娛頭
肉交一年 100萬情婦贖身 食硬李心潔 彭順唔斬纜
憑電影《見鬼》獲金像及金馬影後的李心潔，跟導演彭順結婚四年，婚後表現恩愛，彭順留港拍戲，李心潔則大部分時間留守馬來西亞，照顧丈夫與前妻所生的女兒。鞭長莫及，不時兩邊飛的彭順原來在香港秘密另組一頭家，跟「 SING之天使」出身的李悅彤（ Liddy）拍拖一年兼且住埋！據了解，彭順不單用一百萬為情婦贖身脫離前經理人，更搵兄弟開戲幫手捧對方做女主角。二人在圓方偷食斷正後，彭順雖然即飛馬來西亞箍煲，明知老婆口硬心軟的他，表面做大龍鳳請罪，但私下卻未有斬纜，食硬李心潔，繼續左右逢源。
一夫多妻
上週五（五月二十三日）傍晚，彭順跟比自己後生二十二年，現年二十六歲、𡃁模出身的李悅彤（ Liddy）到圓方拍拖睇戲，零知名度的 Liddy全程不停向人夫彭順施展嗲功，大庭廣眾主動埋身，冧爆的彭順亦肆無忌憚，與對方又攬又啜親熱，睇完戲再去撐枱腳，之後更齊齊返回將軍澳日出康城愛巢。
爆出背妻偷食，婚前曾被拍到跟𡃁模 Kama羅凱珊到佐敦酒店爆房的彭順，即致電老婆自首，並於週一（二十六日）早上飛馬來西亞箍煲。
「李心潔好愛彭順，上一次已經冇追究，仲走出嚟撐佢，身邊朋友都覺得佢今次都會原諒彭順，只係時間問題，更何況李心潔喺馬來西亞長大，嗰度回教徒仲係接受一夫多妻制，所以佢可以容忍。」知情者說。
逼二揀一
要急救婚姻，但彭順依然未有跟小三斬纜，事發後，跟情婦仍保持密切聯絡，而樂於有個導演情人助她在娛樂圈開路的 Liddy，亦向身邊朋友透露不會輕易放手。
「 Liddy之前一直都係同圈外人拍拖，但搭上咗彭順之後就好唔同，尤其事業低潮期，有個導演男友幫佢好多。其實佢哋今年初試過分手， Liddy要求彭順二揀一，不過無幾耐，佢又主動嗌復合，兩個好快無事。」 Liddy身邊人說。
當眾吵鑊
早於今年一月初，本刊發現彭順跟 Liddy在銅鑼灣時代廣場發生爭執，當時剪了齊蔭髮型的她，攞住 shopping紙袋，跟男方在商場當眾拉扯一輪後，終被彭順氹番，二人孖住離開。
據了解，十七歲入行的 Liddy性格麻煩，過去因諸多投訴，已先後換了幾間經理人公司，一直發夢拍戲做女主角的她，一一年再跟奧美思娛樂簽了十年合約。
「拍拖幾個月後，彭順就叫跟開佢嘅黃柏基俾 Liddy喺新戲《四非》做女主角，男主角係周柏豪，因為柏豪唔知對方係彭順嘅人，開工無耐就追佢，拍到一半先知係監製彭順女友，都即刻收手，其實嗰陣彭順都喺泰國陪住 Liddy拍戲。」知情者說。
1月時代廣場糾纏
今年 1月，未爆背妻偷食，彭順依然肆無忌憚跟 Liddy在時代廣場拍拖行街，其間更吵大鑊，二人拉扯一輪，最後彭順氹掂女方走人。
私下接 job
有彭順做後盾，一直不滿經理人公司的 Liddy又再出招，最終更冧掂彭順出錢贖身。
「 Liddy上年底喺泰國拍完戲返嚟，就同經理人攤牌，仲話已經有錢喺手，隨時可以解約，咁啲錢當然係彭順俾啦。」知情者說。
求證 Liddy的前度經理人胡鳳玲，她承認對方曾付百萬贖身費。
「我唔可以講實數，一定有過百萬。（點解會反面？）佢一直都有私底下接 job，警告過好多次都係咁，仲愈來愈過分，佢肯搏去換機會，但我哋公司又唔會安排佢去啲唔正經飯局，佢咁叻女，抵佢有今日嘅。」
此外，寰宇老闆之一林小強亦表示公司旗下導演彭順，已飛馬來西亞處理私事，但他會照原定計劃，於八月到台灣執導《宅女偵探》。
進化頻密
初入行的 Liddy，樣子普通甚至帶點娘。力爭上遊的她一直進化，唔同階段，樣貌亦有不同變化。
做極唔起
彭順小三，令在娛圈沉了七年的李悅彤（ Liddy，原名李婷）終於響朵。現年廿六的她，中六畢業曾在香港航空當空姐，後加入模特兒公司，並成功在無綫節目《耳分高下》擔任 Sing之天使之一「檸檬」，外貌平凡、三圍 32、 24、 33的她，當時在「天使」群中並不起眼。
12年， Liddy轉戰樂壇，推出首支單曲《幸福頭像》，反應亦麻麻，加上跟經理人鬧不和，最後唱片亦出不成；反而為動漫劇《甜心格格》唱片尾曲，則令人留下印象。一直想拍戲的她曾客串電影《喜愛夜蒲 2》及港台劇《沒有牆的世界 III》，搭上彭順後，去年終於有機會在新片《四非》中擔正做女主角。
易嗒女
導演等同話事人，在電影握生殺大權，亦因此帶來「覓食」之便，無論主動定被動，食女易過借火。
王晶
入選王晶的「晶女郎」榜，十居其九都會傳緋聞。最經典當然是 N年前的邱淑貞，之後有關秀媚、陳雅倫、梁敏儀等，近年轉向北食，開戲兼花百萬出寫真的童菲。
|
鍾意就快D Share啦！
|
|
|