谷到面紅
細細粒收到《老表，你好 Hea！》監製黃偉聲的減肥令後，每日 keep住喺屋企旁邊空地練跑一小時，過程雖然辛苦，但佢全程落足力跑，面都紅曬，冇 hea㗎！
真面目
美圖瘦瘦 喪跑戒零食 細細粒甩脂 20磅
靠肥夠可愛入屋的細細粒（陳嘉佳），諗住肥得受歡迎可以免甩脂噩運，但新劇監製卻怕她跟阿 Bob合演情侶會令觀眾食滯，竟下令要細細粒修身減肥。
據知經過近一個月的地獄燒脂，幾經辛苦先搣去 20磅肥膏。上週六（ 19日），本刊直擊細細粒喺大埔屋企跑步直落跳埋鄭多燕。做運動辛苦，冇得食先大件事，細細粒話：「減得好辛苦，又冇啖好食，真係諗起都想死！」
細細粒之前雖然講過唔會減肥，當初靠《老表，你好嘢！》的肥妹角色成功入屋，但今次《老表，你好 Hea！》監製黃偉聲卻下令要佢減肥修身，細細粒亦焗住向脂肪拜拜。對體重長期徘徊 240磅兼勁食零運動的肥妹來說，大堆脂肪確係好難燒。
唔想迫爆個 mon
上週六（ 19日），本刊直擊細細粒喺大埔新居密密操兵減肥。當日身穿黑色衫的她，在屋企隔籬空地跑步操練，在接近 30度的高溫下，細細粒跑完一小時已經想叫救命。之後短暫休息 15分鐘後，細細粒又再繼續跳鄭多燕舞步，谷到面都紅曬，睇得出佢相當努力。
細細粒現時除咗要應付新劇《老表，你好 Hea！》外，下月仲擔任鄭多燕 show的表演嘉賓，到時會跟鄭多燕大跳減肥舞步，細細粒希望到時可以應付。
週一（ 21日），本刊致電細細粒問到有關減肥一事，她說：「因為嚟緊會開《老表》，今次同 Bob做情侶，之不過我哋兩個咁大份嘅人夾埋一齊，到時實會迫爆個 mon，所以監製都同我講，希望我可以減嚇肥，等個畫面鬆動啲，視覺效果都靚啲！𠵱家日日都迫自己跑一個鐘步，飲食方面又食清咗好多，戒咗所有多油多糖嘅零食，生果就代替咗零食。諗番起初頭真係好辛苦，又冇啖好食，真係諗起都想死！好在辛苦過後都有回報嘅，起碼都減咗 20磅，不過唔可以鬆懈住，仲要 keep住減㗎！」遲啲瘦到唔認得嘅細細粒，可能又殺多條出路喎！
戒甜減肥
睇細細粒個款就知佢零運動兼多油多甜，今次細細粒決心大，一日三餐戒甜仲要喪做運動，有志者事竟成，話唔定真係可以變細細粒！
|
鍾意就快D Share啦！
|
|
|
