熱爆娛樂: [忽然1周 963] 愛得極黐纏　林峯送 80萬四驅冧千語林峯,吳千語,千語,MW,

2014年1月10日星期五

[忽然1周 963] 愛得極黐纏　林峯送 80萬四驅冧千語林峯,吳千語,千語,MW,

高調曬鑽戒

去年平安夜，林峯帶埋千語到君悅酒店出席顧紀筠老公壽宴，其間千語忽然抬起右手，大騷閃爍鑽戒，隨即傳出二人婚訊。

娛樂喧

愛得極黐纏　林峯送 80萬四驅冧千語

早前有指愛得黐纏的林峯和吳千語，鐵定今年註冊結婚，二人更應男方父親要求，於廈門辦理結婚手續，以阻千語 BB平分林峯身家。

雖然二人事後未有正面回應婚訊，不過林峯好愛千語就千真萬確。去年，千語一句想學車，林峯即時科水 300萬送法拉利，可惜最終被林父反對。

跑車夢碎，千語 BB退而求其次，睇中 80萬四驅車 Land Rover。上周五（ 3日），本刊便拍得林峯揸住去年 11月才落地的新車，接載女友做柴可夫之餘，兼教女友揸車。千語 BB大小通吃，「吸金力」認真強。

曾講過七次好愛千語 BB的林峯，早前接受電台訪問時，再發表肉麻宣言，他說：「依家我好開心，我覺得自己以前好幼稚，遇上佢（千語 BB）令我認清自己，變成 better man。」

七人車侍候

二人拍拖不久，千語便獲男友贈七人車和司機。千語經理人也被拍得坐住林峯的七人車到紅館睇騷。

林峯揸慣辣跑

名車無數的林峯，平日愛以瑪莎拉蒂跑車代步，因此那部 80萬四驅車，明顯買俾女友。

峯爸阻買跑車

事實上林峯對千語直頭 best of the best。 2012年年中二人剛剛撻著，林峯便安排七人車連司機，俾千語享用。「以前 BB出去做嘢，公司都會租街車俾佢， BB就會以月繳方式還番錢俾公司。阿峯見女友每個月找車錢都找成幾萬蚊，咪索性將自己多咗出嚟嘅七人車同司機俾 BB任使，方便佢工作。」知情人士說。

雖然有車有司機，不過千語熱愛揸車快感，向男友放風想學車，更猛話價值 320萬的 Aston Martin好有型。知情人士說：「 BB出到聲，阿峯當然唔會托手踭！但好衰唔衰，阿峯買跑車送女友單嘢通曬天，佢老竇當然極力反對。阿峯自己揸架馬莎拉蒂都係 160萬咋，之前部 BENZ跑都揸足 11年！」

冧笑等男友

上周五（ 1月 3日），千語錄完商台節目《喜來大龍鳳》後，由助手陪同到正門等車。原本木無表情的千語，離遠見到男友揸住新車駛來，便立即冧笑。

新車曝光

當日林峯做柴可夫，揸住即將送俾千語的新車駛往跑馬地。新車是英國品牌 Land Rover的 Ranger Rover Evoque 5DR Dynamic車款，屬 13年新款系列，馬力強勁，價值 80萬。

扁嘴落車

駛到跑馬地後，千語便單拖落車到對面街買外賣，其間她全程黑面，頻頻扁嘴。

嘴藐藐

皺眉啤

幫襯住家菜

千語在餐廳內呆等 20分鐘外賣後，便抽住兩大袋食物直奔上車。二人今次幫襯的「彭慶記食家」位於跑馬地奕蔭街，主力廣東住家菜。

返閨開餐

之後林峯就載住女友返回女方位於堅尼地道的寓所開餐。有新車落地，千語今晚一定好好餵飽林峯。

拍拖教車

峯爸開到聲唔批，阿峯惟有擱置買車。不過去年中，千語 BB忽然發口痕，又令買車一事逆轉。「 BB同阿峯講，話覺得阿 Lynn（熊黛林）架 Land Rover好型，好適合身形高䠷嘅女仔揸。阿峯見 BB鍾意呢款車，加上部車只係 80萬，諗都唔諗就搵車行留貨。」知情人士說。

新車去年 11月底正式落地，但千語仍在學車，故新車暫時以林峯公司登記，待日後千語成功考獲車牌，林峯便打算將架車連牌一併轉贈女友。

上周五（ 3日），本刊便拍得林峯揸住新車，接載當日為商台節目錄音的千語，之後駛往跑馬地搵食。由於當日林峯為睇實新車，買外賣任務就由千語代勞。被寵慣嘅 BB突然做阿四，難怪下車後面燶燶。周二（ 7日），記者聯絡過千語經理人 Carmen，她否認千語收新車，她說：「我未聽過呢件事喎！其實佢依家好忙，未有時間學車。」未有牌就有新車坐， BB做一日阿四冇所謂啦！