知名度比謝安琪低一大截的張繼聰卻戴黑超 cool爆行街，不及老婆親民。
娛頭
夫家咬全餐 謝安琪食飯埋單送 Benz 張繼聰：正常人都揀我老婆！
跟陳奕迅傳過緋聞的謝安琪，近日成為網民熱選 B餐，遠遠拋離 5億 A餐徐濠縈。只可惜，「 B餐琪」一早已經被張繼聰獨食。結婚七年，全靠阿 Kay賺錢照起張家，每月以六萬元租住比華利山四千呎獨立屋，仲要養埋老爺、奶奶同叔仔；反而 Kay媽要住大埔四百呎居屋，豪宅止步。
新抱唔易做， B餐琪仲要照顧埋愛車老公張繼聰，除送上四十二萬 Benz A250，日前兩公婆拍拖出街，由幫阿仔買衫，以至到 cafe開餐埋單找數，全由老婆代勞。難怪提到網民爭住揀謝安琪，張繼聰好得戚：「正常人都揀我老婆！」
男尊女卑
快將踏入三十七歲，謝安琪卻以高齡姿態榮登高登女神，早前更被專欄作家捧為男人熱選 B餐，遠遠拋離 5億 A餐徐濠縈，成為網民心中熱選好老婆，令阿 Kay人氣熱爆。
跟老公張繼聰剛度過七年之癢，事業成績一直女上男下，雖然賺錢能力跑贏老公，但謝安琪卻心甘命抵做小女人，屋企話事權由張繼聰揸弗。
「當年兩公婆同期出道，不過阿 Kay紅得好快，賺錢理所當然多過老公好多，外邊嘅人會覺得佢哋女尊男卑，實情返到屋企，乜都係阿聰話曬事，之前阿 Kay同 Eason傳緋聞，阿聰嬲到走去紋身宣示主權。其實佢份人好大男人，老婆喺出邊點叻都好，但喺屋企，佢先係一家之主。」阿 Kay友人說。
愈搬愈大
去年，張繼聰得王祖藍帶挈，憑電視劇《老表，你好嘢！》成功入屋，近日再有新劇《食為奴》出街，但跟無綫簽歌星合約的他，騷錢僅得幾百元，即使一劇接一劇，孭起成頭家重責，只能靠老婆謝安琪。
「○九年首《囍帖街》唱到街知巷聞，帶挈阿 Kay一家由大埔村屋搬去比華利山，嗰度淨係管理費都要成萬蚊，屋租又唔平，但阿 Kay認為最緊要一家人住得舒服，俾到個仔有好嘅生活環境，由佢養家唔係問題，始終阿 Kay深信個老公有機會發圍，只係時機未到！」知情者說。
一年多前，謝安琪更由比華利山二千多呎獨立屋，搬到同屋苑的四千呎大單位，每月租金亦由四萬跳升至六萬元。「好多女人唔鍾意同老爺奶奶住，但阿聰要照顧父母，阿 Kay為咗遷就老公，就算自己搵到錢，都無諗過搬出去住，換咗大單位之後，阿聰細佬都嚟埋住，反而 Kay媽只係住四百呎居屋。」知情者續說。
B餐全包
老公賺得少，張繼聰每個月收入有限數，好在家有賢妻謝安琪，幫輕唔少家庭開支重擔。
夫妻同金
曾經因為經理人得罪傳媒，令阿 Kay事業停滯不前，但憑住愈變愈標致的五官，以及再度發育的 D級身材，令謝安琪去年榮登高登女神榜首，加埋 B餐效應，人氣更勝五年前的大熱歌曲《囍帖街》。
要撐起頭家，謝安琪都要慳住使，平日愛到旺角及大埔購物。反而收入差一截的張繼聰，卻愛車如命，去年購入二十萬 Land Rover後，近期又睇中車價要四十二萬的 Benz A250，阿 Kay更揀正老公一月十一日生日前出車，氹老公開心。
A餐徐濠縈買二億三千萬獨立屋，以個人名義持有無加 Eason個名，反而 B餐謝安琪賺錢養家，新車用自己與老公張繼聰聯名的公司持有，有指阿 Kay準備開經理人公司，打算同老公一齊做老闆。 A餐同 B餐，確有分別。
爭住代答
對老公及夫家照顧周到，日前謝安琪更做埋柴可夫司機，駕著送給老公的新 Benz，載張繼聰到金鐘開會，之後一個人到了旺角新世紀廣場行街，主攻家品。見到記者，阿 Kay表現友善：「諗住買啲得意嘅家居擺設布置嚇屋企，等個仔見到開心啲。」
買完擺設，阿 Kay轉到九龍灣 MegaBox，到專門店買衫俾囝囝，張繼聰較啱時間到會合老婆。當日所見，張繼聰全程雙手插袋，由揀衫到俾錢，阿 Kay全部一手包辦。買完衫，兩公婆到商場的 Bar& Cafe撐枱腳，食了近一小時，同樣由阿 Kay埋單。記者上前問阿 Kay對自己成為熱捧 B餐睇法，身旁的張繼聰陰陰笑搶答：「我都有睇嗰篇文章，正常人都會揀我老婆，咁我都好自豪！」記者再問阿 Kay感想，他繼續插嘴：「人哋女仔點識答你！」能夠獨食 B餐，張繼聰如虎添翼。
|
鍾意就快D Share啦！
|
|
|
