Isabella飾的聾啞女因憤怒向詹瑞文舉中指，她直認自己也曾反叛兼爛玩。
探熱針
做戲咁做 唔妥詹瑞文 梁洛施舉中指
由童話故事回歸現實後，梁洛施積極在娛樂圈搵位立腳！頭炮與詹瑞文合作舞台劇《快樂勿語》，挑戰難度做啞妹，彩排時向詹 Sir舉中指洩憤，駕輕就熟的 Isabella直認也曾反叛，是個憤怒少女，所以會以自己做辦，教育與李澤楷生下的三個小朋友，唔好行錯路。
大仔分享秘密
外表斯文的 Isabella，在彩排時突然向詹瑞文舉起中指，一副挑釁嘴臉，完全冇就住。
「因為我個角色初初係好壓抑，唔識表達自己，第一次見到老師（詹 Sir）時好不滿，所以用手語表達當時好嬲嘅情感，仲有一幕我被困喺個好多花嘅監獄入面，都係要表達自己深藏嘅內心世界。」梁洛施說。
回憶自己少時反叛期， Isabella聲言只要稍有不合心意的事，馬上嚟料，話爆就爆。
「我細個好爛玩，一直都係群埋啲男仔堆，亦都反叛過，當時乜都唔會同媽咪講，好任性。我唔想自己嘅小朋友同我一樣，我會諗番當時嘅我做反面教材，提醒自己，唔可以逼小朋友就範，要以朋友身份同佢哋溝通，而家大仔都會有啲小秘密，會同我分享。」本身同樣是單親家庭長大的 Isabella，對教育下一代，早已定下一套方法。
唔知阿爺咁勁
Isabella強調，自己不會做怪獸家長，至於三個囝囝，亦不知老豆李澤楷及爺爺李嘉誠有幾巴閉。
「佢哋都仲細，而且佢哋唔會睇到香港新聞，到咗大個，自然會知道。我覺得小朋友嘅背景係唔會影響我教育佢哋嘅方法，我會因應三個囝囝唔同嘅興趣去發掘佢哋嘅潛能；五歲嘅長治對彈鋼琴好大興趣，呢點我都比較吃驚，因為屋企冇人識彈琴。而一對孖仔就鍾意踢波，我會任佢哋自由發展，健康成長。」梁洛施說。
處女演出舞台劇， Isabella已通知在港的家人前來支持，問她是否包括前度李澤楷，她說：「佢都係我家人，到時嚟唔嚟到，要睇佢嘅時間。今次返香港做呢個舞台劇，佢都有支持我。」
|
鍾意就快D Share啦！
|
|
|