[忽然1周 963] 港視驚爆非禮事件 美棋 BB中招 港視,MW,

媽咪姐

港視驚爆非禮事件　美棋 BB中招

香港電視（ HKTV）近排新聞多多！被政府拒發免費電視牌照後，早前終於買到流動電視牌照，點知賣家嘅母公司中國移動又話要調查呢單交易。啱啱媽咪姐仲收到風，原來上年尾 HKTV拍攝新劇期間，發生非禮事件。據幕後人員講，連「宅男女神」美棋 BB（黃美棋）都係其中一位受害人！

問到非禮事件，王維基明顯想低調，只謂：「已交俾 HR（人力資源部）處理！」

據知港視有位燈光師常借打燈之名，喺拍攝期間搏女藝人懵，美棋 BB就曾經俾佢貼身揩臀部！而上年 11月，曾拍《美女廚房》嘅黃欣，喺拍港視新劇《 Night Shift》時，仲俾呢位燈光師個頭「突襲」大髀！

好彩，呢件事好快傳咗去大老闆王維基度，據知佢亦即時炒人，以作懲戒！

揩油撞 pat

美棋 BB雖然口口聲聲話自己唔係受害人，但講到個鹹濕燈光師，就肉緊皺眉：「我係聽過（非禮）呢件事，佢哋有講番！（有傳你都曾經俾呢名燈光師借打燈揩油？）嗱，我都有聽過傳我有份。咁我的確係同嗰位燈光師拍過《我阿媽係黑玫瑰》，但我哋一路都好好，可能我唔夠吸引啩。所以當我知道佢哋拍《 Night Shift》發生啲咁嘅事都好奇怪，聽講幾個女仔都有發生！如果我遇到啲咁嘅事一定會出聲。」

頭瞓大髀

黃欣當晚就係著住呢條超短裙，拍一個坐埋吧枱嘅 shot，點知燈光師搞搞嚇吧枱底嘅燈，個頭忽然就枕落佢大髀，好猖狂。

黃欣：「係有呢件事發生，王生係好保護員工。我只可以講有一位 crew（攝製人員）喺排戲時，忽然衝過嚟，搞搞嚇啲燈，突然成個頭黐落我大髀！我好嬲，忍唔住話佢，在場嘅女仔同導演都知。」

姊妹力撐

四金花同《 Night Shift》男主角林文龍合作愉快，大家戲裏戲外都好好感情。湯怡力撐黃欣：「其實都過咗去，亦都解決咗。始終女仔都要小心啲，遇到呢啲事一定要出聲保護自己。」劉依靜話：「個燈光師已經唔止一次。」

鍾意就快D Share啦！

下一篇 》