因為第一集爆紅，帶挈《步步驚情》被無綫睇中用高價買入，吳奇隆同劉詩詩更情侶檔做宣傳，可惜膠劇始終係膠劇。
探熱針
眼光獨到 膠劇陸續有來 無綫高價買爛劇《步步驚情》
自恃慣性收視的無綫，選擇在黃金時段推出世紀膠劇《西遊記》，結果劇集屢創收視新低，甚至影響整個黃金時段，全線節目收視被拖垮，令廣告商詐曬型。
行錯棋計錯數豈止《西遊記》！無綫近年頻頻以有殺錯無放過方針買外購劇，以杜絕對手執到好嘢，可惜眼光不如人，結果變成高價買爛劇，當中包括以四百五十萬，購入由吳奇隆、劉詩詩主演的《步步驚心》第二集《步步驚情》，以為加埋已過氣的韓劇《來自星星的你》，雙箭頭谷起收費劇集台。點知算盤打唔響，《步 2》在大陸由開播被插到大結局，無綫眼光，十分「獨到」！
插到爆
有買趁手！眼見內地劇《步步驚心》爆紅，無綫一於唔執輸，搶贏有線購入第二集：《步步驚情》。由於有第一集男女主角吳奇隆、劉詩詩冧莊，以為靠得住的無綫出價特別鬆手，比以前高出接近一倍，以每集一萬五千元美金（約港幣十一萬七千元）價錢計，全劇三十九集盛惠四百五十多萬港幣，成功搶到香港播映權。
以為執到寶！點知《步步驚情》在內地由開播到大結局，都被觀眾插到飛起，由於劇集質素無法與第一集相提並論，即使有男女主角吳奇隆同劉詩詩公開戀情谷宣傳，對收視依然毫無幫助，無綫想靠此劇谷起收費電視「煲劇台」的鴻圖大計，全盤泡湯。
救唔番
「大陸有限制令，除咗電影，劇集唔可以拍穿越題材，所以《步步驚情》個劇本改完又改。但因為要食番上集古裝情節，講女主角發夢返咗清朝，點知審批過唔到，於是要再拍再剪過，變成女主角係追劇迷，幻想自己去咗清朝，結果搞到啲劇情好夾硬又唔合理，雖然無綫依家播嘅唔同大陸嗰個版，但個劇本已經改到不倫不類，所以都救唔番。」一名無綫人說。
無綫近年對搶外購劇毫不手軟，原因是防止對手執到好嘢，甚至不惜將價錢搶高三成到五成，以本傷人。
後知後播
在商言商，搶到紅爆韓劇《來自星星的你》和《繼承者門》，唔益人的策略亦無可厚非，可惜有時捉到鹿唔識脫角，最佳例子，是劇集在韓國播完，兩個月後才配好音放在收費煲劇台播；奈何所有劇迷早已同步上線即時睇。甚至下載，睇完再
翻睇。
無綫歎慢板，得物無所用。
爛劇之王
無綫除了囤積不少爛劇外，亦經常安排旗下藝人返內地接拍爛劇賺錢，早前有大陸傳媒公開狠評 TVB小生花旦包括林峯、鄭嘉穎、佘詩曼及胡杏兒等，為求北上賺人仔，唔理劇集質素乜都拍，憑《步步驚心》大紅的鄭嘉穎，更成眾矢之的，被封為爛劇之王。
|
鍾意就快D Share啦！
|
|
|