同你吟一吟
48歲城城睇中 24歲美棋 BB
據說男人永遠長唔大，因為如此，無論男人年紀幾大，都係鍾意後生女！正如郭富城，舊年飛甩 33歲熊黛林，轉頭就搭上 27歲葉熙祺，最新目標，再細多 4年，就係高登女神之一，得 24歲嘅美棋 BB黃美棋。
上個星期六（二月八日）美棋 BB響社交網站留言，自爆獲 48歲天王寵倖關注佢微博，令 BB受寵若驚，開心到上載一張同城城 95年嘅合照，當時 BB真係好 BB，得 9歲。
48減 24，要同後生女拉近距離，城城由內到外，都有心有力。上個星期二（四日），城城出席賀歲活動，騎住匹馬出場，再幫舞龍點睛，又喺台上做出連串單眼、嘟嘴、 V手「卡娃依」動作，見到財神出場，仲開心到成個人跳起，生猛過啲 28歲。
另一邊廂，過氣天王嫂熊黛林星期日晚（九日）出席電影公司春茗，大冷天一邊嗌凍一邊著背心裙，搞到影相時動作生硬，同場另一位 BB吳千語， 20歲女抵得冷，背心露臍短裙，仲要第一次學人派利是，好在利是封冇林字，否則，阿 Lynn企都冇得企。
|
鍾意就快D Share啦！
|
|
|
