郭母來港湊孫
有餡晶晶專心安胎，湊 B重任就交由郭母代勞。上周六（ 5日），本刊便拍得郭母推住 8個月大的中曦，在屋外散步，全程只得一名工人傍實。
打頭陣
霍震霆朱玲玲孖住探 郭晶晶懷第 2胎
去年霍家爭產案持續不休，今年 9月重審。為免影響產後不久的郭晶晶身體，她與老公霍啟剛及 8個月仔仔，就被安排搬去霍家大宅對面的排屋。剛晶於是趁這段黃金時期全力造人，為家族沖喜。
據知今年 32歲的晶晶，現時已懷有第二胎。上周六（ 5日），霍震霆和朱玲玲再次合體到排屋探新抱，而郭母更專誠抵港湊孫。晶晶再有喜，變相每月再從霍家的「家族基金」中擸多 6萬蚊零用錢，難怪她甘願做霍家的生仔機器。
豪門食餐晏都有時間表。根據霍家慣例，逢周六下午是家族成員的 family day，各成員會在沙宣道霍家大宅聚首一堂。即使剛晶經已搬去大宅對面的排屋海日樓，但他們逢周六也會帶埋囝囝中曦到大宅食飯。
霍家齊腳探晶晶
不過剛過去的周六（ 5日），慣例突然打破。當日下午兩點多，霍震霆與二仔啟山現身剛晶新居。記者發現 68歲的霍老爺神采飛揚，上樓時兩父子傾唔停，心情興奮。五分鐘後，朱玲玲和細仔啟仁也趕到。霍家齊曬腳於剛晶新居聚集，看來有大事發生。
據知剛晶搬入新居半年來，一直不設防努力造人，加上朱玲玲曾開到口話恨抱孫女，又頻頻吩咐工人煲湯水俾晶晶進補，難怪晶晶的肚皮成功爭氣。
「話曬晶晶係運動員出身，所以上年 8月生完冇耐，身體好快復元。不過佢哋當時住喺大宅，咁啱嗰排霍家爭產件事好麻煩，經常有律師嚟大宅開會，搞到晶晶冇乜心機。佢依家搬咗去對面嘅排屋，雖然面積比大宅細幾倍，但話曬環境寧靜啲，造人當然事半功倍」知情者說。
現時晶晶已懷胎兩個月，暫時未知性別，但對近日被爭產案籠罩的霍家，無疑是一則喜訊。難怪霍震霆、朱玲玲等人 family day當日到排屋探望晶晶，費事粗身大細的晶晶兩頭走。
郭母急來港湊孫
晶晶再有喜，上周郭母已特登由北京飛抵香港，並入住剛晶新居，方便照顧女兒之餘，兼幫手湊孫，分擔晶晶的日常工作。上周六（ 5日），本刊便拍得郭母推住孫仔霍中曦，由一名外傭陪同下在排屋外散步，讓中曦吸收自然陽光。現時八個月大的中曦，眼仔睩睩、面圓圓，手仔和腳仔有肉地，非常可愛。出生初期似晶晶的中曦，現時輪廓十足老竇霍啟剛，認真變得快。
其實霍家得悉親家來港，本來安排郭母入住酒店，不過郭母就拒絕霍家這番「好意」。知情人士說：「上次剛晶喺香港搞婚禮，霍家就安排晶晶父母坐經濟艙，同其他賓客逼大巴去會場，住嘅酒店又普普通通，佢哋覺得好唔受尊重，所以郭母唔想再受霍家咩恩惠。加上啟剛成日要北上公幹，今次郭母就企硬同晶晶一齊住。」
月擸 18萬
雖然郭母揸頸就命，但其實晶晶今次再有餡，除令自己在霍家地位提升外，每月可支取更多些零用錢。據知霍家家族成員除日常開支外，每月均獲「家族基金」發放零用錢。前年 11月，晶晶榮升新抱後，每月就有 6萬蚊零用錢；去年初，晶晶證實懷第一胎，霍家再每月俾多 6萬蚊孫仔使。換句話說，原本每月淨袋 12萬的晶晶，加埋懷第二胎的每月 6萬蚊獎勵，晶晶以後每月便獲發 18萬零用錢。
