兩師徒合演舞台劇，銷情及口碑均都差強人意。
探熱針
門票滯銷 Isabella復出撻 Q
梁洛施同恩師詹瑞文合演的舞台劇《快樂勿語》日前公演， Isabella久休復出，但叫座乏力，九場舞台劇冇場爆，平均入座率僅七成！
為谷飛，主辦商將門票掟上團購網割價促銷， Isabella連日來亦落力做宣傅，連舊愛李澤楷都擺埋上枱，自爆會邀請對方睇騷，無所不用其極。
急救票房
於尖沙咀文化中心大劇院公演的舞台劇《快樂勿語》，價格共分$580、$450、$380、$320、$270和$195，雖然每場只有一千七百三十四個座位，但九場門票中，只有其中幾場的貴價門票顯示滿座。
為免對住空櫈做戲，身兼主辦商及男主角的詹 sir，四出𢱑贊助商包場，再將門票掟上團購網，以七折促銷，雙管救亡。
「門票四月開賣，但啲飛去得好慢，詹 sir嗌埋 Bella（梁洛施）係咁谷宣傳，同報紙雜誌做訪問，行勻咁多個電台仲搞埋探班；另外又四圍搵 sponsor，其中一埸 She.com包場派飛，叫做谷到八成入座率，剩番嗰兩成，唯有掟去團購網，做七折促銷。」知情者說。
擺小小超上枱
復出頭炮撻 Q， Isabella為補鑊，連舊愛小小超都擺埋上枱，接受訪問罕有地有問必答，指自己與對方是「一家人」，會請對方到場睇騷，又話嚟緊父親節，將與小小超及三個囝囝「一家五口」慶祝。
打出舊情史王牌，但開騷前半粒鐘，仍有大量門票供應，可即買即入場。
在劇中飾演自閉女孩的 Isabella，全晚幾乎零對白，只講外星語，令觀眾睇到一頭霧水。雖然詹 sir悉心炮製多場獨腳戲讓愛徒發揮，可惜 Isabella久休戰陣、演技生硬，慘變成觀眾廁所位，加埋 Dorian Ho（何國鉦）替她設計的浮誇服飾，同劇情格格不入，單靠詹 sir在劇中講爛 gag製造笑位，亦難帶動現場氣氛。
「 Bella本來諗住借舞台劇打響頭炮，但而家反應唔理想，嚟緊傾嘅電影全部嗌停，話返加拿大湊嚇仔先。」知情人士說。
|
鍾意就快D Share啦！
|
|
|