本月 7日在友人陪同下打算鬼祟出院，可惜仍被記者發現，狼狽 Aimee唔知入院時係咪同樣冇準備？《蘋果日報》圖片
封面
平安夜下體出血 陳茵媺秘入院施手術
陳豪和陳茵媺的愛情結晶品，原定在聖誕期間出閘，點知囝囝 Aiden心急見人，提早 12月 4日在舊山頂道嘉諾撒醫院出世，選擇自然分娩的 Aimee留院 4日後，便急住返大埔比華利山寓所開始媽咪生涯，豈料 20日後身體出現問題。
據知本月 24日下午時間， Aimee因下體自生產後一直滲血，在老公陳豪陪同下返回嘉諾撒醫院，經診斷後證實為生產時陰道破裂而發炎兼流血，由於情況算嚴重，醫生要安排 Aimee即時入院，結果 Aimee需留院 3日才獲醫生批准出院，幸好 Aimee無礙出院，但可惜是 Aiden的第一個聖誕節，無得同媽咪一齊過囉！
剛榮升爸爸的 42歲陳豪，自囝囝 Aiden出世後，雖然都有出席活動搵真銀，更對傳媒笑說 Aiden「好可愛、好靚仔」，又形容 32歲的 Aimee「狀態好好，係好媽咪」，但實情 Aimee產後情況並非陳豪口中咁理想， Aimee在上週二平安夜（ 24日），更在老公陳豪陪同下秘密入院。
陰道發炎流血
據知加拿大長大的 Aimee，早已選擇自然分娩，所以生產前 Aimee仍經常做運動兼上媽媽教室學生仔。至本月 4日 Aimee在舊山頂道的嘉諾撒醫院誕下 6磅 11安士的囝囝 Aiden，留院 4日即出院返歸，之後則留家坐月，首次生產的 Aimee對於下體一直滲血未有在意，更一度以為只是正常分泌物。
直到上週二（ 24日）， Aimee發覺除了下體不停流血之外，下腹還隱隱作痛，結果下午陳豪便陪 Aimee一齊返醫院檢查。「 Aimee原來生仔嘅時候陰道都裂開咗，但當時處理得未夠好，搞搞嚇就變成發炎囉，佢留院係要做手術縫番個傷口，雖然傷口不會影響下次生育，但醫生亦要檢查佢入面嘅積血有冇俾身體自然吸收番，否則就要用工具吸番出嚟，住 3日醫院時間差不多啦！」
家庭醫生關嘉美：會影響子宮
產後陰道破裂，家庭醫生關嘉美表示絕對不能睇小，關嘉美說：「如果度數（子宮頸擴張）開得足夠，基本上係好少機會會陰道破裂嘅，唔知係個孕婦呀定係助產士定係個醫生準備得唔足夠喇，或者個孕婦第一次生 BB，好狼狽咁入去生仔都可能有呢啲情況。不過佢去醫院度洗番乾淨個傷口，縫番針就會無事，亦都唔會影響下一胎用順產呢個方法；但如果發炎起上嚟可以好大鑊，可能會發高燒、盤腔炎甚至影響埋個子宮，所以唔可以睇小呢樣嘢。」
心情隨妻起伏
陳豪喺 Aimee生 Aiden前後都有出席活動，基本上佢出親嚟都係笑到四萬咁口，特別係講到囝囝 Aiden嘅時候，不過留意少少，其實陳豪啲戲始終掩蓋唔到擔心老婆嘅心情。
陳豪全程陪實
Aimee留院 3日，老公陳豪同樣留足 3日，每日一早起身由大埔寓所出發到香港區醫院陪 Aimee，每樣檢查陳豪都要在旁，據知陳豪盡量不讓 Aimee落床以免再次弄損傷口，所以小至倒杯水，陳豪都堅持親手遞畀 Aimee；而每天他都陪至傍晚才趕返屋企陪囝囝 Aiden，太太入院，最攰怕且係陳豪。
Aiden出世首個聖誕節，在醫院養病的 Aimee不時用電腦跟在家的 Aiden視像見面，可是醫生堅持 Aimee至少要留院 3日觀察。
上週四（ 26日）下午 Aimee終得醫生同意，由陳豪陪同出院，不過醫生講明若然傷口再流血， Aimee需要立即返醫院。
外母奶奶輪住湊
現今媽媽大多選擇請陪月照顧新任媽媽，但 Aimee補身及照顧 Aiden一事全交畀曾任職中醫的陳豪媽，和專程由多倫多返港的 Aimee媽。由於要照顧 Aimee和 Aiden，陳豪媽和 Aimee父母都已搬入比華利山同住，據知陳豪媽每日更煲木瓜湯幫 Aimee穀奶， Aimee在醫院期間，陳豪媽和 Aimee媽更要一同負起全天候照顧 Aiden的重任。
據知 Aiden十分精靈， Aimee曾向友人笑說「估唔到佢咁大食」，而陳豪於 19日出席活動時則笑住稱：「好可愛、好靚仔！影相時鍾意 chok樣，太 cute啦！好多人爭住錫，佢唔難湊，好隨和！」陳豪有傳曾找相士提供意見，但因為老婆入院而暫時未有決定。
對於太太產後入院做手術，陳豪週一（ 30日）說：「係有入院，唔係特別嘢，唔係大件事，（係傷口埋得唔好？）冇乜特別嘅！返去做普通檢查啫！大家唔使擔心！」至於產後陳茵媺有否進補，廿四孝老豆陳豪即說：「醫生話唔可以咁快補住，要調理嚇身體先，我全日都有幫手湊仔㗎！」
未生搵定幼稚園
雖然 Aiden未滿月，不過喺香港如果想入到心儀嘅幼稚園，唔係誇張，真係要喺 B仔出世前搵定。據知陳豪都唔例外，已經鎖定最少三間幼稚園，等 Aiden第日乖乖成才咁話。
寶山幼兒園
爭崩頭幼兒園之一，學生大多係名人富豪嘅第二、三、四代，有前律政司司長黃仁龍女兒、跳水王後伏明霞女兒、四叔李兆基孫女。原因係畢業生多數都升到聖保羅男女中學附屬小學，或者女拔萃、男拔萃等。
|
鍾意就快D Share啦！
|
|
|