租，故同行睇示範單位。
歸心似箭
陳豪由重慶返港步出機場時急急腳行，肯定趕住返家見妻兒，他坐保母車直達大埔比華利山寓所。
老婆穀奶發燒
早前陳茵媺因為穀人奶導致發燒，結果要住院三日休養。現時雖然已退燒，她依然勞心勞力湊仔，所以陳豪每次工作後都盡快回家，幫手湊仔之餘亦要呵護老婆。不過陳茵媺已急不及待復工搵錢，曾說產後一年才復出拍劇的她，原來已接了數個「 easy job」商演。下周四（ 16日）她將產後首度復工，出席尖沙嘴一間新店開張活動。
豪擺三十圍
陳豪為出騷要取消囝囝的滿月酒，但他已開始籌備百日宴。無綫更向陳豪提出獨家現場直播百日宴，知情人士透露：「 Aiden仔都未正式曝光，淨係得一張微博相， TVB梗係想飲頭啖湯啦！阿 Mo一家三口咁幸福，大家都想睇真啲 Aiden個樣似阿 Mo定 Aimee，到時收視一定勁過台慶。 Aiden百日宴除咗喺香港擺之外，仲會喺多倫多搞，因為 Aimee好多親戚朋友都想見嚇 Aiden仔，依家決定三月中總動員返去多倫多 Aimee爸爸開嘅麗晶酒家擺百日宴。」
周一（ 6日） Aimee父母離開大埔比華利山，記者問 Aimee爸是否補擺滿月酒？他未有否認：「你哋問番阿 Mo啦！」 Aiden仔腳頭咁好，陳豪賺錢賺到笑，擺幾多圍百日宴都冇問題啦！
Aimee父母四萬咁口
周一（ 6日）下午三時，陳茵媺父母駕車離開大埔比華利山寓所，到北角與親友飲茶。對於乖孫會否補擺滿月酒？兩老雖未有回應但全程笑曬口，有孫萬事足呢！
|
鍾意就快D Share啦！
|
|
|
