同你吟一吟
陳豪新春拋妻棄子
剛為人父嘅陳豪，今個新年有唔少朋友專登上門拜年，乘機見嚇陳豪口中好靚仔好靚仔嘅「 Mo仔」 Aiden Joshua。
上星期二（二月四日），陳豪冇留喺屋企陪老婆囝囝，一個人揸車去咗老遠嘅大坑，原來約咗老友戚其義同一名女子飲咖啡吹水。
話就話三人會議，但大部分時間，都係戚其義個人 solo。已經落實會幫王維基嘅 HKTV拍劇，斷估戚其義唔會對住啱啱同無綫續番約嘅陳豪玩「劇透」，但今時今日仲肯留低做親生仔，陳豪自有分寸，佢要同自由身嘅戚監製再合作，絕非冇可能。
《壹》仔望一望錶，三點未夠就坐低，等嚇等嚇一個又一個鐘，陳豪咖啡飲完一杯又一杯，但餐廳因為要開始做晚市，金牌監製加視帝一樣冇面俾，七點鐘，被迫起身埋單。
問陳豪同戚其義有何合作大計？佢大賣關子：「唔話俾你聽！」轉話題問佢太太同囝囝，陳豪繼續扮神秘：「我今日除咗會講恭喜發財之外，其他嘢係唔會答。」
之後攞車走人，仲話要轉場再傾過。陳豪肯丟低茵媺同 Mo仔咁耐，呢個 project，一定唔少嘢！
|
鍾意就快D Share啦！
|
|
|