啟剛叫停工作
人財兩得，不過晶晶以後更要聽教聽話，做個低調的霍家新抱。據知啟剛得知再做老竇，已經立即叫晶晶減少拋頭露面。本周一（ 7日），晶晶代言的護膚品牌舉行頒獎活動，不少歷代的代言人如李美鳳、李玟也現身撐場，唯獨晶晶冇影。知情人士說：「晶晶同呢個護膚品牌仲有幾年合約，大家合作咗咁多年，晶晶不嬲都好合作出席宣傳活動，不過今次就一口推咗。其實晶晶去呢類活動都係賺啲私己錢傍身，既然佢家陣有餡都分多啲零用錢，咁當然唔使咁密出席收錢活動」本刊亦搵過該護膚品牌的公關，不過截稿前未有回覆。
朱玲玲漏口風
新抱造人成功，朱玲玲當然十分風騷。她上星期與一班慧妍雅集成員開會時，唔覺意漏口風話好快再抱孫。知情人士說：「 Loretta（朱玲玲英文名）嘅電話收埋好多佢孫仔嘅相，成日拎出嚟同大家分享，佢仲話等埋第二個出世，就會同佢哋一齊影相集，將來開相展可以放啲得意嘅孫仔相！」
大宅 vs排屋
霍啟剛與郭晶晶婚後搬離薄扶林沙宣道霍家大宅，獲家族批准他們以 BVI公司購入沙宣道海日樓單位。新居與霍家大宅只有一分鐘路程之距，不過屋內面積、設備差天共地。
爭產再起波瀾
前全國政協副主席霍英東 06年去世，留低 300億遺產。不過霍英東去世僅 5年，霍家便爆發家族爭產，分配問題至今仍未解決。
霍震寰出手
07年至 08年間，霍震寰要求各房成員簽署協議，確認部分家族公司股份等資產歸他所有，長房及其他成員拒簽，而二、三房成員則在簽協議後，共獲分逾 5億元。
一度和解
爭產案於 12年 8月一度和解，當中最得父親痛錫的霍震寰取得 5.73億，長子霍震霆分 2.93億，幼子霍震宇獲分 2.89億，至於兩名女兒則各分 1.18億。
兄弟決裂
11年，霍震宇指二哥霍震寰把約 64億遺產據為己有，又指他隱瞞父親數十億的南沙項目權益，提出重審案件。最後重審案件失敗，霍震宇再建議跳過上訴庭，直接由終審法院處理。
兩女入戰團
13年尾，與霍震宇同一陣線的長房女兒霍麗娜、霍麗萍，支持重開爭產案。二人聯名入稟法院，要求撤換霍震寰及所有遺產執行人，案件 9月開審。
晶晶 9年收 5千萬
城中唔少豪門新抱，有名牌、鑽飾及磚頭揸手。不過貴為霍家大新抱郭晶晶，多年來實質落袋的禮物唔算多，即使為家族誕下第四代嫡孫，暫時只得自己和囝囝每月零用錢合共 12萬元，她則未有任何額外獎賞。難怪晶晶要搏命谷男丁，藉此分多份生活基金。
500萬禮金
12年，霍啟剛迎娶郭晶晶時，霍家批出千萬於香港、南沙舉行連續三場世紀婚禮的開支，場面盛大。不過風光背後，對女家就相當慳皮，有指霍家一口價以五百萬人民幣做禮金，並無加送豪宅作禮物。
霍啟剛月𢭃 15萬
晶晶靠個肚每月淨袋 18萬使費，但老公作為霍震霆長子，當然待遇唔差。現時霍啟剛在上環信德中心的英東集團上班，月入 15萬，未計年終酬金和花紅。另外，霍啟剛現時所用的名車和司機，均由家族基金支付。
生仔有得分
豪門新抱肩負繼後香燈重任，城中不少富豪太太、女友，為添男丁生完再生，有望借慈姑椗母憑子貴，並以此作為分家產的籌碼。
|
鍾意就快D Share啦！
|
|
|