[忽然1周 971] 李思捷死追 3個月 胡杏兒戀情見光死 李思捷,胡杏兒,MW,

首爾機場獨家　當眾繑手

問兩人為何經常繑手時，胡杏兒就話，繑手唔代表乜，更即場繑住李思捷，男方表情尷尬，但死撐說：「繑手好平常，咁攬係咪要結婚！」

打頭陣

李思捷死追 3個月　胡杏兒戀情見光死

3月 4日下午一時，胡杏兒突然在 instagram上載一張攬仔照，以一句「我找到了」公開戀情。其實早在情人節當日，胡已在網上曬收花相，擺明是向舊愛黃宗澤與楊崢的「閃電情」示威。不過，攬仔照上載十多小時，胡杏兒再次上載李思捷的鬼臉相，將「公開戀情」演繹為「惡作劇」。

如此反高潮，無非因為網友洗版式插爆集郵王李思捷，加上大台給予壓力，杏兒惟有在清晨 5時急急補鑊。據知 3個月前，李思捷搵老死胡蓓蔚幫手溝胡杏兒，一輪猛烈攻勢下終於得米。不過杏兒試水溫已經惹來咁大反應，睇怕呢段情都好大機會見光死！

其他影片

• 網民插爆李思捷　杏兒縮沙唔敢認戀情
• 獨家首爾直擊　杏兒思捷當眾繑手
• 戀情見光死　李思捷 4度變臉

這陣子，黃宗澤與楊崢快來快去的「閃電情」成為熱話，而分手年多的胡杏兒選擇在這個時候在 instagram試水溫公開戀情，唔多唔少甚有向舊愛示威意味。不過，怒撇花心男的杏兒，新戀情男主角竟然是比舊愛 Bosco個底還要花的集郵王李思捷，立即觸動杏兒 fans的神經，在網上圍插李思捷，甚至連大台也發功，下令要胡杏兒補鑊。

杏兒發功

首爾旅程完結，上機前，胡杏兒不時在李思捷面前放電。兩人當日一同穿上棒球褸及 cap帽，情侶味甚濃。

姊妹幫口

企兩人中間的胡蓓蔚及黃智雯亦幫口，話胡杏兒鍾意繑住人。

公司下令做嘢

「尋日晏晝兩點幾單戀聞出街後，杏兒經理人 Kenneth即急 call佢了解情況。杏兒係首席花旦，加上見啲網友插到咁，大台梗係緊張。胡杏兒見公司咁大反應，即時補鑊，唔好俾件事再搞大。」

據知身在韓國的胡杏兒得悉事態嚴重，為了盡快平息事件，惟有將公開戀情的舉動轉化為「惡作劇」，更找來同行的好姊妹做煙幕，將李思捷由「男友」化身為「好姊妹」。

其實，胡杏兒這場「惡作劇」出街後，網友亦覺疑點重重，皆因平日胡杏兒不愛炒作緋聞，加上不是新劇宣傳期，今次韓國之旅是私人旅行，連胡杏兒經理人亦不知，所以說是「惡作劇」甚為牽強。

4/3　冧爆曬愛

下午一時多，胡杏兒忽然在 instagram曬攬仔相。雖然男主角唔見正面，不過唔少心水清嘅網民，已經知道係李思捷，仲留言叫杏兒要帶眼識人。

5/3　晨早開估

早上五時，正在韓國旅行嘅胡杏兒晨咁早起身上 instagram，自揭男主角是李思捷，仲話成件事只係同大家開個玩笑喎。

網友寸爆

被問及杏兒攬仔照，杏兒好友胡定欣話：「佢登咗出嚟？張相我影㗎，我唔拆穿佢住。」似乎漏口風，唔覺意代好友認戀情。

《蘋果日報》圖片

欲蓋彌彰

同日中午，胡杏兒再上載同胡定欣、胡蓓蔚、黃智雯及李思捷的合照，潛台詞都係想講，思捷係佢「好姊妹」。不過心水清網友反而覺得件事唔係咁簡單。

食客爆繑到實

今次韓國之旅，胡杏兒被網友拍下在機場繑手相。而本刊亦收到一位食客報料， 3月 4日晚上 10時左右，她在首爾中山南洞的食肆「知牛」目睹胡杏兒與李思捷也是親熱繑到實如情侶。食客指︰「當晚見到李思捷同胡杏兒成班啱啱食完嘢，當時胡杏兒好親熱繑住李思捷，仲將個頭挨落李思捷個膊頭度，話佢哋唔係拍拖真係冇人信！」

3月 5日下午 6時 10分，齊齊穿著棒球褸的胡杏兒與李思捷，與胡蓓蔚及黃智雯出現首爾仁川機場，準備返港。本刊記者埋身訪問，兩人明顯有備而來。談到兩人關係，女的話「兄弟」，男的話「姊妹」。

