[壹週刊 1252] 法國秘會 趙薇拉線 翻撻王菲 霆鋒：驚栢芝帶走兩個仔！ 霆鋒,趙薇,王菲,張栢芝,栢芝,謝霆鋒,M1,

王菲霆鋒前後腳到達巴黎睇時裝騷，兩人一舉一動都被傳媒高度關注。

娛頭

法國秘會　趙薇拉線　翻撻王菲　霆鋒：驚栢芝帶走兩個仔！

去年九月，王菲與李亞鵬離婚，其時，外界第一時間想到同樣回復單身的謝霆鋒，二人有機會再續前緣。

原來王菲的好姊妹趙薇亦一樣，更主動製造「鋒菲戀」機會，除了答應擔任霆鋒飲食節目《十二道鋒味》嘉賓，借出酒莊拍攝外，出發飛法國前，趙薇曾致電霆鋒，表示會安排「鋒菲」飯聚。不過，據知霆鋒未有答應。「係都唔喺嗰邊見俾人影到，驚栢芝又帶走兩個仔！」

據悉，與栢芝搞清離婚手續兩年的霆鋒曾向友人透露，前妻有問過他與王菲現時的關係，加上試過與周迅傳緋聞，令栢芝一聲不響帶兩子遠飛溫哥華的先例，為免再觸動對方過敏神經，霆鋒未敢輕舉妄動。

十年再現

去年九月，與李亞鵬透過微博公開宣布離婚後，王菲大部分時間居港並美國、印度周圍飛，甚少留在北京。

今個月一日，王菲與好友趙薇一同到巴黎出席時裝週，並以壓軸嘉賓身份，出席巴黎 Celine 2014秋冬時裝騷；離婚後首度出席公開活動，也是十年後再現身當地時裝週，阿菲出現，即被傳媒包圍，心情勁靚的她，亦開心攞住手機不停拍照。

王菲身處巴黎翌日（三月二日）淩晨，舊愛謝霆鋒亦起程飛往當地，除了出席 Valentino時裝騷，行程主要目的，是王菲的好姊妹趙薇，答應霆鋒為浙江衞視的飲食節目《十二道鋒味》做嘉賓，霆鋒與外景隊將會到趙薇一一年，以四千二百萬買下的法國波爾多酒莊拍攝兩日，有指每次來港，都住在趙薇青龍頭皇璧的王菲，屆時亦會隨趙薇到酒莊。

有兩子做籌碼，做唔到正印，栢芝都唔想霆鋒有新戀情。

趙薇撥行大葵扇安排鋒菲在自己的酒莊密會。

被邀出席 Valentino時裝騷，霆鋒提早一天到埗，下榻當地香格里拉酒店，卻未見其蹤影。

趙薇舒淇同在巴黎睇時裝騷。

心情大靚的阿菲，不斷用手機拍照。

王菲以壓軸嘉賓身份出席 2014 Celine時裝騷，引起一陣混亂。

三角關係

「鋒菲芝」三角關係錯綜複雜，亦經歷多次離合，最終王菲退出三角戀，但栢芝和霆鋒亦逃不過離婚收場命運。

00年姊弟戀曝光

經歷與竇唯婚變的王菲，與年輕自己 11年的謝霆鋒撻著，二人出席《花樣年華》慶功宴，離開時王菲在傳媒前主動拖霆鋒，十指緊扣公開姊弟戀。

02年栢芝介入

1月　栢芝因為《慈善星輝仁濟夜》飛車受傷入院，霆鋒連日探望，二人傳出地下情，但當時男方與王菲仍在熱戀中，與栢芝只「兄妹」相稱。

3月　霆鋒與栢芝相約深宵唱 K後，撞毀法拉利發生「頂包案」，之後又被網民拍到二人在泰國散心，戀情曝光，「鋒菲戀」因而結束。

03年「鋒菲戀」復合

霆鋒與王菲再度復合，二人在北京撐完枱腳，離開時霆鋒拖住王菲，上映第二幕「世紀拖手」，但今次由霆鋒主導，栢芝大受打擊，行為失控，更一度搭上霆鋒好友陳冠希，被網友目睹同遊日本。

04年「鋒芝」翻撻

「鋒芝」在拍攝電影《無極》重燃愛火，為此霆鋒與王菲戀情正式落幕，而栢芝亦與老外男友分手。

06年閃電結婚

霆鋒和栢芝出席上海蠟像館活動，在杭州高調拖手，正式復合；同年，二人秘密在菲律賓閃電結婚。

主動拉線

事實上，對失婚好姊妹一直十分照顧的趙薇，早有心撮合鋒菲復合，據知她曾致電霆鋒，表示會約埋王菲到酒莊，安排大家一齊飯聚。

「趙薇同阿仔（霆鋒暱稱）講，話阿菲都會去巴黎，難得大家都喺法國，話諗住約埋一齊食餐飯。其實阿菲同阿仔分手之後，都有聯絡過，佢哋根本唔係反曬面嗰種！」霆鋒身邊人說。

