六年前就哭訴過銀行結餘不足 50元，江若琳下月約滿寰宇，再指十年零收入，拒絕與寰宇續約。
封面
微信回覆 每月墊支 3萬 3 碌阿媽附屬咭 江若琳：蛋糕錢都同我計
提名過去年金像獎「最佳女主角」、內地拍劇酬勞 200萬人仔，有價有市有資歷，不過捱足十年莫講冇樓揸手、冇錢過手，零積蓄仲倒爭公司 200萬，難怪 10年生約一到期， 26歲江若琳寧願對薄公堂都唔願續約寰宇。
老闆林小明唔認冇糧出，不過本刊獲悉收入六成被公司抽起，出碟開騷，甚至員工夥食，就連祝捷會蛋糕都實報實銷入江若琳數，每月墊支 3萬 3的生活費亦遲早計數要還，難怪慘情江若琳要靠碌阿媽附屬咭過活！
旗下藝人李彩華、梁俊一，甚至小強阮民安都先後解約，今次終於輪到江若琳。上週五（ 18日），寰宇老闆林小明向電台節目承認，於兩星期前收到旗下藝人江若琳委託律師行發出的律師信，要求與經理人公司解約。 16歲就簽約寰宇，一直都表現得忠心耿耿與老闆同一陣線，原來江若琳一直忍氣吞聲，下月 2日，十年死約終於到期，原本打算把官司低調處理，但無奈被迫引爆。
阿媽勸退出
林小明接受商台《 1圈圈》電話訪問時，表示對收到律師信感到詫異，又認為江若琳年紀輕，此舉是受人唆擺。
外間有指江背後有土豪撐腰，週一（ 21日）江若琳透過電話短訊回覆本刊，由於牽涉法律程序，解約內情不便透露，不過就堅決否認有內地土豪撐腰。
知情人士說：「江媽媽教書出身，一直想個女讀多啲書，但係 Elanne真係鍾意唱歌做戲，當年先會幫個女簽約。點知做咗十年，捱到周身都係傷，仲要完全冇錢搵到，江媽媽覺得好肉赤同埋信錯人，所以今次好堅持叫 Elanne同寰宇解約，唔想佢繼續做，趁後生讀番書。」
貼錢開工
08年被傳是小三，導致林小明與趙雪英離婚時，江若琳曾經拿出結餘僅得五十多元的銀行簿仔力證清白，冇受「照顧」。
六年過去，江若琳一早北上拍劇賺人仔，又升呢提名金像影後，原來實際收入仍然沒有增長。「每個 Job公司抽傭抽六成， Elanne每次接 Job只係實收四成酬勞，再加公司每個月三萬三底薪，照計梗係夠錢用。不過梳化、衣服、排舞、練歌、租車、 dancer錢全部入佢數，簽唱片公司之前，出碟、開演唱會，由租錄音室、製作費、拍封面、拍 MV又係入 Elanne數，連每月 3萬 3其實都係墊支費，要還㗎！所以佢啲酬勞被公司扣曬找數都唔夠用， 10年埋單仲爭公司差唔多 200萬。」
江若琳曾向身邊好友大呻︰「大數都算，連啲細數，好似公司文具都要貼，最離譜係 07年唱片祝捷會，畀記者影相個蛋糕都同我計！所以賺幾多都唔夠還，唔想條數愈滾愈大，出去做嘢同同事食飯寧願即俾，費事又計落條大數，好彩咁多年嚟，都袋住媽咪張附屬咭。」
趙雪英：預咗呢日！
下月 2日與寰宇的十年死約正式屆滿，林小明表示當年雙方合約是十年死、五年生，死約滿後，續約優先權在寰宇一方，但江若琳則堅持不願再次續約。週一記者致電江若琳，她拒絕回應，不過就再次以短訊回覆，強調十年零收入：「現時我真的不便回應太多，我只能夠說，一個賺過千萬，但十年來一毫子也沒有分到過的藝人，向公司申請生活費，到底是墊支還是酬金，我不知道怎界定了。」
至於十年前一手發掘江若琳的前老闆娘趙雪英，則在電話回應說一早料到有呢一日：「我離開咗公司咁耐，佢哋嘅合約有冇變化我真係唔知，但我一早估到會有呢一日。其實 08、 09年梁俊一（前寰宇藝人）都向我求救，請我幫佢搞掂份合約，佢都搞到又抑鬱又有情緒病。我係唔鍾意江若琳，不過林小明就仲衰過佢！」前妻趙雪英的評語可圈可點！
傷痕累累
話就話寰宇一姐、林小明愛將，其實十年來江若琳不止付出與實際收入不成正比，更捱得一身傷，江母因此肉赤極力支持女兒退出。
白做 10年欠 200萬
數字遊戲
04年 16歲簽約寰宇至今十年，江若琳自稱為公司賺過千萬，自己一毫子冇得分。其實十年以來，江若琳密密做，收入應不止千萬。
|
鍾意就快D Share啦！
|
|
|
