掃呢頁CODE去手機

2014年4月23日 星期三

[FACE 361] 有機可乘 茶包傳情 大隻仔高攀陳凱琳 凱琳,溫家偉,大隻仔,陳凱琳,MF,




大隻仔溫家偉同陳凱琳因拍飲食節目認識,識咗一個月,兩人 Instagram已不時 post合照,見大隻仔可以搭曬膊頭,就知佢埋到身網上圖片

真面目

有機可乘 茶包傳情 大隻仔高攀陳凱琳

大隻港男溫家偉,論拍劇雖然唔夠袁偉豪多機會,但大隻仔勝在有觀眾緣,拍住綜藝節目易入屋,更加與各小花特別投緣。去年拍《神槍狙擊 2013》時力追同劇女神岑麗香,佢同香香都係外國長大,大家鬼聲鬼氣,借翻譯劇本呢招,成功埋香香身,仲喺公司 canteen公然撐枱腳。

橋唔怕舊,大隻仔最近忙拍新飲食節目,又𥄫中拍檔應屆港姐冠軍陳凱琳,拍完幾集就同陳凱琳關係突飛猛進,更在鏡頭前餵對方食嘢。有個鋪王老豆,身家億億聲住 5,000呎九龍塘獨立屋的陳凱琳,竟然相當受落,早前回溫哥華探親,仲專誠空運愛的茶包畀大隻仔。高攀富家女,大隻仔掂喎!

美國讀書嘅 27歲溫家偉,同一眾外國長大嘅華姐、港姐自然傾得埋,加上廣東話唔錯,可以做人肉翻譯機,翻嚇翻嚇,好易擦出火花,今次大隻仔就𥄫中 22歲港姐冠軍陳凱琳。

狂追一個月

據知由於陳凱琳做主持經驗甚少,睇中文能力又一般,大隻仔舊招翻用,主動教陳凱琳中文,又幫佢譯劇本,短短一個月已埋到身。

加上大隻仔追女手法又大膽,拍攝期間毫不掩飾對陳凱琳嘅好感,喺第二集,就見到大隻仔專登餵陳凱琳食韓燒,拍攝時又成日坐喺陳凱琳隔籬,好鬼 close。

餵埋

節目第二集介紹韓燒,大隻仔失驚無神話要餵食,坐佢隔籬嘅拍檔李佳芯唔餵,反而要餵坐對面嘅陳凱琳(右圖),冧得好明顯喎!

黐實

第三集介紹甜品店,大隻仔又出招,講講嚇就搭咗隻手去陳凱琳身後,仲黐到實一實。電視截圖

大隻仔力追陳凱琳,雖然未追到手,不過前排陳凱琳返溫哥華探親,專登買茶包送畀大隻仔,大隻仔開心到即刻 post上網。呢個茶包絕對唔使收錢,仲好有愛添囉!

自己餵陳凱琳就得,反而另一主持陳國峰想餵,大隻仔就即刻撲埋去搶食,好明顯宣示主權。電視截圖

大隻仔︰佢好靚女

雖然未正式行埋,不過陳凱琳對呢位「觀音兵」亦相當受落,早前陳凱琳回溫哥華探親,特別買愛心茶包畀大隻仔,仲寫上「 love tea」。

冧得掂千金陳凱琳,大隻仔亦大讚「新歡」靚女,他說:「拍呢個節目認識嘅,佢好靚女呀,又玩得,好聰明㗎!(係咪想追佢呀?驚唔驚香香呷醋?)唔係追, friend嚟啫!私底下有傾偈,但多數圍繞工作,香香都係朋友啫!(陳凱琳同香香邊個靚啲?邊個做女朋友好?)哈哈!兩個都靚!我邊可能追到佢哋呀!兩個都係朋友啫!」唔使咁謙喎!

陳凱琳為 13年港姐冠軍,當年以 17萬選票大熱勝出。家住九龍塘市值過億獨立屋,父親陳桂祥 88年曾經將佐敦道一個物業,轉按畀蜆殼石油,成功套現 20幾億。陳凱琳條件咁屈機,難怪大隻仔想追。

香香 out

大隻仔拍《神槍狙擊 2013》時主動追過香香,之後組情侶檔出席活動,可惜最後都追唔成,惟有做好朋友。

譯劇本追女招

大隻仔追女冇有怕,最愛向拍檔埋手,之前拍《神槍狙擊 2013》及《女人俱樂部》就用譯劇本呢招狂追香香,就算自己冇工開,都陪香香開工。今次拍飲食節目就想追陳凱琳,亦都係用「人肉字典機」呢招,大隻仔真係見一個追一個。

拍攝《神槍狙擊 2013》,大隻仔同香香朝夕相對,又成日幫人譯劇本,關係非一般。

陳凱琳最近忙拍新劇,戲分唔少,唔知大隻仔有冇幫手翻譯劇本呢?



鍾意就快D Share啦!