記︰做乜咁反高潮？認完戀情又話惡作劇？

杏︰真係玩咋！大家唔好咁認真！

記︰你平時唔似玩呢啲嘢（惡作劇），動機係咩？

李︰（插嘴）你又知！你同佢好熟咩！佢當我係半個姊妹。

杏︰冇動機㗎！咪話咗玩囉。

記︰係咪公司打壓戀情？

杏︰冇！完全冇事！

記︰係咪網友插爆所以轉口風？有網友話 Bosco搵咗個阿媽，你搵咗個阿叔。

杏︰嚇！（掩嘴傻笑）

李︰（嬲爆插嘴）咩話？我大佢（胡杏兒）幾年咋！我似阿叔咩！我邊忽似阿叔！

記︰咁情人節邊個送花俾你？

杏︰話得俾你聽就公開咗……

記︰你同佢（思捷）熟㗎咩？之前唔見思捷出現你哋嘅聚會（指「胡說八道會」）？

杏︰我依家都好少出街，之前同佢拍《玩樂無窮》做夫妻喎！

記︰但你同佢喺機場繑曬手，仲有食客報料話你哋尋晚喺明洞嗰間「知牛」繑住手出嚟？

杏︰嚇！唔係嘛！會唔會繑第二個咋！（有相喎！）咁繑手又代表咩？我哋依家可以繑……（表情緊張）

記︰點解咁刻意發啲又攬又錫嘅相出嚟！

杏︰個個都有份（你最貼喎！）角度問題啫。

1/3　繑手出發

上周六（ 1日），網友拍到胡杏兒及李思捷在香港出發去首爾。兩人當眾繑住手排隊入閘，儼如情侶。

胡杏兒、胡蓓蔚、黃智雯、胡定欣行明洞 shopping，李思捷搞乜？咪就係幫手影相，以及跟住姊妹團後面做跟班囉。

早排情人節，單身了一段日子嘅胡杏兒在網上曬玫瑰花，冧爆。

女友酸溜溜

問到李思捷去韓國旅行，緋聞女友陳雅倫就話自己唔得閒去，至於正印春卷就答得酸溜溜，仲爆響口話思捷今次係去玩，而唔係思捷自稱嘅「傾公事」。

雖然兩人傳過分手，但又不時被影到出雙入對。

春卷（王寶寶）：

「冇收到李思捷 invite（邀請），我冇佢咁 happy。（佢追杏兒？）問番佢啦。（思捷去韓國做乜？）去玩囉，有 common friend喺嗰邊。（你唔一齊去？）有嘢做。」

早前陳雅倫生日，佢黐實李思捷，又自稱是其女友。《蘋果日報》圖片

陳雅倫：

「我唔喺香港，只係知佢出咗 trip。佢一向貪玩，佢同我講話冇拍拖。（同春卷呢？）佢之前同記者講咗已經分手啦。」

之後記者問李思捷，點解唔帶女友春卷一齊去韓國？又告知他春卷酸溜溜。他聽罷面黑黑說︰「你又知我開心？你覺得啫！」

雖然兩人口硬唔認撻著，但據知一向愛集郵的李思捷，早前突然高調話同正印女友春卷分手，無非是想回復「單身」追女神。一向玩開𡃁模的李思捷，要追視後胡杏兒真係有難度，所以他就找來老死胡蓓蔚幫拖。

胡蓓蔚撮合

據知胡杏兒、胡蓓蔚、胡定欣同黃智雯幾個金蘭姊妹等成立咗個「胡說八道會」，而胡蓓蔚同思捷好 friend，靠胡蓓蔚慢慢攝入個會。知情者說：「思捷私底下仲同胡蓓蔚講，話自己已玩夠，想搵番段穩定嘅感情，叫老友幫佢追杏兒。胡蓓蔚受唔住李思捷哀求，答應幫手撮合。李思捷亦知自己紀錄唔好，所以唔係一嚟就追，最初只係同杏兒做『姊妹』，等杏兒放低戒心先發動攻勢。佢把口好識冧女，加上杏兒單身咗咁耐都恨拍拖。今年情人節，李思捷又花又禮物，終於成功攻陷杏兒芳心。」

含情食腸

2012年，胡杏兒和李思捷宣傳《換樂無窮》時，一條腸兩份食，兩人表情仲冧到爆。

奉旨摸胸

在《換樂無窮》結局，李思捷為胡杏兒心外壓急救，大大對手壓落杏兒個胸，仲要扮慘，思捷真係好戲。

死𦧲同行

胡蓓蔚、黃智雯、胡定欣、胡杏兒及姚子羚是「胡說八道會」成員，大家不時聚會。李思捷因同胡蓓蔚老公單立文熟落，從而打入「胡說八道會」。

對於新戀情，胡杏兒其實亦有壓力，皆因一班好姊妹中，並非個個睇好呢段情。「今次韓國之旅本來冇預李思捷，只係幾個女人去。不過，出發前個多禮拜，杏兒突然話不如預埋個男人。聽講係思捷死𦧲要去。」知情者說。

其實 12年李思捷與胡杏兒拍劇《換樂無窮》時已經結緣。當時李思捷曾口花花話鍾意杏兒呢類女仔，又話想同黃宗澤對掉角色︰「我要做 Bosco，等杏兒唔使開工就約佢去街。」當時黃宗澤聞言亦暗寸對方︰「死仔！不過佢都冇機會。」講到有場胡杏兒被李思捷按胸的戲，黃宗澤亦指「心裏唔舒服」。

之前寸爆李思捷「冇機會」的黃宗澤，未知得悉舊愛呢段新戀情，個心會唔會比昔日更唔舒服呢。記者致電黃宗澤，惟截稿前仍未回覆。

黃宗澤 VS李思捷

鍾意就快D Share啦！

下一篇 》