為開解再歷婚變的王菲，趙薇不時陪好姊妹出外散心，幾個月間，試過一齊到美國探童童，又到印度參見大寶法王，眼見好友對霆鋒並不抗拒，更俾力撥到「行」。

「今次趙薇做咁多嘢，其實佢之前都試探過阿菲，見阿菲唔抗拒，先至敢打俾霆鋒，佢反而無諗到，霆鋒會咁避忌！」知情者說。

曾向外暗示王菲是最愛，但謝霆鋒卻拒絕與對方在法國約會，全因前妻張栢芝。

「阿仔話就算係見都唔喺巴黎嗰度依家咁多記者，如果俾人影到，佢驚栢芝又帶走兩個仔！」霆鋒身邊人說。

當年愛得轟烈，王菲霆鋒兩度上演世紀拖手。

離婚兩年多，霆鋒因兒子關係，經常與栢芝聯絡。

好姊妹第二度失婚，趙薇不時陪阿菲出遊開解。

霆鋒被爆秘戀周迅，栢芝立即帶仔出走。

必勝籌碼

栢芝有 Lucas同 Quintus做籌碼，多年來要乜有乜，霆鋒亦為免觸發前妻過激情緒，影響到兩個仔，對栢芝的要求，一一就範。

抱子跳樓

08年，栢芝捲入淫照風暴，一度傳出與霆鋒婚姻亮紅燈，有指她曾以抱子跳樓來威脅霆鋒，不要看任何相關淫照及跟她離婚。

帶子出走

11年，栢芝主動向淫照男主角陳冠希「機艙破冰」，激嬲霆鋒提出離婚並收回財政大權，有指栢芝每次鬧交都提出將物業轉到她名下，又以帶走兩個仔做威脅，要霆鋒將賺大錢的後期製作公司「 PO皇朝」股份也轉給她，企圖全面經濟控制霆鋒。

未完全放低

本週一，張栢芝由助手及化妝師陪同飛抵上海，此行將工作四日，兩子未有同行。

同霆鋒離婚已經兩年有多，但栢芝至今仍未完全放低。

「佢成日借啲意叫霆鋒上屋企睇兩個仔，有時同兩個仔玩得夜，佢都會留低過夜，不過霆鋒應該無意思復合，只係栢芝未完全死心！」

即使復合無望，但栢芝對霆鋒身邊緋聞，始終保持高度警覺。

「之前突然爆咗阿仔同周迅，栢芝已經發曬癲，阿仔為咗安撫佢，都即刻同周迅劃清界線，仲第一時間搬咗去寶雲道住；但佢無諗過栢芝會粒聲唔出，就帶兩個仔飛咗去溫哥華。佢知霆鋒最緊張兩個仔，嗰次搞到拉姑喊曬，霆鋒要打電話氹番佢帶兩個仔返嚟香港，之後傾掂數，霆鋒喺新加坡買層樓俾栢芝，安排三母子喺嗰邊生活！」

電話探口風

當年三角關係糾纏不清，時至今日，栢芝對昔日情敵，仍然介懷。

「王菲爆離婚嗰段時間，栢芝都好緊張，有次喺電話問霆鋒，同王菲有無嘢？明知栢芝少少嘢都好敏感，又容易失控，所以佢點敢咁高調同阿菲吖！阿仔話依家乜都要諗咗兩個仔先！」霆鋒身邊人說。

事實上，與兩個仔 Lucas和 Quintus移居新加坡，半退出的栢芝也傳出在當地有追求者。

「阿仔話如果栢芝搵唔到好男人，佢都唔敢公開拍拖，仲講笑話可能要做和尚！可想而知，佢真係驚栢芝失控，所以唔會亂嚟！」

霆鋒到達巴黎，與經理人 Mani歎海鮮餐。

離婚後，王菲去過美國探大女童童，去年十二月，又一同返港 shopping。

去年十一月，回復單身的李亞鵬被拍得與 25歲新歡拖手兼過夜。

四月探仔

袋二千萬人仔，為浙江衞視做飲食節目的霆鋒，法國之行除了到趙薇的酒莊取景，亦約好了範冰冰，為節目走訪當地介紹美食。

「霆鋒大概喺法國留十日，嚟緊啲嘉賓係 Eason同高圓圓，都係要去第二度拍，不過，佢已經同栢芝講咗，四月會去新加坡探兩個仔！」霆鋒身邊人說。

桃色恐怖

經歷婚變，加上前妻是醋埕，霆鋒對於感情事更加低調， 11年與栢芝離婚以來，先後只傳出兩段有聲無畫的緋聞。

周迅

去年 7月，謝霆鋒被爆與內地演員周迅撻著，女方更搬到金鐘栢舍，與霆鋒樓上樓下方便見面，為免後患，在戀聞爆出前一晚，霆鋒漏夜搬離栢舍，並入住未完成裝修的寶雲道新居，速斬「鋒迅戀」。

文詠珊

去年 12月，傳霆鋒在謝婷婷撮合下，與「模 art」 Janice Man秘密發展，並指二人在一個私人派對上糖黐豆互相餵食，表現親暱，為此， Janice Man背上霆鋒緋聞女友之名，慘遭網民圍攻。

鍾意就快D Share啦！

下一篇 》