鐵定七月開台
港視開台一波三折，先因「一男子」因素攞唔到牌，早前秘密買入中移動子公司，誰知再生變。好彩魔童夠硬淨，周一(6日)向記者表示，七月開台事在必行。《蘋果日報》圖片
娛樂喧
港視港台招兵夾擊 蔡少芬 陳慧珊 反無綫
港視風雲峰迴路轉，王維基（魔童）早前以億五買入中移動子公司，借殼翻生，但卻遭母公司插手調查雙方交易，不過魔童日前向記者堅稱：「錢都俾曬，七月會正式開台。」向員工派定心丸。
雖然周二（ 7日）無綫宣布停止向中移動租出發射站，不過王維基未驚過，近日更和無綫舊將蔡少芬、陳慧珊、鄧萃雯，甚至周秀娜密斟，落實開拍以《陀槍師姐》做藍本的警匪片。
港視與無綫廝殺，原來港台亦即將開設三條頻道專攻電視，夾擊無綫。下半年電視圈將進入戰國混戰局面。
去年港視不獲發牌，令魔童大失預算，所有劇集全面停工，港視上下人心惶惶。港視一哥黃日華更帶埋愛女芷晴「跳船」，主動𢱑撈返娘家。不過柳暗花明，計仔多多的王維基，最終成功借殼，以一億五千萬購下中移動香港的流動電視牌照，進軍流動電視市場。雖然中途生枝節，但日前魔童向本刊記者說：「上月 20日已完成咗交易，錢都俾曬，諗唔到咩理由要由頭嚟過，七月開台事在必行。」向員工大派定心丸。
陳慧珊 拗緊價錢
近年冇乜人氣嗌價唔高的陳慧珊，即使有港視敲門，但其老公兼經理人鍾家鴻企硬收四萬一集。
進擊花旦
港視近日除了陸續請回被裁的 320名員工，更向無綫高調挖角，但今次並非當初一味向甘草埋手，反而專攻花旦。本刊收到消息，港視為打造七月開台頭炮，開拍一部「陀槍師姐」題材的新劇，更搵來鄧萃雯、蔡少芬及陳慧珊擔正。另一方面，魔童亦有聯絡周秀娜，務求新劇人強馬壯。據知，港視已和鄧萃雯正式簽約，日前鄧亦公開承認：「王生搵咗我好耐，我哋係有傾過，而自己唔會拍古裝劇啦，反而鍾意拍社會題材嘅劇。佢哋已經俾咗劇本我啦！我依家睇緊，希望套劇拍出誠意俾大家睇！」
鄧萃雯撲槌，至於餘下的蔡少芬等人，港視同樣開出 3萬一集利誘。據知蔡表示價錢次要，最重要劇本。相比起來，陳慧珊較麻煩。一港視員工透露：「嗰日 Flora（陳慧珊）同老公（鍾家鴻）一齊上公司見冰姐（藝員部主管杜惠冰）， Flora好 nice，但佢老公敦起個款。公司開俾佢 3萬一集，點知鍾生還價 4萬，仲提出開工要跟學校假期，兼且每日開工唔超過 8個鐘，方便湊女。」條件相當苛刻。
南丫海難重頭劇
除了翻拍經典劇，港台為省招牌，近日已落實拍攝以「南丫島海難」事件為背景的重頭劇，更已落實搵林文龍、艾威和薑大偉做救災指揮官。
港台聯手
隨著港視即將開通流動電視， now及有線兩個免費電視台亦於今年啟動。向來只拍《鏗鏘集》等時事節目的香港電台，原來亦加入戰團，月中正式開放 3條免費電視頻道，更會拍攝電視劇。據知港台為省招牌，將會是以「南丫島海難」做故事背景的 20集寫實劇集，當中更由港視林文龍和艾威主演。對此，艾威說：「呢套劇我同林文龍係做救災指揮官。港視唔似大台唔俾人亮相其他電視台，王生反而叫我哋多啲曝光，增加人氣。」
港視出動銀彈四出挖角，加上港台迎面夾擊，若無綫再自恃強勢，繼續製作流水作業式的劇集 hea觀眾，大台地位分分鐘保唔住。
收視低迷
自從發牌風波，網友連番呼籲熄電視後，無綫多年強勢瞬間變弱，黃金檔電視劇仆完再仆，如今港台港視聯手夾擊，無綫有得震冇得瞓。
|
鍾意就快D Share啦！
|
|
|
