黃日華近日新聞纏身，對於忽然遭「繼母」控訴不孝，周三（ 5日）黃日華終於發火：「等個天收佢！」
滾熱辣
繼母霸公屋 擸 40萬 黃日華：呢個女人破壞我家庭
家家有本難唸的經。黃日華太太梁潔華早前患上急性壞血病入浸會醫院留醫，怎料太太剛出院不久，黃日華又被指不孝。
黃日華 84歲老父黃桂，經歷過腸塞及肺炎等折磨，上月底因發高燒而急送伊利沙伯醫院。連日來，黃父第二任妻子劉煥珍向多間傳媒大控訴，指黃日華多年來冇俾錢照顧老父，又責怪黃為了公屋轉名問題而與老父恩斷義絕。
據知黃日華與老父結怨多年，全因繼母劉煥珍 14年前介入，影響其父母感情，釀成家變。一直啞忍繼母胡作非為的黃日華，周三（ 5日）終於爆煲，向本刊記者狂數她霸公屋、擸 40萬等多宗罪，他火爆說：「呢個女人破壞我哋家庭幸福，等個天收」
- 繼母狂出招 黃日華終還擊：等天收
今年 50歲的劉煥珍，連日來化身黃桂的代言人，頻頻相約不同傳媒，力數黃日華多年來冇盡孝義，一毫子都冇俾老父，搞到他們兩老要攞綜援為生。她又強調自己視錢財如糞土，絕非貪圖黃日華身家。她辯稱當年黃桂以 30萬買下的公屋單位，後來加上自己名，亦只是還黃桂一個心願。她認為即使公屋轉名，黃日華亦冇理由與父親不相往還多年。
反對老父再婚
至今未有反駁劉煥珍的黃日華，日前只暗示有人攪屎棍，他說：「種唔好因，有唔好果。總之我對得住良心，人在做天在看。」不過一直壓抑怒火的他，周三（ 5日）終於爆發。他說：「其實爸爸咁大年紀，唔想講佢咁多不是。不過有好多嘢黑就黑，白就白。咁多年嚟我都忍夠嗰個女人。」
據知內地出生的劉煥珍，在內地已育有一子兩女。大約 1998年，劉來港原本負責照顧黃日華阿姨，後來輾轉搭上了黃日華父親。黃日華說：「佢照顧我阿姨先識到我阿爸嘅！你（劉煥珍）咪安安份份做一個人囉！點解搞咁多嘢啫！」直至 2005年，黃桂堅持與劉煥珍結婚，黃日華沒好氣說：「我哋成家人叫佢考慮清楚，七十幾歲人結咩婚呀！佢係咩底細又唔知。我兩個家姐極力反對，但佢（黃桂）咁大個人咪自己揸主意囉！」
註冊後現形
不過結婚後不久，劉煥珍立即現形。黃續說：「註冊三日後，佢（劉煥珍）就要即刻取消我老竇同家姐嘅聯名戶口，取消埋我家姐公屋個名。我諗住呢間屋留番俾我家姐啲仔仔女女有個安樂居所。既然佢（黃桂）結咗婚，俾佢太太咪俾佢太太囉！我冇所謂喎！」
當年黃日華花 30萬買的東頭邨公屋單位遭人霸佔都算，最無奈劉煥珍連黃日華母親生前儲落的積蓄也蠶食埋。黃日華肉緊說：「我阿媽過咗身之後，剩番 30幾萬，叫我家姐管住啲錢。但佢哋結咗婚之後好快冇曬，話買股票冇咗 18萬。我老竇係守財奴，連六合彩都唔買。我幾兄弟姊妹每個月夾二千蚊俾番佢。後尾佢話攞綜緩，驚俾人告，就叫我哋唔使俾。」
黃日華自爆早年曾在鄉下買屋俾父親，但後來亦是化為烏有。「真係忍無可忍。我廿幾年前，拎咗十皮嘢（十萬）俾咗老竇返鄉下起屋，佢（劉煥珍）一路問我家姐攞番張屋契，將我祖屋都賣埋。佢好精，唔會問我哋攞，搵我老竇出聲。所以佢大大聲聲話冇問我攞過一毫子，梗係唔係佢問吖嘛！依家斷咗糧，咪搞啲嘢抹黑我哋囉！」
拒絕見老父
上周五（ 2月 28日），記者到過伊利沙伯醫院探望黃日華父親黃桂。黃桂勉強嚥下清淡的飯菜後，慢慢向記者哀鳴：「我……好想……見個仔。」因為一個女人，搞到兩父子結怨足足 14年，雖然黃桂話想見個仔，但黃日華卻說：「我外甥女去探佢，佢望都唔望我個外甥女，已經俾人荼毒曬！你估佢今次真係想我見佢咩！唔好話我老竇做錯曬，呢個係上天嘅安排。呢個女人已經破壞我哋家庭幸福，等個天收囉！」
父子情仇
父子邊有隔夜仇，但娛圈就頻頻發生父子反目事件，他們之間的仇恨更難以化解。
黃貫中
性格火爆的黃貫中，去年底在微博爆家暴兼發表殺父論，震驚娛圈。有報道指 80多歲的黃父因上門強行拖孫落街，遭朱茵反對，黃父一怒之下推跌朱茵。但事後就有傳黃貫中老父經已中風，炒作成分居多，真係清官難審。
活地亞倫
荷里活大導演活地亞倫早前被養女 Dylan在報章發表公開信，力數當年被活地亞倫性侵犯。活地亞倫兒子事後就在 twitter開火狂鬧父親唔配攞金像獎終身成就獎。
|
鍾意就快D Share啦！
|
|
|